Header Ads

ຄວາມຄືບໜ້າເຫດ​ຄາດ​ຕະກຳ​ແມ່ຍິງ​​ຢູ່​ເຂດ​ບ້ານ​ຕານ​ມີ​ໄຊ​​ແມ່ນ​ເພື່ອ​ຊິງ​ຊັບ



ອິງຕາມການລາຍງານຂອງນສພ ລາວພັດທະນາ  ວ່າ :  ເຈົ້າໜ້າທີ່ ​ປກສ ກຸ່ມ​ບ້ານ ​ແລະ ພົນລະ​ເມືອງ​ດີ ​ໄດ້​ຊ່ວຍ​ກັນ​ໄລ່​ຕິດຕາມ​ນຳ​ຈັບ​ຄົນ​ຮ້າຍ​ທີ່​ກໍ່​ເຫດຄາດຕະກໍາ​ຍິງ​ສາວ​ຄົນໜຶ່ງ​ເສຍ​ຊີວິດຢູ່​ເຮືອນ​ພັກ​ແຫ່ງໜຶ່ງ​ເຂດ​ບ້ານຕານ​ມີ​ໄຊ, ​ເມືອງ​ໄຊ​ທານີນະຄອນຫລວງ​ວຽງຈັນ ໃນ​ຄໍ່າຄືນ​ຂອງວັນ​ທີ 9 ກຸມພານີ້.





ເຈົ້າໜ້າທີ່​ ໃຫ້​ຮູ້​ວ່າ: ຜູ້ກໍ່​ເຫດ​ແມ່ນ​ທ້າວ ສິນ​ໄຊ ຢາງ ຢູ່​ບ້ານຖ້ຳດິນ​ເມືອງ ລ້ອງຊານ​ແຂວງ​ໄຊ​ສົມບູນ, ​ເຊິ່ງ​ໃນ​ມື້​ເກີດ​ເຫດຜູ້ກ່ຽວ​ໄດ້​ນັດ​ກັບນາງ ​​ແຈະ​ວື້ ອາຍຸ 50 ປີອາຊີບ​ຄ້າຂາຍຢູ່​ບ້ານດອນ​ທາດ​ເມືອງຕົ້ນ​ເຜີ້ງ​ແຂວງບໍ່​ແກ້ວ ທີ່​ພົວພັນ​ກັນ​ແບບ​ຊູ້​ສາວ ມາກິນ​ເຂົ້າ​ຢູ່ນະຄອນຫລວງ​ວຽງຈັນ ແລະ ​ໄດ້​ເຂົ້າ​ມາພັກຢູ່​ເຮືອນພັກ​ແຫ່ງໜຶ່ງ​ເຂດ​ບ້ານ​ຕານ​ມີ​ໄຊ,


ຊຶ່ງ​ໃນ​ຂະນະ​ກຳລັງ​ເປີດ​ຫ້ອງ​ນອນ​ຢູ່​ນັ້ນ, ທ້າວ ສິນ​ໄຊ ຢາງ ກໍ​ໄດ້​ໃຊ້​ເຊືອກທີ່​ຕິດ​ໂຕ​ມາ​​ແລ້ວ​ມັດ​ຄໍ​ນາງ ​ແຈະ​ວື້ ຈົນ​ເສຍ​ຊີວິດ​ ກ່ອນ​ທີ່​ທ້າວ ສິນ​ໄຊ ຢາງ ຈະ​ເອົາ​ຊັບ​ສິນ​ຄື: ສາຍ​ແຂນ, ສາຍ​ຄໍ​ຄຳ ​ແລະ ​ເງີ​ນຈຳນວນໜຶ່ງຫລົບໜີ ​ແລະ ​ໄດ້​ມີ​ພົນລະ​ເມືອງ​ດີ​ພົບ​ເຫັນ, ຈຶ່ງ​ແຈ້ງ​ອຳນາດ​ການ​ປົກຄອງ ​ແລະ ​ເຈົ້າໜ້າທີ່​ຕິດຕາມ​ນຳ​ຈັບ​ຕົວ​ມາ​ດຳ​ເນີນ​ຄະດີ​ໄດ້ຢູ່​​ໃນປ່າ​ເຂດ​ບ້ານດັ່ງກ່າວໃນເວລາຕໍ່ມາ.




ຈາກ​ການ​ສືບສວນ-ສອບ​ສວນ​ເບື້ອງຕົ້ນ ທ້າວ ສິນ​ໄຊ ຢາງ ​ໄດ້​ຮັບ​ສາລະພາບ​ວ່າ: ແມ່ນຕົນເອງໄດ້ລົງມື​ຄາດ​ຕະກຳນາງ ​ແຈະ​ວື້ ແທ້ ເພື່ອເອົາຊັບສີນ ແລະ ເງິນຄໍາດັ່ງກ່າວ​ໄປ​ໃຊ້ໜີ້. ປັດຈຸບັນ​ເຈົ້າໜ້າທີ່​ກຳລັງ​ເລັ່ງສືບສວນ-ສອບ​ສວນ ​ແລະ ດຳ​ເນີນ​ຄະດີ​ຕາມ​ລະບຽບກົດໝາຍ.

ທີ່ມາ: ນສພ ລາວພັດທະນາ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.