Header Ads

ແຂວງຄຳມ່ວນຕັ້ງເປົ້າຜະລິດເຂົ້າອິນຊີເພື່ອຂາຍໃຫ້ໄດ້ 3.000 ເຮັກຕາໃນລະດູແລ້ງນີ້



ແຂວງຄໍາມ່ວນ : ໃນລະດູການປູກເຂົ້ານາແຊງສົກ​ປີ 2017-2018 ​ທົ່ວແຂວງ​ຄໍາ​ມ່ວນ​ມີ​ເນື້ອ​ທີ່​ແຜນການ 9.500 ​ເຮັກຕາ, ​ເຊິ່ງຊາວ​ກະສິກອນ​ໄດ້​ເລີ້ມ​ລົງມືປັກດຳ​ເຂົ້ານາ​ແຊງ​ມາ​ແຕ່​ຕົ້ນ​​ເດືອນທັນວາເປັນຕົ້ນມາ ຮອດປະຈຸບັນປັກດຳໄດ້ 7.000 ກວ່າເຮັກຕາ, ຄາດຈະໃຫ້ສຳເລັດ 100% ໃນຕົ້ນເດືອນກຸມພານີ້.


ທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນກ່າວວ່າ: ປີນີ້ແຜນສູ້ຊົນປູກເຂົ້ານາແຊງ ຂອງຊາວກອນໃນທົ່ວແຂວງຄຳມ່ວນ 9.500 ເຮັກຕາ. ໃນນັ້ນຜະລິດເພື່ອຄ້ຳປະກັນສະບຽງອາຫານ 5.500 ເຮັກຕາ ແລະ ຜະລິດເປັນສິຄ້າ 4.000 ເຮັກຕາ ໃນການຜະລິດເປັນສິນຄ້ານີ້ໄດ້ແບ່ງອອກຜະລິດເຂົ້າອິນຊີເພື່ອຂາຍໃຫ້ບັນດາກຸ່ມໂຮງສີ 3.000 ເຮັກຕາ. ຄາດ​ຄະ​ເນ​​ສະມັດ​ຕະພາບ 5,72 ​ໂຕນຕໍ່ເຮັກຕາ ແລະ ຄາດຄະເນ​ຜົນ​ຜະລິດທັງໝົດ  54.350 ​ໂຕນ. ນອກນັ້ນຍັງມີການຜະລິດແນວພັນເຂົ້າເພື່ອສະໜອງໃຫ້ແກ່ນາປີໃນລະດູຝົນທີ່ຈະມາເຖິງ  ຈຳນວນ 60 ເຮັກຕາ. ຄາດຄະເນຜົນຜະລິດ 187 ໂຕ່ນ. ການຜະລິດພືດລະດູແລ້ງ 9.400 ເຮັກຕາ ໃນນີ້ປູກເປັນສິນຄ້າ 6.000 ເຮັກຕາ ແລະ ປູກເພື່ອຄໍ້າປະກັນສະບຽງອາຫານ 3.000 ກວ່າເຮັກຕາ ເຊິ່ງມາຮອດປະຈຸບັນປະຕິບັດໄດ້ 70% ຂອງແຜນການ, ເດັ່ນກວ່າໝູ່ໃນການປູກພືດແມ່ນ ຢາສູບ, ສາລີ ແລະ ໝາກແຕງ.


ທ່ານ ບຸນຈັນກ່າວຕື່ມວ່າ: ໂດຍລວມແລ້ວການຜະລິດເຂົ້າ ແລະ ພືດພາຍໃນແຂວງຄຳມ່ວນແມ່ນສາມາດຄໍ້າປະກັນ ໄດ້ໂດຍພື້ນຖານ ແລະ ມາຮອດປະຈຸບັນນີ້ແຂວງຄຳມ່ວນກໍ່ຍັງຢຶດໝັ້ນການຜະລິດເຂົ້າເພື່ອຄ້ຳປະກັນສະບຽງອາຫານ ແລະ ຜະລິດເປັນສິນຄ້າ ຕາມການໝອບໝາຍຂອງລັດຖະບານ. ພິເສດໄປກວ່ານັ້ນປະຊາຊົນ ກໍ່ຄືກຸ່ມການຜະລິດເຂົ້າພາຍໃນ ແຂວງຄຳມ່ວນຍັງໄດ້ຮັບຫຼຽນກາຂອງອາຊຽນ ແລະ ໂຮງສີທີ່ໄດ້ຮັບການຢັ້ງຢືນມາດຕະຖານຈາກສາກົນ ເຊິ່ງເປັນຫຼຽນກາ ແລະ ໂຮງສີແຫ່ງທຳອິດ ໃນ ສປປ ລາວ ທີ່ໄດ້ຮັບກຽດຕິຍົດດັ່ງກ່າວ.

ພາບ ແລະ ຂ່າວ: ຂ່າວແຂວງຄໍາມ່ວນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.