Header Ads

ຂົວມິດຕະພາບລາວ-ຍີ່ປຸ່ນແຂວງເຊກອງ ຈະຊ່ວຍປະກອບສ່ວນເຂົ້າໃນການບັນລຸເປົ້າໝາຍຂອງລັດຖະບານລາວໃນການຫຼຸດຜ່ອນຄວາມທຸກຍາກ




ແຂວງເຊກອງ : ຕໍ່ກັບພິທີເປີດຂົວມິດຕະພາບລາວ-ຍີ່ປຸ່ນແຂວງເຊກອງ ເມື່ອວັນທີ 12 ກຸມພາ 2018 ຜ່ານມາ ທ່ານ ແພງ ດວງເງິນ ຫົວໜ້າກົມຂົວທາງ ກະຊວງ ຍທຂ ໄດ້ລາຍ ໂດຍຫຍໍ້ກ່ຽວກັບຂໍ້ມູນການຈັດຕັ້ງປະຕິບັດໂຄງການກໍ່ສ້າງຂົວມິດຕະພາບລາວ-ຍີ່ປຸ່ນແຂວງເຊກອງວ່າ: ໂຄງການດັ່ງກ່າວເປັນໂຄງການບູລິມະສິດຂອງລັດຖະບານ ເຊິ່ງນອນຢູ່ໃນເສັ້ນທາງຫຼວງແຫ່ງຊາດເລກທີ 16B ໂດຍມີຈຸດເລີ່ມຕົ້ນຈາກເທສະບານແຂວງເຊກອງ ຫາ ເມືອງດາກຈຶງ ຊາຍແດນລາວຫວຽດນາມ ມີຄວາມຍາວ 116 ກມ ຂົວມິດຕະພາບລາວ-ຍີ່ປຸ່ນ ແຂວງເຊກອງ ແຫ່ງນີ້ ຖືໄດ້ວ່າເປັນສັນຍາລັກອີກອັນໜຶ່ງທີ່ສະແດງເຖິງມິດຕະພາບອັນດີງາມລະຫວ່າງລັດຖະບານກໍຄືປະຊາຊົນຂອງສອງປະເທດ. 


ຂົວຂ້າມເຊກອງມີຄວາມຍາວ 300 ແມັດ, ຊຶ່ງໄດ້ຮັບການອອກແບບການກໍ່ສ້າງຕາມມາດຕະຖານເຕັກນິກຂອງສາກົນ ເປັນຂົວເບຕົງເສີມເຫຼັກອັດແຮງແບບປະສົມລະຫວ່າງສາຍກາບຖ່ວງດຶງ ແລະຂາງແບບຮູບກັບ 4 ຫຼ່ຽມ ສາມາດຮັບນໍ້າໜັກໄດ້ 80 ໂຕນ, ມີເສົາກາງນໍ້າ ແລະເສົາຫົວຂົວ 2 ເສົາ ເປັນລະບົບຮາກຖານຈໍານວນໜຶ່ງຕອກດ້ວຍເສົາເຂັມ 17 ຕົ້ນ 4 ຊ່ວງ, ຊ່ວງກາງນໍ້າທີ່ກວ້າງສຸດ 110 ແມັດ, ໜ້າຂົວ 11 ແມັດ, ໜ້າທາງລົດແລ່ນ 8 ແມັດ, ທາງຍ່າງເບື້ອງລະ 1,5 ແມັດ, ໜ້າຂົວປູດ້ວຍຢາງຂົ້ວ ໜາ 80 ຊັງຕີແມັດ, ມີທາງເຂົ້າຂົວ 2 ເບື້ອງ, ລວງຍາວຂອງຂົວທັງໝົດ 527 ແມັດ, ກວ້າງ 10 ແມັດ, ປູດ້ວຍຢາງຂົ້ວ ໜາ 10 ຊັງຕີແມັດ, ມີລະບົບໄຟເຍືອງທາງ ແລະຂົວ ເພື່ອຮັບປະກັນຄວາມປອດໄພໃນເວລາສັນຈອນເວລາກາງຄືນອີກດ້ວຍ. ໃນນີ້, ລວມມູນຄ່າຂອງການກໍ່ສ້າງທັງໝົດປະມານ 159,7 ຕື້ກີບ ໂດຍແມ່ນ ບໍລິສັດໄຕເຊະ ( Taisei Corporation) ຈາກປະເທດຍີ່ປຸ່ນເປັນຜູ້ຮັບເໜົມກໍ່ສ້າງ ເຊິ່ງໄລຍະເວລາການກໍ່ສ້າງຕາມສັນຍາເບື້ອງຕົ້ນແມ່ນ 29 ເດືອນ ແຕ່ເນື່ອງຈາກວ່າມີບັນຫາທາງດ້ານເຕັກນິກ ໂຄງການຈິ່ງແກ່ຍາວເວລາອອກໄປຕື່ມອີກ 10 ເດືອນ ລວມເວລາການກໍ່ສ້າງຕົວຈິງ 39 ເດືອນ ຈິ່ງສໍາເລັດ.



ໂຄງການດັ່ງກ່າວໄດ້ຮັບການສ້າງຕັ້ງຂຶ້ນ ແລະຈັດຕັ້ງປະຕິບັດສໍາເລັດລົງໄດ້ກໍຍ້ອນສູນກາງພັກ ແລະລັດຖະບານໄດ້ມີຄວາມເປັນຫ່ວງເປັນໄຍ, ເຫັນໄດ້ຄວາມສໍາຄັນຂອງໂຄງການດັ່ງກ່າວ, ຊີ້ນໍາ, ກະຊວງ, ອົງການຈັດຕັ້ງ ແລະອໍານາດການປົກຄອງທ້ອງຖິ່ນທີ່ກ່ຽວຂ້ອງດໍາເນີນການ, ຍາດແຍ່ງຂົນຂວາຍແຫຼ່ງທຶນມາກໍ່ສ້າງໂຄງການດັ່ງກ່າວ, ອີກອັນໜຶ່ງກໍຍ້ອນໄດ້ຮັບການສະໜັບສະໜູນ ແລະຊ່ວຍເຫຼືອດ້ານການເງິນຈາກອົງການຕົວແທນຮ່ວມມືສາກົນແຫ່ງປະເທດຍີ່ປຸ່ນ ຫຼື JICA ຊຶ່ງເປັນຕົວແທນໃຫ້ແກ່ລັດຖະບານ ແລະປະຊາຊົນຍີ່ປຸ່ນ ແລະຍ້ອນການສະໜັບສະໜູນ ແລະການຮ່ວມມືຈາກອໍານາດການປົກຄອງ, ພະແນກການ, ອົງການຈັດຕັ້ງທຸກຂັ້ນ ຕະຫຼອດຮອດພໍ່ແມ່ປະຊາຊົນຢູ່ທ້ອງຖິ່ນ ກໍຄືແຂວງເຊກອງ ຈຶ່ງເຮັດໃຫ້ໂຄງການດັ່ງກ່າວໄດ້ດໍາເນີນ ແລະສໍາເລັດລົງຢ່າງຈົບງາມ ແລະພ້ອມເປີດການນໍາໃຊ້ຢ່າງເປັນທາງການ ໃນຕອນເຊົ້າວັນທີ 12 ກຸມພາ 2018 ຜ່ານມານີ້.



ຂົວແຫ່ງນີ້ຈະກາຍເປັນເສັ້ນທາງຄົມມະນາຄົມອັນສະດວກລະຫວ່າງສອງຟາກຂອງແມ່ນໍ້າເຊກອງ ເວົ້າສະເພາະກໍແມ່ນລະຫວ່າງເມືອງລະມາມ, ເມືອງກະລຶມ ແລະເມືອງດາກຈຶງ ກໍຄືປະຊາຊົນ ແລະຊຸມຊົນໃນຂົງເຂດດັ່ງກ່າວສາມາດເຂົ້າເຖິງຕະຫຼາດ ແລະການບໍລິການດ້ານສັງຄົມທີ່ດີຂຶ້ນເປັນຕົ້ນແມ່ນການສຶກສາ ແລະສາທາລະນະສຸກ ທັງຈະຊ່ວຍປະກອບສ່ວນເຂົ້າໃນການບັນລຸເປົ້າໝາຍຂອງລັດຖະບານລາວໃນການຫຼຸດຜ່ອນຄວາມທຸກຍາກໃນຂົງເຂດດັ່ງກ່າວນໍາອີກ, ອີກດ້ານໜຶ່ງການເຊື່ອມຈອດກັບພາກພື້ນ ຂົວເຊກອງຈະກາຍເປັນສ່ວນໜຶ່ງທີ່ສໍາຄັນໃນການເຂົ້າຫາທ່າເຮືອດາໜັງ ສສ ຫວຽດນາມ ໃນອະນາຄົດ.


ຂ່າວ: ນາລີວັນ  (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.