Header Ads

ເມືອງໂພນທອງ ຈັດການແຂ່ງຂັນນັກຮຽນເກັ່ງຂັ້ນເມືອງ


ວັນທີ 13 ມັງກອນ 2018 ນີ້ຢູ່ທີສະໂມສອນໃຫ່ຍຂອງເມືອງໂພນທອງ ແຂວງຈຳປາສັກ ໄດ້ຈັດພິທີການແຂ່ງຂັນສອບເສັງນັກຮຽນເກັ່ງຂັ້ນເມືອງປະຈໍາສົກຮຽນ 2017-2018 ລະດັບປະຖົມ,ມັດທະຍົມທົ່ວເມືອງ, ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ຄຳຜາຍ ແກ້ວລາວັນ ຮອງເລຂາພັກເມືອງໂພນທອງ, ທ່ານ ອຳຄາ ແກ້ວອຳພອນກຳມະການພັກເມືອງຮອງຫົວໜ້າຫ້ອງການສຶກສາທິການ ແລະກິລາເມືອງ, ທ່ານ ສົມແພດ ພົມມະຈັນ ຮອງຫົວໜ້າຫ້ອງການສຶກສາທິການແລະກິລາເມືອງ,ມີບັນດາຄູອາຈານຈາກໜວດໂຮງຮຽນຕ່າງໆພາຍໃນເມືອງພ້ອມດ້ວຍນັກຮຽນເຂົ້າຮ່ວມ.



ໃນພິທີກໍ່ໄດ້ຜ່ານຂໍຕົກລົງຂອງທ່ານເຈົ້າເມືອງ ແລະ ຂໍຕົກລົງຂອງທ່ານຫົວໜ້າຫ້ອງການສຶກສາທິການ ແລະກິລາ ວ່າດ້ວຍການເປີດການແຂ່ງຂັນສອບເສັງນັກຮຽນເກັ່ງຂັ້ນເມືອງ, ຜ່ານບົດລາຍງານການສອບເສັງນັກຮຽນເກັ່ງຂັ້ນກຸ່ມ,ຂັ້ນໂຮງຮຽນ,ກົດລະບຽບການສອບເສັງ, ເວລາດ່ຽວກັນນັ້ນທ່ານ ຄໍາຜາຍ ແກ້ວລາວັນ ຮອງເລຂາພັກເມືອງໆໂພນທອງ ໄດ້ກ່າວເປີດພິທີການສອບເສັງນັກຮຽນເກັ່ງໃນຄັ້ງນີ້ກໍ ເພື່ອເສີມຂະຫຍາຍຂະບວນການແຂ່ງຂັນສອນດີ-ຮຽນເກັ່ງເປັນການປັບປຸງຄຸນນະພາບການສຶກສາຢູ່ພາຍໃນເມືອງໃຫ້ສູງຂຶ້ນ ເພື່ອຄັດເລືອກເອົານັກຮຽນເກັ່ງຂອງເມືອງເຂົ້າຮ່ວມແຂ່ງຂັນນັກຮຽນເກັ່ງຂັ້ນແຂວງ ແລະລະດັບຊາດທີ່ຈະມີຂຶ້ນໃນຕໍ່ໜ້າດ້ານໜຶ່ງ ກໍເພື່ອສ້າງໂອກາດໃຫ້ນັກຮຽນເກ່ັງໄດ້ສະແດງອອກທາງດ້ານພອນສະຫວັນຄວາມຮູ້, ຄວາມສາມາດຫົວຄິດປະດິດສ້າງ ຂອງຕົນທັງສ້າງໂອກາດໃຫ້ຄູສອນ ແລະນັກຮຽນໄດ້ພົບປະແລກປ່ຽນບົດຮຽນເຊິ່ງກັນ ແລະກັນຕື່ມອີກ.




ການສອບເສັງນັກຮຽນເກ່ັງຄັ້ງ ນີ້ມີນັກຮຽນເກັ່ງຊັ້ນປະຖົມສຶກສາຊັ້ນ ປ 5 ຊັ້ນມັດທະຍົມສຶກສາຕອນຕົ້ນ ມ.4 ແລະຊັ້ນມັດທະຍົມສຶກສາຕອນປາຍ ມ.7 ຊຶ່ງເປັນຕົວແທນນັກຮຽນ ເກັ່ງທີ່ໄດ້ຮັບການຄັດເລືອກ ແລະສອບເສັງໃນຂັ້ນຫ້ອງຂັ້ນໂຮງຮຽນ ຂັ້ນກຸ່ມໂຮງຮຽນພາຍໃນເມືອງເຂົ້າຮ່ວມທັງໝົດ 89 ຄົນ, ຍິງ 36 ຄົນ ຈັດຕັ້ງສອບເສັງວິຊາພາສາລາວ, ວິຊາຄະນິດສາດ ແລະວິຊາໂລກ ອ້ອມຕົວສໍາລັບຊັ້ນປະຖົມສຶກສາຊັ້ນ ປ 5 ສ່ວນມັດທະຍົມສຶກສາ ຕອນຕົ້ນ ມ.4 ແລະມັດທະຍົມສຶກ ສາຕອນປາຍ ມ.7 ສອບເສັງວິຊາ ພາສາລາວວັນນະຄະດີ,ວິຊາຄະນິດສາດ, ວິຊາເຄມີສາດ ແລະ ວິຊາຟີຊິກສາດ



ຜ່ານການແຂ່ງຂັນສອບເສັງຕົວຈິງຊັ້ນປະຖົມ ສຶກສາຊັ້ນ ປ 5 ເສັງໄດ້ທີ 1 ວິຊາ ພາສາລາວແມ່ນ ນາງ ແພງ ກຸ່ມໂຮງຮຽນປະຖົມເມືອງຮຶບ, ວິຊາຄະນິດສາດ ທ້າວ ບຸນຈັນ ວຶ ກຸ່ມໂຮງຮຽນ ປະຖົມເມືອງຮຶບ ວິຊາໂລກອ້ອມຕົວນາງ ຊໍາ ກຸ່ມໂຮງຮຽນປະຖົມ ເມືອງຮຶບ ,ຊັ້ນມັດ ທະຍົມສຶກສາຕອນຕົ້ນ ມ.4 ເສັງ ໄດ້ທີ 1 ວິຊາພາສາລາວວັນນະຄະດີນາງ ແສງທອງ ວິລາວອນ ມ.ຕ ເມືອງຮຶບ , ວິຊາຄະນິດສາດທ້າວ ຈີນູ ຢ່າງ ມ.ຕ ທອງສີ , ວິຊາເຄມີສາດ ທ້າວ ຢາງວັນ ແກ້ວຄຳຜາຍ ມ.ຕ ໂພນທອງ ,ວິຊາຟີຊິກສາດ ທ້າວ ເຍີ່ມ ມ.ຕ ບ້ານໂດນ ແລະຊັ້ນມັດທະຍົມສຶກສາຕອນປາຍ ມ.7 ເສັງໄດ້ທີ 1 ວິຊາພາສາລາວ ວັນນະຄະດີ ນາງ ພັດແກ່ນຈັນ ມ.ສ ໂພນທອງ ,ວິຊາຄະນິດສາດ ທ້າວ ສີພອນ ຕຸລາວ່າງ ມ.ສໂພນທອງ, ວິຊາເຄມີສາດ ທ້າວ ຄໍາເທ້ ທິນທິເດດ ມ.ສ ໂພນທອງ , ວິຊາຟີຊິກສາດ ທ້າວ ພັນທອນ ທຳມະວົງ ມ.ສ ໂພນທອງ.



ທ້າຍພິທີຍັງໄດ້ມອບຂອງຂັວນລາງວັນ ແລະທຶນການສຶກສາໃຫ້ນັກຮຽນເກັ່ງ ທີ່ແຂ່ງຂັນໄດ້ອັນດັບທີ່ດີຕາມລໍາດັບ ເປັນກຽດຂຶ້ນມອບຂອງຄະນະປະທານພັດປ່ຽນກັນຂຶ້ນມອບ.

ຂ່າວ- ພາບ : ທ້າວ ທະນູສິນ ອິດທິພົນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.