Header Ads

ພົບປະສອງຝ່າຍ ລະຫວ່າງ ລາວ ແລະ ກຳປູເຈຍ ທີ່ນະຄອນພະນົມເປັນ


ລາຍງານຈາກ ຂ່າວສານປະເທດລາວ (ຂປລ) ໃນວັນທີ 11 ມັງກອນ 2018, ທີ່ ນະຄອນຫລວງພະນົມເປັນ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ພົບປະກັບ ທ່ານ ຮຸນ ແຊນ, ນາຍົກລັດຖະມົນຕີ ແຫ່ງ ລາຊະອານາຈັກກຳປູເຈຍ, ໃນໂອກາດທີ່ທ່ານ ພ້ອມດ້ວຍຄະນະ ເຂົ້າຮ່ວມກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 2, ພາຍໃຕ້ຫົວຂໍ້ “ແມ່ນ້ຳເແຫ່ງສັນຕີພາບ ແລະ ການພັດທະນາແບບຍືນຍົງຂອງພວກເຮົາ” (Our River of Peace and Sustainable Development).

ໃນການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືຂອງສອງປະເທດ ລາວ-ກຳປູເຈຍ ໂດຍສະເພາະແມ່ນການຮ່ວມມືສອງຝ່າຍ ໃນປີ 2017 ທີ່ຜ່ານມາ, ຊຶ່ງທັງສອງປະເທດ ໄດ້ມີການແລກປ່ຽນການຢ້ຽມຢາມ ແລະ ພົບປະປຶກສາຫາລືກັນ ຢ່າງເປັນປົກກະຕິ. ພ້ອມກັນນີ້, ທັງສອງຝ່າຍ ຍັງໄດ້ທົບທວນຄືນ ກ່ຽວກັບ ວຽກງານໃນດ້ານຕ່າງໆເຊັ່ນ: ວຽກງານກົງສຸນ, ພະລັງງານໄຟຟ້າ, ເສດຖະກິດການຄ້າ, ການທ່ອງທ່ຽວ ແລະ ອື່ນໆ.



ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີທີ່ໄດ້ພົບກັບ ທ່ານ ຮຸນ ແຊນ, ນາຍົກລັດຖະມົນຕີ ແຫ່ງ ລາຊະອານາຈັກກໍາປູເຈຍ, ຊຶ່ງເປັນປະທານຮ່ວມຂອງກອງປະຊຸມສຸດຍອດແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2, ພ້ອມທັງສະແດງຄວາມຂອບໃຈຢ່າງສູງ ທີ່ລັດຖະບານ ແລະ ປະຊາຊົນກໍາປູເຈຍ ໄດ້ໃຫ້ການຕ້ອນຮັບອັນອົບອຸ່ນ, ໃຫ້ຄວາມສະດວກຕໍ່ການເຂົ້າຮ່ວມປະຊຸມຂອງທ່ານ ແລະ ຄະນະ ໃນຄັ້ງນີ້.

ທ່ານນາຍົກລັດຖະມົນຕີ ຍັງໄດ້ສະແດງຄວາມຊົມເຊີຍຕໍ່ຜົນສໍາເລັດອັນຈົບງາມ ໃນການເປັນເຈົ້າພາບຈັດກອງປະຊຸມອັນສໍາຄັນໃນຄັ້ງນີ້ຂອງກໍາປູເຈຍ, ໂດຍທ່ານ ໄດ້ຕາງໜ້າໃຫ້ແກ່ ສປປ ລາວ ສະແດງຄວາມຮູ້ສຶກເປັນກຽດຢ່າງສູງ ທີ່ໄດ້ຮັບຄວາມໄວ້ເນື້ອເຊື່ອໃຈຈາກ 6 ປະເທດ ສະມາຊິກ ກໍຄື ປະເທດກໍາປູເຈຍ ທີ່ເປັນເຈົ້າພາບກອງປະຊຸມໃນຄັ້ງນີ້ ມອບຕຳແໜ່ງປະທານຮ່ວມກອງປະຊຸມໃຫ້ ສປປ ລາວ ເປັນເຈົ້າພາບກອງປະຊຸມ ແມ່ນໍ້າຂອງ-ແມ່ນໍ້າລ້ານຊ້າງ ໃນຄັ້ງຕໍ່ໄປ ກໍຄື ຄັ້ງທີ 3, ຊຶ່ງ ສປປ ລາວ ຈະນໍາເອົາຜົນຂອງກອງປະຊຸມຄັ້ງນີ້ ສືບຕໍ່ຜັນຂະຫຍາຍການຮ່ວມມືໃນອານຸພາກພື້ນ ແມ່ນໍ້າຂອງ-ແມ່ນໍ້າລ້ານຊ້າງ ໃຫ້ເກີດຜົນສໍາເລັດ ແລະ ສືບຕໍ່ແຜນຮ່ວມມືຂອງກອງປະຊຸມຄັ້ງຕໍ່ໆໄປ.



ໃນໂອກາດນີ້, ທ່ານ ຮຸນ ແຊນ ກໍໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ການເດີນທາງມາເຂົ້າຮ່ວມກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2, ທີ່ ນະຄອນຫລວງພະນົມເປັນ, ລາຊະອານາຈັກກຳປູເຈຍ ຂອງທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍຄະນະ ໃນຄັ້ງນີ້, ຊຶ່ງຖືເປັນກຽດ ແລະ ກໍເປັນການຮັດແໜ້ນສາຍພົວພັນ ແລະ ການຮ່ວມມື ລະຫວ່າງ ສອງລັດ ແລະ ປະຊາຊົນສອງຊາດ ລາວ-ກຳປູເຈຍ ໃຫ້ນັບມື້ນັບມີຄວາມແໜ້ນແຟ້ນ, ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.

-----------------------



------------------------------

ສະບາຍດີປີທ່ອງທ່ຽວລາວ 2018
Sabaidee Visit Laos Year 2018 

"ຢູ່ເຂດບ້ານເມືອງຂອງທ່ານ ມີສະຖານທີ່ໜ້າສົນໃຈຫຍັງແດ່ ຢາກໃຫ້ໂທລະໂຄ່ງ ຊ່ວຍປະຊາສຳພັນໃຫ້ ສົ່ງຂໍ້ມູນມາເລີຍ ທີ່ ອີເມວ tholakhong@gmail.com | LINE ID: @tholakhong ຫຼື ອິນບ໋ອກ ມາກໍ່ໄດ້.


ມາພ້ອມກັນເປັນເຈົ້າພາບທີ່ດີ ແບບຄົນລາວຂອງແທ້! ຕ້ອນຮັບແຂກທັງພາຍໃນແລະຕ່າງປະເທດ ດ້ວຍຮອຍຍິ້ມ, ຄວາມຈິງໃຈ ແລະ ມິດຕະພາບ ຕະຫຼອດປີທ່ອງທ່ຽວລາວ 2018 ແລະ ຕະຫຼອດໄປ

ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ ແລະ ຂໍຮ່ວມເປັນສ່ວນໜື່ງ ຕ້ອນຮັບປີທ່ອງທ່ຽວລາວ 2018 ຢ່າງຟົດຟື້ນ!





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com






No comments

Powered by Blogger.