Header Ads

ນາຍົກລັດຖະມົນຕີ ລາວ ແລະ ຫວຽດນາມ ເຂົ້າຮ່ວມພິທີມອບ-ຮັບສູນຝຶກອົບຮົມວິທະຍາສາດ ແລະ ເຕັກໂນໂລຊີ




ໃນຕອນບ່າຍ ຂອງວັນທີ 4 ກຸມພາ 2018 ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫງວຽນ ຊວນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ໃຫ້ກຽດເຂົ້າຮ່ວມພິທີມອບ-ຮັບ ໂຄງການກໍ່ສ້າງສູນຝຶກອົບຮົມພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີ ທີ່ບ້ານດອນຕິ້ວ, ເມືອງໄຊທານີ, ນະຄອນຫຼວງວຽງຈັນ  ໂດຍມີການນຳຂັ້ນສູງ ແລະ ຜູ້ຕາງໜ້າຂະແໜງການທີ່ກ່ຽວຂ້ອງ ຂອງລາວ ແລະ ຫວຽດນາມ ເຂົ້າຮ່ວມ.



ໃນໂອກາດຂຶ້ນກ່າວມອບໂຄງການ, ທ່ານ ຈູ ຫງອກ ແອັງ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ ໄດ້ໃຫ້ຮູ້ວ່າ: ໂຄງການດັ່ງກ່າວ ໄດ້ເລີ່ມລົງມືກໍ່ສ້າງ ໃນເດືອນກັນຍາ 2015 ແລະ ສຳເລັດໃນເດືອນທັນວາ 2017 ມີມູນຄ່າທັງໝົດ 98 ກວ່າຕື້ດົງ (ສະກູນເງິນຫວຽດນາມ) ໂດຍການຊ່ວຍເຫຼືອດ້ານງົບປະມານ ຂອງລັດຖະ ບານ ຫວຽດນາມ ຈຳນວນ 89 ກວ່າຕື້ດົງ ແລະ ງົບປະມານສົມທົບຂອງລັດຖະບານລາວ ປະມານ 9 ຕື້ດົງ, ສາມາດຮອງຮັບການຄົ້ນຄວ້າສິດສອນ ແລະ ຝຶກອົບຮົມ ໃຫ້ແກ່ພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີ ປະມານ 600-800 ເທື່ອຄົນ/ປີ ແລະ ມີສະຖານທີ່ເຮັດວຽກໃຫ້ແກ່ພະນັກງານ, ຄູອາຈານ ແລະ ນັກຄົ້ນຄວ້າ ໄດ້ປະມານ 70 ຄົນ.





ໃນໂອກາດດຽວກັນ, ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ ໄດ້ຂຶ້ນມີຄຳເຫັນກ່າວຮັບ ໂດຍໄດ້ກ່າວບາງຕອນວ່າ: ໂດຍຄຳນຶງເຫັນຂະແໜງວິທະຍາສາດ ແລະ ເຕັກໂນໂລຊີ ຂອງລາວ ຍັງໜຸ່ມນ້ອຍ, ພະນັກງານຍັງຂາດເຂີນທາງດ້ານປະລິມານ ແລະ ຄຸນນະພາບ, ພື້ນຖານໂຄງລ່າງ ທາງດ້ານວັດຖຸເຕັກນິກ ຍັງຈຳກັດ. ສະນັ້ນ, ເພື່ອນສະຫາຍຫວຽດນາມ ໄດ້ເອົາໃຈໃສ່ຊ່ວຍເຫຼືອຂະແໜງວິທະຍາສາດ ແລະ ເຕັກໂນໂລຊີ ຂອງລາວ ດ້ວຍຄວາມຈົດຈໍ່, ຕັ້ງໜ້າ ແລະ ຈິງໃຈ ຕາມຄຳສອນ ຂອງປະທານໂຮ່ຈິມິນ ຜູ້ນຳທີ່ຍິ່ງໃຫຍ່ ວ່າ: “ຊ່ວຍເພື່ອນ ຄືຊ່ວຍຕົນເອງ” ແລະ “ເພື່ອປະໂຫຍດ 10 ປີ ຈະຕ້ອງປູກຕົ້ນໄມ້, ເພື່ອປະໂຫຍດ 100 ປີ ຈະຕ້ອງສ້າງຄົນ”. ພ້ອມດຽວກັນນັ້ນ, ທ່ານ ບໍ່ວຽງຄຳ ວົງດາລາ ຍັງໄດ້ໃຫ້ຄຳໝັ້ນສັນຍາວ່າ: ຈະເອົາໃຈໃສ່ຄຸ້ມຄອງ, ປົກປັກຮັກສາ ແລະ ເສີມຂະຫຍາຍປະສິດທິຜົນ ຂອງສູນຝຶກອົບຮົມແຫ່ງນີ້ ຕາມຈຸດປະສົງທີ່ໄດ້ກຳນົດໄວ້, ປະກອບສ່ວນເຂົ້າໃນການຍົກສູງຄຸນນະພາບ ຂອງຖັນແຖວພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີ, ເຮັດໃຫ້ການຄົ້ນຄວ້າວິທະຍາສາດ ແລະ ການພັດທະນາເຕັກໂນໂລຊີ ຂອງ ສປປ ລາວ ຂະຫຍາຍຕົວຢ່າງບໍ່ຢຸດຢັ້ງ.

ໃນຕອນທ້າຍ, ທັງສອງທ່ານນາຍົກລັດຖະມົນຕີ ພ້ອມດ້ວຍ ການນຳຂັ້ນສູງຂອງສອງປະເທດ ກໍ່ໄດ້ໃຫ້ກຽດ ຕັດແຖບຜ້າ ເພື່ອເປີດນຳໃຊ້ສູນຝຶກອົບຮົມດັ່ງກ່າວ ຢ່າງເປັນທາງການ. ພ້ອມກັນນັ້ນ, ກໍ່ຍັງໄດ້ປູກຕົ້ນໄມ້ຮ່ວມກັນ ເພື່ອເປັນທີ່ລະນຶກ ຕື່ມອີກ.

​ພາຍຫຼັງສຳເລັດພິທີມອບ-ຮັບ ແລະ ເປີດນຳໃຊ້ສູນຝຶກອົບຮົມວິທະຍາສາດ ແລະ ເຕັກໂນໂລຊີແລ້ວ, ທັງສອງທ່ານນາຍົກລັດຖະມົນຕີ ລາວ ແລະ ຫວຽດນາມ ຍັງໄດ້ໃຫ້ກຽດເຂົ້າຮ່ວມ ພິທີເປີດການນຳໃຊ້ອາຄານສຳນັກງານໃຫຍ່ ບໍລິສັດ ສະຕາໂທລະຄົມ (ຢູນີເທວ) ທີ່ບ້ານໂພນໄຊ, ເມືອງໄຊເສດຖາ, ນະຄອນຫຼວງວຽງຈັນ ຕື່ມອີກ.


ແຫລ່ງ: ຫ້ອງວ່າການສຳນັກງານນາຍົກລັດຖະມົນ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.