Header Ads

ມອບ-ຮັບໜ້າທີ່ລະຫວ່າງເລຂາພັກແຂວງ-ເຈົ້າແຂວງ ແຂວງຊຽງຂວາງ ຜູ້ເກົ່າ ແລະ ຜູ້ໃໝ່ຈັດຂື້ນໃນຕອນບ່າຍວັນທີ 15/02/2018



ພິທີມອບ-ຮັບ ໜ້າທີ່ລະຫວ່າງເລຂາພັກແຂວງ-ເຈົ້າແຂວງ ແຂວງຊຽງຂວາງ ຜູ້ເກົາ ແລະ ຜູ້ໃໝ່ ຈັດຂື້ນຢ່າງເປັນ ທາງການໃນຕອນບ່າຍວັນທີ 15/02/2018 ຢູ່ທີ່ຫ້ອງປະຊຸມ ຫ້ອງວ່າການປົກຄອງແຂວງຊຽງຂວາງ. ໂດຍການເປັນ ກຽດເຂົ້າຮ່ວມຂອງ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ. ມີເລຂາພັກແຂວງ, ຮອງເຈົ້າແຂວງ, ກຳມະການພັກແຂວງ, ຫົວໜ້າພະແນກ ການອ້ອມຂ້າງແຂວງ, ພະນັກງານຫຼັກແຫຼ່ງພາຍໃນແຂວງ, ພະນັກງານອາວຸດໂສບໍານານ ແລະ ນັກທຸລະກິດພາຍ ໃນແຂວງເຂົ້າຮ່ວມ. ໃນພິທີຜູ້ເຂົ້າຮ່ວມໄດ້ຮັບຟັງການຜ່ານນິຕິກຳຕ່າງໆເຊັ່ນ: ຄຳສັ່ງຂອງກົມການເມືອງສູນກາງພັກ ເລກທີ 02/ກມສພ ລົງວັນທີ່ 23 ມັງກອນ 2018 ວ່າດ້ວຍການຍົກຍ້າຍ ພະນັກງານການນຳຂັ້ນສູງໄປຮັບໜ້າທີ່ໃໝ່ຄຳສັ່ງຂອງນາຍົກ ລັດຖະມົນຕີ ເລກທີ 01/ນຍ ລົງວັນທີ 23 ມັງກອນ 2018 ວ່າດ້ວຍການຍົກຍ້າຍພະນັກງານການນຳໄປຮັບໜ້າທີ່ ໃໝ່ຢູ່ຫ້ອງວ່າການສູນກາງພັກ, ມະຕິຕົກລົງເລກທີ 035/ກມສພ ລົງວັນທີ 2 ກຸມພາ 2018 ວ່າດ້ວຍການແຕ່ງຕັ້ງ ຜູ້ຮັກສາການເລຂາພັກແຂວງ ແລະ ດຳລັດເລກທີ 06/ນຍ ລົງວັນທີ 5 ກຸມພາ 2018 ວ່າດ້ວຍແຕ່ງຕັ້ງຜູ້ຮັກສາການ ເຈົ້າແຂວງແຂວງຊຽງຂວາງ.




ທ່ານ ສົມກົດ ມັງໜໍ່ເມກ ກຳມະການສູນກາງພັກເລຂາພັກແຂວງ ເຈົ້າແຂວງແຂວງຊຽງຂວາງ ຜູ້ເກົ່າ ໄດ້ລາຍງານການຊີ້ນຳ ນຳພາວຽກງານໄລຍະຜ່ານມາເຖິງປັດຈຸບັນ ພ້ອມທັງກ່າວມອບໜ້າທີ່ ເລຂາພັກແຂວງ ເຈົ້າແຂວງແຂວງຊຽງຂວາງ ແລະ ທ່ານ ບຸນຕົ້ນ ຈັນທະພອນ ຮອງເລຂາພັກແຂວງ ປະທານສະພາປະຊາຊົນແຂວງ ເປັນຮັກສາການເລຂາພັກແຂວງເຈົ້າແຂວງຜູ້ໃໝ່ພ້ອມເຊັນບົດບັນທຶກ ມອບ-ຮັບ ໜ້າທີ່ຢ່າງເປັນທາງການ ຕອນທ້າຍ ພິທີ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກຄະນະເລຂາທິການສູນກາງພັກ ຫົວໜ້າຄະນະຈັດຕັ້ງ ສູນກາງພັກ ໄດ້ໃຫ້ກຽດໂອ້ລົມ ແລະ ເນັ້ນໜັກໃຫ້ການນຳຂັ້ນແຂວງເອົາໃຈໃສ່ວຽກງານສືກສາອົມຮົມການເມືອງແນວ ຄິດຕໍ່ພະນັກງານສະມາຊິກພັກ ແລະ ປະຊາຊົນບັນດາເຜົ່າ ໃຫ້ມີທັດສະນະການເມືອງໜັກແໜ້ນມີຄວາມສາມັກຄີ ເປັນປືກແຜ່ນ, ມີຄວາມເປັນເອກະພາບ, ມີຫຼັກການການນຳພາຂອງພັກ ສືບຕໍ່ຍົກສູງ ການນຳພາຂອງພັກໃນແຕ່ລະຂົງ ເຂດວຽກງານ, ເພີ່ມທະວີຕິດຕາມກວດກາ ການຄຸ້ມຄອງຄະນະພັກທຸກຂັ້ນເປັນແບບຢ່າງດຳລົງຊີວິດ, ມີຄວາມຊື່ສັດບໍລິສຸດ, ເຮັດແທ້ທຳຈິງ ແລະ ສືບຕໍ່ປົກປັກຮັກສາຄວາມສາມັກຄີພາຍໃນຄະນະພັກໃຫ້ມີຄວາມ ເຂັ້ມແຂງຂື້ນເລື່ອຍໆ.



ຈາກນັ້ນ ທ່ານ ບຸນຕົ້ນ ຈັນທະພອນ ຮັກສາການເລຂາພັກແຂວງ ເຈົ້າແຂວງ ແຂວງຊຽງຂວາງຜູ້ໃໝ່ ຂື້ນກ່າວຮັບໜ້າທີ່ ພ້ອມທັງໃຫ້ຄຳໝັ້ນສັນຍາວ່າຈະສືບຕໍ່ປະ ຕິບັດໜ້າທີ່ທີ່ໄດ້ຮັບມອບໝາຍ ໃຫ້ປະສົບຜົນສຳເລັດ.


ຂ່າວ ແລະ ພາບ: ພະແນກທວທແຂວງຊຽງຂວາງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.