Header Ads

ບຸນເດືອນຈຽງ ບຸນກັມມະຖານ ປະຣິວາດຊະກັມ ທີ່ວັດປ່າພູເຂົາຄວາຍ


ນະຄອນຫຼວງວຽງຈັນ: ສິດ-ສານຸສິດຂອງວິທະຍາໄລສົງ ອົງຕື້ ປີທີ່ 3 ແລະພຣະສົງອົງຄະເຈົ້າ ພ້ອມດ້ວຍຜູ້ຄົນ ທັງຫລາຍ ຮ່ວມກັນເຂົ້າປະຕິບັດທັມ ວິປັດສະນາກັມມະຖານ ທີ່ວັດປ່າພຣະບາດພູເຂົາຄວາຍ ບ້ານນາຍາງ ເມືອງທຸລະຄົມ ແຂວງວຽງຈັນ ໃນລະຫວ່າງວັນທີ່ 22/12/2017 ເຖິງ ວັນທີ່ 01/01/2018 ຈຸດປະສົງຫລັກໆຂອງການເຂົາປະຕິບັດທັມໃນຄັ້ງນີ້ :



- ເພື່ອເປັນພຸດທະບູຊາ.
- ເພື່ອເປັນການເຜີຍແຜ່ຫລັກຄຳສອນຂອງອົງສັມມາສັມພຣະພຸທທະເຈົ້າ ເພື່ອໃຫ້ໄປນຳໃຊ້ໃນຊິວິດ.
- ເພື່ອເປັນການຮັກສາຮິດຄອງເດືອນຈຽງ ເຊິ່ງເປັນການເຮັດບຸນກັມມະຖານ ໃນປະເພນີລາວເຮົາ.
- ເພື່ອເປັນການສ້າງພຣະສົງ-ສະມະເນນ ໃນການສຶບທອດພຣະພຸທທະສາສະໜາໃຫ້ຈະເຣິນຮຸ່ງເຮືອງ
- ເພື່ອເປັນການຖວາຍອາຈາຣິຍະບູຊາ ໃຫ້ແດ່ ຍາທ່ານໃຫຍ່ ຄຳຕັນ ວໍຣະຣາຊ ອະດິດຜູ້ລິເລິ່ມສ້າງວັດປ່າພຣະບາດພູເຂົາຄວາຍ ແລະອະດິດທີ່ປືກສາສູນກາງ ອພສ.



ວັນທີ່ 31/12/2017 ກໍ່ມີຜູ້ຄົນມາຮ່ວມເຮັດບຸນ ກຸສົນກັນຢ່າງຫລວງຫລາຍ ໃນວັດປ່າພຣະບາດພູເຂົາຄວາຍແຫ່ງນີ້ ເພາະສະຖານທີ່ແຫ່ງນີ້ເຫມາະສົມທີ່ສຸດ ສຳລັບເປັນບ່ອນເຮັດກັມມະຖານ ເພາະສະຖານທີ່ແຫ່ງນີ້ ມີປະຫວັດຄວາມເປັນມາ ທີ່ເປັນຝຶກປະຕິບັດຂອງບັດດາພຣະສົງທີ່ເປັນພຣະອະຣິຍະ ມາແລ້ວນັບບໍ່ຖ້ວນ ເປັນສະຖານທີ່ສະຫງົບງຽບ ທຳມະຊາດງົດງາມ ແລະບໍ່ໄກຈາກນະຄອນຫລວງວຽງຈັນ ເທົ່າໃດ.



ຄ່ຳຄືນວັນທີ່ 31 ທັນວາ 2017 ນີ້ກໍມີພິທີສູດມົນ ໄຫວ້ພຣະ ຮັກສາສິນ ແລະຝຶກສະມາທິ ເຊິ່ງເປັນຄ່ຳຄືນສຸດທ້າຍຂອງບຸນດັ່ງກ່າວ ແລະຕອນເຊົ້າຂອງວັນທີ່ 01/01/2018 ກໍ່ມີພິທີໃສ່ບາດ ແລະປູກຕົ້ນສຼີມະຫາໂພທິ ທີນຳມາຈາກດິນແດນຊົມພູທະວິບ ( ອີນເດຍ) ຈຳນວນ 2 ຕົ້ນ ໄວ້ເປັນທີ່ຣະນຶກທີ່ວັດປ່າພຣະບາດພູເຂົາຄວາຍແຫ່ງນີ້ ໂດຍໄດ້ຮັບຄວາມເມດຕາ ພຣະເດດ ພຣະຄຸນ ພຣະອາຈາຣຍ໌ໃຫຍ່ ມະຫາ ບຸນມາ ສີມມາພົມ ຮອງປະທານ ອພສ ສູນກາງເຂົ້າຮ່ວມໃນພິທີນີ້.

ພາບແລະຂ່າວ: ຫຸມເພັດ ມະນີສຸກ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.