Header Ads

ສປປລາວ ໄດ້ເປັນປະເທດທີ 5 ໃນລົບລ້າງພະຍາດຕາສານເພື່ອບໍ່ໃຫ້ເປັນບັນຫາທາງດ້ານສາທາລະນະອິກຕໍ່ໄປ



ໃນວັນທີ 26 ມັງກອນທີ່ໂຮງແຮມດອນຈັນພາເລດ, ທ່ານ ຣີນາ ບິດເຕີ ເອກອັກຄະລັດຖະທູດສະຫະລັດອາເມລິກາປະຈຳລາວໄດ້ຮ່ວມກັບເຈົ້າຫນ້າທີ່ລາວໃນພິທີສະເຫຼີມສະຫຼອງການທີ່ສປປລາວໄດ້ເປັນປະເທດທີ 5 ທີ່ສາມາດປະກາດລົບລ້າງພະຍາດຕາສານ -Trachoma- ບໍ່ໃຫ້ເປັນບັນຫາທາງດ້ານສາທາລະນະອິກຕໍ່ໄປ.

ພະຍາດຕາສານແມ່ນພະຍາດທາງສາຍຕາທີ່ສາມາດຕິດຕໍ່ໄດ້ຜ່ານແບັກທິເລຍທີ່ເຮັດໃຫ້ຂົນຕາປົ່ງກັບເຂົ້າໄປໃນຕາ. ພະຍາດຕາສານໂດຍທົ່ວໄປແລ້ວແມ່ນຈະຕິດຕໍ່ຈາກຄົນສູ່ຄົນໂດຍຜ່ານການສຳພັດກັບບັນດາແມງໄມ້ ແລະ ມືທີ່ມີເຊື້ອ. 

ໃນໄລຍະ 5 ປີທີ່ຜ່ານມາ, ລັດຖະບານສະຫະລັດອາເມລິກາໂດຍຜ່ານອົງການພັດທະນາສາກົນອາເມລິກາ USAID ໄດ້ຊ່ວຍເຫຼືອ ສປປລາວ ໂດຍການມອບທຶນຈຳນວນ 2.7 ລ້ານໂດລາໃນການປະຕິບັດວຽກງານເພື່ອລົບລ້າງບັນດາພະຍາດເຂດຮ້ອນທີ່ຖືກລະເລີຍເຊັ່ນພະຍາດຕາສານ. 
ທ່ານທູດຣີນາໄດ້ກ່າວໃນພິທີວ່າ: ສະຫະອາເມລິກາມີຄວາມພາກພູມໃຈຫຼາຍທີ່ໄດ້ຊ່ວຍເຫຼືອ ສປປລາວ ໃນວຽກງານການລົບລ້າງພະຍາດຕາສານ, ເຊິ່ງນີ້ເປັນໜຶ່ງໃນບັນດາຕົວຢ່າງຂອງການຮ່ວມມືທີ່ເຂັ້ມແຂງແລະແໜ້ນແຟ້ນຂອງສອງປະເທດຂອງພວກເຮົາ.ພວກເຮົາຈະສືບຕໍ່ປະຕິບັດໜ້າທີ່ຢ່າງໃກ້ຊິດເພື່ອສ້າງສປປລາວໃຫ້ກາຍເປັນປະເທດທີ່ເຂັ້ມແຂງແລະຜາສຸກ, ປະຊາຊົນມີສຸຂະພາບແຂງແຮງ.

ລັດຖະບານສະຫະລັດອາເມລິກາໄດ້ເລີ່ມໃຫ້ການຊ່ວຍເຫຼືອລັດຖະບານ ສປປລາວ ໃນວຽກງານນີ້ນັບຕັ້ງແຕ່ປີ 2012 ໂດຍຜ່ານໂຄງການຂອງ USAID ເຊັ່ນ: End in Asiaແລະ ENVISION. ອົງການ USAID ໄດ້ໃຫ້ການຊ່ວຍເຫຼືອກະຊວງສາທາລະນະສຸກໃນການເກັບກຳຂໍ້ມູນທີ່ເຊື່ອຖືໄດ້ກ່ຽວກັບສະຖານະຂອງພະຍາດຕາສານໃນລາວ, ແລະ ປະຕິບັດຕາມເງື່ອນໄຂຂອງການລົບລ້າງພະຍາດຕາສານເຊິ່ງເປັນຂໍ້ກຳນົດໃນການລົບລ້າງພະບາດຂອງອົງການອະນາໄມໂລກ. 

ອົງການ USAID ໄດ້ເປັນຜູ້ນຳໂລກທາງດ້ານການຕອບໂຕ້ກັບບັນດາພະຍາດເຂດຮ້ອນທີ່ຖືກລະເລີຍເຊັ່ນພະຍາດຕາສານ. ອົງການ USAID ຮ່ວມກັບຄູ່ຮ່ວມພັດທະນາໄດ້ຊ່ວຍເຫຼືອການປິ່ນປົວພະຍາດເຂດຮ້ອນທີ່ຖືກລະເລີຍຫຼາຍກ່ວາ 1 ຕື້ຄົນໃນ 25 ປະເທດໃນໄລຍະ 10 ປີທີ່ຜ່ານມາ. ຍ້ອນວຽກງານດັ່ງກ່າວໄດ້ເຮັດໃຫ້ຄົນຈຳນວນ 84 ລ້ານຄົນສາມາດດຳລົງຊີວິດໃນສະຖານທີ່ທີ່ບໍ່ມີຄວາມສ່ຽງຕໍ່ການຕິດເຊື້ອພະຍາດຕາສານ.

ພາບ ແລະ ຂ່າວ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.