Header Ads

ພຣະທາດອີງຮັງ ແລະ ການບູລະນະປະຕິສັງຂອນ



ເດືອນມັງກອນ 2018 ເລິ່ມມີການບູຣະນະປະຕິສັງຂອນພຣະທາຕຸອີຮັງ

ຕອນເຊົ້າວັນທີ 6 ມັງກອນ 2018 ທີ່ຜ່ານມານີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະ ໄດ້ລົງເຄື່ອນໄຫວຕິດຕາມກວດກາການບູລະນະປະຕິສັງຂອນ ພຣະທາຕຸອີງຮັງ.
ການບູລະນະປະຕິສັງຂອນ ພຣະທາຕຸອີງຮັງ ໃນຄັ້ງນີ້ ຈະໄດ້ມີການປະຕິສັງຂອນຄືນໃໝ່ ໃນດ້ານກຳແພງແກ້ວ, ກົມມະລຽນ, ປູລານພຣະທາຕຸພາຍໃນຂອບເຂດກຳແພງແກ້ວ ແລະ ສ້າງສີມນ້ອຍພາຍໃນບໍລິເວນພຣະທາຕຸ



ລວມມູນຄ່າໃນການບູລະນະປະຕິສັງຂອນ ເປັນເງີນ 1 ຕື້ 500 ລ້ານກີບ ມາຮອດປະຈຸບັນມີເງິນປະກອບສ່ວນສົມທົບທຶນ ໄດ້ແລ້ວທັງໝົດ 15 ລ້ານ 4 ແສນກວ່າກີບ

ຂ່າວ: ອັກສອນສິນ ພົມມະຈັນ
ຮູບພາບແລະຂ່າວ ຈາກ : ວິທະຍຸກະຈາຍສຽງ ສະຫວັນນະເຂດ


ມາຮູ້ຈັກຂໍ້ມູນໂດຍສັງເຂບຂອງ ພະທາດອີງຮັງ

ທາດອິງຮັງ ຫຼື ຄົນທົ່ວໄປມັກຮ້ອງວ່າ ອິນຮັງ ເປັນປູຊະນິຍະສະຖານເກົ່າແກ່ທີ່ສັກສິດ ແລະ ສຳຄັນ ເປັນທີ່ ເຊີດໜ້າຊູຕາທາງວັດທະນະທັມຂອງແຂວງສະຫວັນນະເຂດ ພຣະທາຕຸອົງນີ້ຖືກສະຫຼັກດ້ວຍລວດລາຍສິລະປະກຳສະໄໝ ບູຮານ ແລະ ຮັກສາໄວ້ ໂດຍບໍ່ຖືກທຳລາຍຈາກອຳນາດ ຫຼື ອິດທິພົນໃດຈັກເທື່ອ ນອກຈາກການເວລາເທົ່ານັ້ນ ແຕ່ກໍຖືກ ປະຕິສັງຂອນມາແລ້ວຫຼາຍຄັ້ງ.

ພຣະທາຕຸນີ້ຖືກສ້າງສະໄໝອານາຈັກສີໂຄດຕະບອງ ( ປະມານສະຕະວັດທີ 6 ) ໂດຍພຣະເຈົ້າສຸມິນທະຣາຊ ຣາຊາ ແຫ່ງອານາຈັກສີໂຄດຕະບອງ ຊຶ່ງຖືກວາງຮາກຖານຈາກການແນະນຳຂອງພຣະເຖຣະ (ຄູບາອາຈານ) ຊາວອິນເດຍ ເພື່ອເປັນເຄື່ອງໝາຍເຖິງການສະເດັຈປະຣິນິພານ ຂອງອົງສົມເດັດພຣະພຸທທະເຈົ້າທີ່ປ່າໄມ້ຮັງ ເມືອງກຸລິນາຣາຍ ປະເທດອິນເດຍ ເມື່ອສ້າງສຳເລັດ ເພິ່ນໄດ້ນຳເອົາກະດູກພຣະພຸດທະເຈົ້າມາໃສ່ໄວ້ ແຕ່ໜັງສືອຸຣັງຄະທາຕຸໄດກ່າວວ່າ : ສ້າງຂຶ້ນເພື່ອເປັນເຄື່ອງ ໝາຍສະຖານທີ່ບ່ອນນັ່ງຂອງພຣະພຸທທະເຈົ້າ ໃນຄາວທີ່ເພິ່ນສະເດັດມາຢ້ຽມຢາມພຣະຍາສີໂຄດຕະບອງ ແຕ່ຄວາມຈິງຄົງຈະມີຈຸດປະສົງ ເພື່ອໃຫ້ປະຊາຊົນເຫັນຄວາມສຳຄັນຂອງພຣະທາຕຸອົງນີ້ຫລາຍກວ່າ



ໃນລະຫວ່າງຂະເໝນມີອຳນາດພຣະທາຕຸອົງນີ້ ຖືກດັດແປງໃຫ້ເປັນເທວະສະຖານຂອງຊາວຮີນດູ ແລະ ໄດ້ ເສີມສ້າງຕໍ່ຂຶ້ນໄປຕື່ມ ຊຶ່ງລິງລາຍຕົບແຕ່ງອອກມາໃນລັກສະນະຂອງຮີນດູ ໂດຍສະເພາະ ເລື່ອງເມຖຸນສັງວາດ ແລະ ອື່ນໆ ຈາກນັ້ນພຣະທາຕຸອິງຮັງ ກໍ່ຕົກຢູ່ໃຕ້ອິດທິພົນຂອງຜູ້ສືບຣາຊະການສະໄໝຕ່າງໆ. ຄື :

ໃນປີ ຄ.ສ 1349 ພຣະຍາຟ້າງຸ່ມ ຜູ້ທ້ອນໂຮມແຜ່ນດິນລ້ານຊ້າງ ໄດ້ຍົກທັບມາຢຶດເອົາຫົວເມືອງຕ່າງໆ ເລື່ອງ ຂອງພຣະທາຕຸຈຶ່ງຖືກມອບໝາຍໃຫ້ເຈົ້າເມືອງທີ່ປົກຄອງເປັນຜູ້ບູລະນະປົວແປງຮັກສາ

ພໍຕົກມາເຖິງສະໄໝສົມເດັຈໂພທິ ສາຣາຊ ພຣະເຈົ້າໄຊເສດຖາທິຣາຊ ຈຶ່ງປະກົດວ່າ ເພິ່ນໄດ້ມາຂາບໄຫວ້ນະມັດສະການໃນເຂດເມືອງກະບອງ ຄື ພຣະທາດອິງຮັງ ແລະ ພຣະທາດສີໂຄດຕະບອງ ເມື່ອເຈົ້າໄຊເສດຖາທິຣາຊ ສະຖາປະນານະຄອນຫຼວງວຽງຈັນ ເປັນເມືອງຫຼວງ ເພິ່ນກໍ່ມີ ຄຳສັ່ງໃຫ້ດັດແປງພຣະທາຕຸນີ້ ກັບຄືນເປັນເຈດີທາງພຸທທະສາສະໜາ ສ້າງຍອດເຈດີເປັນສິລະປະແບບລາວບູຮານ ແຕ່ນັ້ນ ມາກໍຍັງມີການປະຕິສັງຂອນເລື້ອຍໆ ແຕ່ກໍຍັງຮັກສາຮູບແບບຂອງສະໄໝພຣະເຈົ້າໄຊເສດຖາທິຣາຊ ເອົາໄວ້ດັ່ງນີ້ :



ແທ່ນທາຕຸມີລວງກວ້າງດ້ານລະ 9 ແມັດ ລວງສູງ 25 ແມັດ ຕັ້ງຢູ່ບ້ານທາຕຸອິງຮັງ ແຍກອອກທາງສະຫວັນ ເຊໂນ ຢູ່ຫຼັກກິໂລແມັດທີ 12 ແລະ ທາງເຂົ້າໄປ 3 ກິໂລແມັດ.

ເມື່ອປີ 1949-1951 ປະຊາຊົນຊາວເມືອງໄດ້ມີການປົວແປງບູຣະນະຄັ້ງໃຫຍ່ໃຫ້ກວ້າງຂວາງ ຄືໄດ້ສ້າງປະຕູໂຂງ ປຸກກົມມະລຽນ ແລະ ສາລາໂຮງທັມຂຶ້ນ ເພື່ອໃຫ້ຜູ້ທ່ອງທ່ຽວ ແລະ ອອກຕົນຍາດໂຍມໄດ້ມາຮຽນຮູ້ຂາບໄຫວ້ບູຊາ. ເພິ່ນຈະຈັດງານບຸຸນສະເຫຼີມສະຫຼອງພຣະທາຕຸນັ້ນແມ່ນມີໃນມີ້ຂຶ້ນ 15 ຄໍ່າ ເດືອນຈຽງ ( ເດືອນ 1 ລາວ ) ຂອງທຸກໆປີ

( ແຕ່ກ່ອນຈັດງານເດືອນ 12 ເພັງ ) ພ້ອມບຸນນະມັດສະການພຣະທາຕຸຫຼວງ ແຕ່ເນື່ອງຈາກວ່າ ພຣະເຈົ້າໄຊຍະເສດຖາທິຣາຊ ພຣະອົງມີພຣະຣາຊະກິດທີ່ພຣະທາຕຸຫຼວງ ເພິ່ນຈຶ່ງເລື່ອນມາຈັດງານໃນເດືອນຈຽງເພັງ ) ພ້ອມນັ້ນ ຍັງມີງານຕະຫຼາດນັດ ແລະ ການຫຼິ້ນກິລາ ດັ້ງເດີມນັ້ນແມ່ນມີແຕ່ກິລາໝາກຂ່າງ ແຕ່ປັດຈຸບັນບໍ່ເຫັນມີການຫຼິ້ນພໍປານໃດແລ້ວ.

ຮູບພາບຂາວດຳພຣະທາຕຸອີງຮັງ ຖືກຖ່າຍໄວ້ໃນປີ 1951 ໂດຍນັກບູຮານຄະດີ ແຫ່ງສຳນັກຝຣັ່ງເສດ ແຫ່ງປາຍບູຣະພາທິດ (EFEO)

ໂດຍ: Art and Culture of Laos

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.