Header Ads

ແຂວງຫຼວງພະບາງທຳລາຍຕູ້ເກມການພະນັນທີ່ຜິດກົດໝາຍຈໍານວນ 33 ໜ່ວຍ




ແຂວງຫຼວງພະບາງ : ວັນທີ 6 ກຸມພາ 2018 ນີ້ ຢູ່ທີ່ພະແນກຖະແຫຼງຂ່າວ ວັດຖະນະທຳ ແລະ ທ່ອງທ່ຽວ ແຂວງຫຼວງພະບາງ ໄດ້ຈັດພິທີທຳລາຍຕູ້ເກມຢອດຫຼຽນ ແລະ ຕູ້ເກມການພະນັນທີກົດໝາຍຂຶ້ນ ໂດຍການເປັນປະທານຂອງ ທ່ານ ສຸລິທິບ ໜໍ່ຄຸນຜົນ ຫົວໜ້າພະແນກຖະແຫຼງຂ່າວ ວັດຖະນະທໍາ ແລະ ທ່ອງທ່ຽວແຂວງ, ມີສະຫະພັນຍິງແຂວງ,ພະແນກການຕ່າງປະເທດແຂວງ,ທະຫານ-ຕໍາຫຼວດ,ຕາງໜ້າກົງສູນໃຫຍ່ ສປ ຈີນ ປະຈຳແຂວງຫຼວງພະບາງ,ແຂກຖຶກເຊີນ ຕະຫຼອດຮອດຄູອາຈານ,ນັກຮຽນມັດທະຍົມ ແລະ ນ້ອງນ້ອຍເຍົາວະຊົນເຂົ້າຮ່ວມ.


ທ່ານ ສີສະຫວາດ ຍີ່ລັດໃຈ ຫົວໜ້າຂະແໜງວັດຖະນະທຳ ໄດ້ກ່າວວ່າ: ໂດຍປະຕິບັດຕາມຂໍກຳນົດຂອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ສະບັບເລກທີ 664/ຖວທ,ລົງວັນທີ 22 ກັບຍາ 2003 ວ່າດ້ວຍການຄຸ້ມຄອງ, ກວດກາ ແລະ ອະນຸຍາດຫຼິ້ນເກມທຸກປະເພດໃນ ສປປ ລາວ,ຄຳສັ່ງແນະນຳຂອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເລກທີ 286/ຖວທ,ລົງວັນທີ 8 ພຶດສະພາ 2017 ວ່າດ້ວຍການຫ້າມບໍ່ໃຫ້ອອກໃບອະນຸຍາດ ສ້າງຕັ້ງສູນບໍລິການຕູ້ເກມໃນຂອບເຂດທົ່ວປະເທດ.ຄະນະກຳມາການສະເພາະກິດ ແຂວງຫຼວງພະບາງ ໄດ້ສົມທົບກັບພາກສ່ວນທີກ່ຽວຂ້ອງ ຕັ້ງໜ້າລົງເຄື່ອນໄຫວ ກວດກາ ແລະ ປະຕິບັດໜ້າທີ່ຕາມພາລະບົດບາດ ດ້ວຍຄວາມຮັບຜິດຊອບສູງ ແລະ ໄລຍະຜ່ານມາໄດ້ຈັດພິທີທຳລາຍໄປແລ້ວ 3 ຄັ້ງ, ເຊິ່ງຄັ້ງນີ້ເປັນຄັ້ງທີ່ 4.




ການຈັດພິທີທຳລາຍປີນີ້ ຄະນະກຳມາການສະເພາະກິດແຂວງ,ສາມາດຢືດຕູ້ເກມທີ່ບໍ່ຖຶກຕ້ອງໄດ້ຢູ່ 4 ແຫ່ງ ລວມຕູ້ເກມທັງໝົດ 33 ໜ່ວຍ. ໃນນັ້ນ, ປະກອບມີຕູ້ເກມຢອດຫຼຽນນ້ອຍ 8 ໜ່ວຍ, ຕູ້ເກມການພະນັນຂະໜາດກາງ 14 ໜ່ວຍ ແລະ ຕູ້ເກມການພະນັນໃຫຍ່ 11 ໜ່ວຍ.ຈາກນັ້ນຜູ້ເຂົ້າຮ່ວມກໍ່ໄດ້ຮ່ວມກັນເປັນສັກຂີພະຍານ ເບິ່ງການທຳລາຍຕູ້ເກມຢ່າງເປັນທາງການ.ທ່ານ ສີສະຫວາດ ຍີ່ລັດໃຈ ໄດ້ກ່າວຕື່ມວ່າ: ໃນຕໍ່ໜ້າຈະໄດ້ປັບປຸງ ແລະ ແກ້ໄຂນິຕິກໍາທີ່ມີຢູ່ແລ້ວໃຫ້ຮັດກຸມ ແລະ ສອດຄ່ອງກັບການຜັນຂະຫຍາຍຕົວຕາມສະພາບເສດຖະກິດ-ສັງຄົມໃນປະຈຸບັນ,ຈະສືບຕໍ່ເອົາຂໍ້ກໍານົດ,ກົດລະບຽບ ແລະ ນິຕິກໍາຕ່າງໆ ລົງເຜີຍແຜ່ໃຫ້ອໍານາດການປົກຄອງບ້ານ,ພາກສ່ວນກ່ຽວຂ້ອງ ແລະ ຜູ້ປະກອບການທຸລະກິດໄດ້ຮັບຮູ້ ແລະ ເຊື່ອມຊຶມ,ເອົາໃຈໃສ່ຕິດຕາມ,ກວດກາ,ຊຸກຍູ້ເຈົ້າຂອງທຸລະກິດ ໃຫ້ມີການເຄື່ອຍໄຫວທີຖືກຕ້ອງ,ພ້ອມກັນນັ້ນກໍປະສານສົມທົບກັບພາກສ່ວນກ່ຽວຂ້ອງໃນການຕິດຕາມກວດກາ ບັນດາຜູ້ເຄື່ອນໄຫວລັກເປີດບໍລິການ ຫ້ອງຫຼີ້ນເກມຢອດຫຼຽນ ແລະ ເກມການພະນັນທີຜິດກົດໝາຍ,ຄຽງຄູ່ກັນນັ້ນກະຈະໄດ້ຄົ້ນຄ້ວາ,ຖອດຖອນບົດຮຽນກັບພາກສ່ວນຕ່າງໆ ພ້ອມທັງສະຫຼຸບລາຍງານຜົນການປະຕິບັດງານໃຫ້ຂັ້ນເທິງຊາບ ເພື່ອຂໍທິດຊີ້ນໍາຈາກຂັ້ນເທິງມາຈັດຕັ້ງປະຕິບັດເປັນແຕ່ລະໄລຍະ.


ຂ່າວ: ເພັດສາຄອນ ສິມມະວົງ/ມິເດຍລາວ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.