Header Ads

ທ່າແຕງ ເປີດການຮຽນ-ການສອນກົດໝາຍຊັ້ນຕົ້ນລຸ້ນທີ VIII



ໂດຍປະຕິບັດຄໍາສັ່ງຂອງນາຍົກລັດຖະມົນຕີ,ສະບັບເລກທີ 38/ນຍ, ລົງວັນທີ 17 ຕຸລາ 2007 ກ່ຽວກັບການເອົາໃຈໃສ່ໂຄສະນາເຜີຍແຜ່, ສຶກສາອົບຮົມ ສ້າງສິຕິເຄົາລົບກົດໝາຍ ຕໍ່ວຽກງານຍຸຕິທໍາຮາກຖານ ໃຫ້ຕິດພັນກັບການສ້າງຄອບຄົວ ແລະ ບ້ານປອດຄະດີ ດັ່ງນັ້ນ ການນໍາເມືອງ ທ່າແຕງ ພ້ອມພາກສ່ວນກ່ຽວຂ້ອງ ຈິ່ງໄດ້ເປີດການຮຽນ-ການສອນກົດໝາຍຊັ້ນຕົ້ນລຸ້ນທີ VIII ຂື້ນຢ່າງເປັນທາງການໃນຕອນເຊົ້າວັນທີ 5 ກຸມພາ 2018 ນີ້ ຢູ່ທີ່ ສະໂມສອນເມືອງ ທ່າແຕງ ແຂວງ ເຊກອງ ໂດຍເປັນກຽດເຂົ້າຮ່ວມຂອງທ່ານ ບຸນສວນ ບຸດບຸນມາ ຄະນະປະຈຳພັກເມືອງ ປະທານກວດກາພັກ-ລັດ ຜູ້ຊີ້ນໍາວຽກງານປົກປ້ອງກົດໝາຍຂັ້ນເມືອງ,ມີທ່ານ ຄຳບາງ ພະສະແຫວງ ຫົວໜ້າພະແນກຍຸຕິທໍາແຂວງເຊກອງ,ຫົວໜ້າ-ຮອງຫ້ອງການອ້ອມຂ້າງ,ອົງການປົກຄອງບ້ານ, ພ້ອມດ້ວຍນັກສໍາມະນາກອນເຂົ້າຮ່ວມ.






ທ່ານ ກິ ສາຍອຸດົມ ກໍາມະການພັກເມືອງ ຫົວໜ້າຫ້ອງການຍຸຕິທໍາເມືອງ ທ່າແຕງກ່າວວ່າ: ການຮຽນ-ການສອນກົດໝາຍຊັ້ນຕົ້ນລຸ້ນທີ VIII ນີ້ ມີສໍາມະນາກອນທີ່ມາຈາກຂະແໜງການອອ້ມຂ້າງເມືອງ ແລະ ອົງການຈັດຕັ້ງບ້ານ ອ້ອມຂ້າງເມືອງ ທ່າແຕງ ມີທັງໝົດ 51 ຄົນ, ຍິງ 15 ຄົນ ຈະໄດ້ໄດ້ຮຽນຮູ້ລະບຽບກົດໝາຍ,ນິຕິກໍາຕ່າງໆທີ່ຈໍາເປັນໃນການຈັດຕັ້ງປະຕິບັດໜ້າທີ່ວຽກງານ ແລະ ການເຄື່ອນໄຫວດໍາລົງຊີວິດປະຈໍາວັນເປັນຕົ້ນ: ໃນກຸ່ມວິຊາທິດສະດີການເມືອງ-ການປົກຄອງ,ກຸ່ມວິຊາກົດໝາຍ,ກຸ່ມວິຊາວຽກງານຍຸຕິທໍາຮາກຖານ,ກຸ່ມວິຊາເຕັກນິກການແຕ່ງເອກະສານ ນັບແຕ່ເຫຼັ້ມທີ 1-7 ລວມມີ 37 ວິຊາ ແລະ ກົດໝາຍອື່ນໆ ທີ່ກ່ຽວຂ້ອງຕາມຫຼັກສູດການຮຽນ-ການສອນ ກົດໝາຍຊັ້ນຕົ້ນໄລຍະ 3 ເດືອນ. 




ເພື່ອເຮັດໃຫ້ນັກສໍາມະນາກອນໄດ້ຮຽນຮູ້ການກໍານົດຫຼັກການ,ລະບຽບການ ແລະ ມາດຕະການ ກ່ຽວກັບການຄຸ້ມຄອງ,ກວດກາການສ້າງຄອບຄົວ,ບ້ານແບບຢ່າງທາງດ້ານກົດໝາຍ ໄດ້ຈັດຕັ້ງປະຕິບັດຢ່າງເປັນເອກະພາບ,ມີປະສິດທິຜົນ ແນໃສ່ສຶກສາອົບຮົມໃຫ້ສະມາຊິກພາຍໃນຄອບຄົວ ແລະ ປະຊາຊົນຮັບຮູ້ເຂົ້າໃຈລັດຖະທໍາມະນູນ,ກົດໝາຍຢ່າງຖືກຕ້ອງເລິກເຊິ່ງ,ສະກັດກັ້ນຕີຖ້ອຍທຸກປະກົດການຫຍໍ້ທໍ້ທີ່ລະເມີດກົດໝາຍ,ປະກອບສວ່ນຢ່າງຫ້າວຫັນໃນການພັດທະນາຄອບຄົວ,ບ້ານໃຫ້ເຂັ້ມແຂງ,ມີສະເໝີພາບ,ຍຸຕິທໍາ,ສ້າງຄວາມໝັ້ນຄົງໃຫ້ແກ່ລັດ ປະຊາທິປະໄຕ ປະຊາຊົນລາວ ທີ່ປົກຄອງດ້ວຍກົດໝາຍ.


ໂອກາດດຽວກັນນີ້ ທ່ານ ບຸນສວນ ບຸດບຸນມາ ຄະນະປະຈຳພັກເມືອງ ປະທານກວດກາພັກ - ລັດ ຜູ້ຊີ້ນໍຂົງເຂດປົກປ້ອງກົດໝາຍຂັ້ນເມືອງ ໄດ້ສະແດງຍ້ອງຍໍຊົມເຊີຍ ແລະ ຕີລາຄາສູງ ຕໍ່ການນໍາພັກ-ລັດ ແລະ ອົງການຈັດຕັ້ງທີ່ກ່ຽວຂ້ອງ ທີ່ໄດ້ເອົາໃຈໃສ່ຕໍ່ການຍົກລະດັບສະຕິຕື່ນຕົວ ທາງດ້ານກົດໝາຍໃຫ້ແກ່ບັນດາອົງການຈັດຕັ້ງ ແລະ ປະຊາຊົນຊັ້ນຄົນຕ່າງໆ ພ້ອມຫັນເອົາວຽກງານຍຸຕິທໍາຮາກຖານບ້ານ ກໍ່ຄືທຸກຂະແໜ່ງການຂອງຕົນ ໄດ້ໂຄສະນາກົດໝາຍຜ່ານສື່ວິທະຍຸຢ່າງເປັນປົກກະຕິ ນອກນີ້ ຍັງໄດ້ເນັ້ນຕື່ມຫຼາຍບັນຫາເປັນຕົ້ນແມ່ນໃຫ້ນັກສໍາມະນາກອນເອົາໃຈໃສ່ຄົ້ນຄ້ວາຮໍ່າຮຽນ ພ້ອມນຳເອົາເນື້ອໃນຈິດໃຈບົດຮຽນໄປຈັດຕັ້ງຜັນຂະຫຍາຍໃນວຽກງານຕົວຈິງທີ່ຕົນຮັບຜິດຊອບໃຫ້ໄດ້ຮັບຜົນສຳເລັດຢ່າງມີປະສິດທີ່ພາບສູງຕາມລະດັບຄາດໝາຍ. ທັງນີ້ ເພື່ອເຮັດໃຫ້ບັນດາບ້ານທົ່ວເມືອງ ທ່າແຕງ ມີສະຕິເຄົາລົບກົດໝາຍ ແລະ ໃຫ້ເປັນບ້ານແບບຢ່າງທາງດ້ານກົດໝາຍໃຫ້ນັບມື້ນັບເຂັ້ມແຂງຂື້ນກວ່າເກົ່າ.


ຂ່າວ: ພອນ ບຸນອຸທິດ (ຂ່າວເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.