Header Ads

ເຊກອງ ສະຫຼຸບຄືນວຽກງານຈັດຕັ້ງປະຈໍາປີ 2017





ໃນຕອນເຊົ້າວັນທີ 15 ກຸມພາ ນີ້ ຄະນະຈັດຕັ້ງແຂວງເຊກອງ ໄດ້ຈັດກອງປະຊຸມສະຫຼຸບຄືນການເຄື່ອນໄຫວວຽກງານຈັດຕັ້ງປະຈໍາປີ 2017 ຢູ່ທີ່ສະໂມສອນຂອງແຂວງ ໂດຍການເປັນປະທານ ຂອງສະຫາຍ ອ້ວນຄຳ ທຸງໄຊ ກຳມະການພັກແຂວງ,ຫົວໜ້າຄະນະຈັດຕັ້ງແຂວງ, ມີຄະນະປະຈຳພັກເມືອງ ຜູ້ຊີ້ນໍາວຽກງານພັກ-ພະນັກງານ,ມີຕາງໜ້າຄະນະພັກຮາກຖານ,ຄະນະໜ່ວຍພັກຮາກຖານ,ອົງການທຽບເທົ່າ,ລັດວິສາຫະກິດ,ສອງກຳລັງປະກອບອາວຸດ ແລະ ຄະນະຈັດຕັ້ງ 4 ຕົວເມືອງ ພ້ອມດ້ວຍຜູ້ເຮັດວຽກງານຈັດຕັ້ງຈາກພາກສ່ວນດັ່ງກ່າວເຂົ້າຮ່ວມ,ກອງປະຊຸມຈະໄດ້ດຳເນີນເປັນເວລາ 2 ວັນ(15-15/2/2018) ຈຶ່ງຈະສຳເລັດ.



ສະຫາຍ ແກ້ວມະນີ ແກ້ວບຸນຮັກ ຮອງຫົວໜ້າຄະນະຈັດຕັ້ງແຂວງເຊກອງ ໄດ້ຕີລາຄາຄືນສະພາບການຈັດຕັ້ງປະຕິບັດມະຕິກອງປະຊຸມວຽກງານຈັດຕັ້ງທົ່ວແຂວງ ປະຈໍາປີ 2017 ແລະ ວາງທິດທາງປີ 2018 ເຊິ່ງໃຫ້ຮູ້ວ່າ: ໃນໄລຍະຜ່ານມາຄະນະພັກ,ຄະນະນຳແຕ່ລະຂັ້ນ ໄດ້ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ແນວຄິດໄດ້ດີກວ່າເກົ່າ ເປັນຕົ້ນໄດ້ຈັດຕັ້ງເຊື່ອມຊຶມບັນດາມະຕິຕ່າງໆຂອງກົມການເມືອງສູນກາງພັກສະໄໝທີ X,ມະຕິວ່າດ້ວຍເດັດດ່ຽວຕ້ານພະຍາດອາດຍາສິດ ແລະຕ້ານການສໍ້ລາດບັງຫຼວງ ແລະເອກກະສານເດັດດ່ຽວປັບປຸງປົວແປງໃຫ້ປອດໃສເຂັ້ມແຂງ,ໜັກແໜ້ນ ເຮັດໃຫ້ສະມາຊິກພັກ-ພະນັກງານມີທ່າປ່ຽນແປງດີຂຶ້ນ,ມີຄວາມເຊື່ອໝັ້ນຕໍ່ແນວທາງນະໂຍບາຍ ແລະການຊີ້ນຳ-ນຳພາຂອງພັກ,ການຄຸ້ມຄອງຂອງລັດສູງຂຶ້ນກວ່າເກົ່າ; ດ້ານການຈັດຕັ້ງພັກ ສືບຕໍ່ໄດ້ຮັບການປັບປຸງ ແລະຂະຫຍາຍຕົວຢ່າງຕໍ່ເນື່ອງ ເຮັດໃຫ້ການຈັດຕັ້ງພັກ ແລະຖັນແຖວສະມາຊິກເພີ່ມຂຶ້ນ,ທຽບໃສ່ປີ 2016 ຈຳນວນຮາກຖານພັກເພີ່ມຂຶ້ນ 8 ຮາກຖານ,ດ້ານຂະບວນການກໍ່ສ້າງໜ່ວຍເຂັ້ມແຂງ-ຮູ້ນຳພາຮອບດ້ານ ຕິດພັນກັບຂະບວນການຈັດຕັ້ງປະຕິບັດວຽກງານ 3 ສ້າງກໍໄດ້ສືບຕໍ່ຈັດຕັ້ງປະຕິບັດ,ມີຫຼາຍໜ່ວຍພັກ ໄດ້ຖືກຮັບຮອງເປັນໜ່ວຍເຂັ້ມແຂງ-ຮູ້ນຳພາຮອບດ້ານທັງໝົດ 234 ໜ່ວຍ,ດ້ານການຂະັຍາຍພັກ ຫຼາຍບ່ອນໄດ້ຮັບການປັບປຸງດີຂຶ້ນ ເຮັດໃຫ້ການຂະຫຍາຍພັກມີຄຸນນະພາບດີຂຶ້ນ,ປະຈຸບັນທົ່ວແຂວງມີສະມາຊິກພັກທັງໝົດ 8.360 ສະຫາຍ,ຍິງ 1.870 ສະຫາຍ,ທຽບໃສ່ປີ 2016 ເພີ່ມຂຶ້ນ 892 ສະຫາຍ,ຍິງ 329 ສະຫາຍ,ໃນນີ້ສະມາຊິກພັກສຳຮອງ, 1.017 ສະຫາຍ,ຍິງ 357 ສະຫາຍ; ໄດ້ອອກບັດ-ມອບໃຫ້ສະມາຊິກພັກສົມບູນ ທັງໝົດ 4.283 ສະຫາຍ; ນອກນີ້ໄດ້ປະເມີນຄືນການສ້າງແຜນກໍານົດພະນັກງານນຳພາ-ຄຸ້ມຄອງໃນໄລຍະຜ່ານມາ ແລະ ສຳເລັດການຂຶ້ນແຜນກໍານົດພະນັກງານນຳພາ-ຄຸ້ມຄອງຢູ່ 28 ພາກສ່ວນຂອງແຂວງ ແລະ ບັນດາຫ້ອງການ 4 ຕົວເມືອງ.



ນອກນີ້ ໃນ1ປີຜ່ານມາ ໄດ້ຄົ້ນຄວ້າປະຕິບັດນະໂຍບາຍໃຫ້ພະນັກງານຫ-ລັດຖະກອນອອກພັກການ-ຮັບເງິນອຸດໜູນເທື່ອດຽວຈຳນວນ 47 ສະຫາຍ ແລະຮັບເບ້ຍບຳນານ 15 ສະຫາຍ,ປະຕິບັດເງິນສົມທົບປຸກສ້າງ ແລະນະໂຍບາຍເງິນກຸ້ຢືມປຸສ້າງສ້ອມແປງທີ່ຢູ່ອາໃສໃຫ້ພະນັກງານທັງໝົດ 7 ສະຫາຍ,ນະໂຍບາຍຕໍ່ຄອບຄົວທີ່ເສຍສະຫຼະປາງສົງຄາມ 37 ສະຫາຍ ແລະນະໂຍບາຍອື່ນໆອີກຈໍານວນໜຶ່ງ; ວຽກງານປັບປຸງກົງຈັກການຈັດຕັ້ງ ໄດ້ຄົ້ນຄວ້າສ້າງຕັ້ງບັນດາຂະແໜງການທີ່ຂຶ້ນກັບບັນດາຫ້ອງການຂອງພັກ,ສ່ວນກົງຈັກການຈັດຕັ້ງຂັ້ນເມືອງຍັງຮັກສາຄືເກົ່າ,ແຕ່ໄດ້ສຸມໃສ່ພາລະບົດບາດຂອງພະແນກການຂັ້ນແຂວງ ແລະ ຫ້ອງການຂັ້ນເມືອງຄືນໃໝ່ຈຳນວນໜຶ່ງໃຫ້ມີຄວາມສອດຄ່ອງ,ແທດເໝາະ,ຮັດກຸມກວ່າເກົ່າ.



ສະຫາຍ ແກ້ວມະນີ ແກ້ວບຸນຮັກ ໃຫ້ຮູ້ຕື່ມວ່າ: ແຜນການປີ 2018 ຄະນະພັກແຕ່ລະຂັ້ນ ສືບຕໍ່ເອົາໃຈໃສ່ຕໍ່ການສຶກສາອົບຮົມການເມືອງ-ນຳພາແນວຄິດ ໃຫ້ແກ່ພັກ-ພະນັກງານ ແລະ ປະຊາຊົນດ້ວຍຫຼາຍຮູບການ ແທດເຖິງເປົ້າໝາຍ ລວມທັງນຳເອົາແນວທາງນະໂຍບາຍຂອງພັກ-ລັດໃນດ້ານຕ່າງໆລົງສູ່ຮາກຖານຕົວຈິງ,ເອົາໃຈໃສ່ຂະຫຍາຍພັກໃຫ້ຮັບປະກັນໄດ້ທາງດ້ານປະລິມານ ແລະຄຸນນະພາບ,ສືບຕໍ່ສົມທົບກັບບັນດາເມືອງໃນການສ້າງແຜນພະນັກງານຳພາ-ຄຸ້ມຄອງຂັ້ນບ້ານໃຫ້ສຳເລັດໃນທຸກບ້ານທົ່ວແຂວງໃນປີ 2018,ເອົາໃຈໃສ່ຄົ້ນຄວ້າປະຕິບັດນະໂຍບາຍຕໍ່ພະນັກງານແຕ່ລະປະເພດ ໃຫ້ຖືກຕ້ອງຕາມນິຕິກຳຂອງພັກ-ລັດວາງອອກຢ່າງເຂັ້ມງວດ, ເອົາໃຈໃສ່ປະສານສົມທົບກັບຄະນະຈັດຕັ້ງສູນກາງພັກ ກ່ຽວກັບນິຕິກຳການກະກຽມກອງປະຊຸມ 3 ຂັ້ນຂອງພັກ,ລະບຽບການເລືອກຕັ້ງພາຍໃນພັກໃນຕໍ່ໜ້າ.

ພາບ-ຂ່າວ: ພຸດທະສອນ  (ຂ່າວແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.