Header Ads

ນັກທຸລະກິດຈີນສະເໜີແກ້ໄຂບັນຫາວີຊາຂອງນັກທຸລະກິດຈີນທີ່ມາເຮັດທຸລະກິດຢູ່ ສປປ ລາວ



ຕົວແທນຈາກຫົວໜ່ວຍທຸລະກິດ ແລະ ພາກລັດ ລາວ-ຈີນໄດ້ພົບປະກັນໃນກອງປະຊຸມພາຍໃຕ້ຫົວຂໍ້ “ຊຸກຍູ້ການຮ່ວມມືດ້ານການເງິນ ຮ່ວມສ້າງສາຍສຳພັນເສດຖະກິດລາວ-ຈີນ” ໃນວັນທີ 3 ກຸມພາ ໃນລະຫວ່າງການເຂົ້າຮ່ວມກອງປະຊຸມເວທີປຶກສາຫາລືການຮ່ວມມືລາວ-ຈີນຂອບໜຶ່ງແລວໜຶ່ງເສັ້ນທາງ (ກຸມພາ 2-3) ທີ່ນະຄອນຫຼວງວຽງຈັນ ບັນດານັກທຸລະກິດລາວ-ຈີນ ໂດຍໄດ້ມີການຫາລືຫຼາຍບັນຫາກ່ຽວກັບສະພາບການລົງທຶນ ໃນລາວ ໃນນັ້ນມີການສະເໜີແກ້ໄຂບັນຫາວີຊາ, ບັນຫາລາຄາຢາງພາລາຕົກຕໍ່າ ແລະ ບັນຫາຄວາມຫຍຸ້ງຍາກໃນການເຂົ້າເຖິງແຫຼ່ງທຶນຂອງນັກລົງທຶນ ຫຼື ຫົວໜ່ວຍທຸລະກິດ ແລະ ບັນຫາອື່ນໆ. 



ບັນດານັກທຸລະກິດທີ່ເຂົ້າຮ່ວມກອງປະຊຸມສະເໜີວ່າ ລັດຖະບານຄວນຫາວິທີແກ້ໄຂເລື່ອງວີຊານັກທຸລະກິດຈີນ ເປັນຕົ້ນດ້ວຍການອອກວີຊາທີ່ມີຂັ້ນຕອນສະດວກສະບາຍ ແລະ ມີອາຍຸຍາວນານກວ່າເກົ່າ ເພາະເຫັນວ່າຂັ້ນຕອນການຂໍວີຊາໃນປະຈຸບັນແມ່ນຍັງຫຍຸ້ງຍາກ, ສະເໜີໃຫ້ມີການແກ້ໄຂການເຂົ້າເຖິງແຫຼ່ງທຶນສຳລັບນັກລົງທຶນ ກໍຄື ຫົວໜ່ວຍທຸລະກິດ ແລະ ສ້າງຕັ້ງບໍລິສັດຫຼືໜ່ວຍງານຮັບປະກັນການປອ່ຍເງິນກູ້ເໝືອນດັ່ງຢູ່ປະເທດຈີນເພື່ອສ້າງຄວາມເຊື່ອໝັ້ນໃຫ້ກັບນັກລົງທຶນໃນເວລາຂໍເງິນກູ້ຈາກທະນາຄານ. ນອກນີ້ຜູ້ເຂົ້າຮ່ວມກໍສະເໜີໃຫ້ມີການລົງທຶນໃຫ້ຫຼາຍຂຶ້ນໃນການສ້າງພື້ນຖານໂຄງລ່າງເຊັ່ນໂຮງແຮມ, ອາພາດ ແລະ ອະສັງຫາລິມະຊັບອື່ນໆເພື່ອຮອງຮັບຈຳນວນນັກທ່ອງທ່ຽວຈາກຈີນທີ່ປະຈຸບັນມີຈຳນວນເພີ່ມຂຶ້ນ.


ໃນບັນຫາກ່ຽວກັບຢາພາລາ ບັນດາຜູ້ເຂົ້າຮ່ວມໄດ້ມີທັດສະນະວ່າ ຕະຫຼາດຮອງຮັບຢູ່ຈີນກໍມີແລ້ວ ແຕ່ຜູ້ຜະລິດຕ້ອງເອົາໃຈໃສ່ເລື່ອງການສ້າງຕັ້ງໂຮງງານປຸງແຕ່ງຢາງພາລາ ແລະ ຍົກລະດັບເຕັກນິກການຜະລິດເພື່ອສ້າງມູນຄ່າເພີ່ມໃຫ້ຜົນຜະລິດ. 


ທ່ານ ບູລະພາ ສັນຕິຄົງຄາ ປະທານສະພາການຄ້າຈີນຕ່າງດ້າວປະຈຳລາວໃຫ້ຮູ້ວ່າ ຜູ້ເຂົ້າຮ່ວມກອງປະຊຸມຍັງໄດ້ມີການສະເໜີຄວາມເປັນໄປໄດ້ໃນການອະນຸຍາດໃຫ້ນັກລົງທຶນຕ່າງປະເທດຊື້ອະສັງຫາລິມະຊັບເພື່ອໃຫ້ເຂົາເຈົ້າເປັນເຈົ້າຂອງກຳມະສິດ ເຊິ່ງຕໍ່ກັບບັນຫາດັ່ງກ່າວ ຝ່າຍລາວກຳລັງຄົ້ນຄວ້າຢູ່. 


ທ່ານບູລະພາກ່າວຕື່ມອີກວ່າ ກອງປະຊຸມຂອງນັກທຸລະກິດລາວ-ຈີນໃນຄັ້ງນີ້ແມ່ນເປັນກອງປະຊຸມເລີ່ມຕົ້ນ ຫຼາຍຄົນສະເໜີວ່າເປັນກອງປະຊຸມທີ່ດີຫຼາຍ ແລະ ຄວນຈັດເປັນປະຈຳ ເປັນຕົ້ນເປັນການພົບປະກັນລະຫວ່າງ ລັດຖະບານ ແລະ ນັກທຸລະກິດ ເພື່ອປຶກສາຫາລື ແລະ ແລກປ່ຽນບັນຫາຮ່ວມກັນ.


ພາບ ແລະ ຂ່າວ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.