Header Ads

ຄະນະສິລະປະສູນລວມນັກສຶກສາແຂວງຈໍາປາສັກເຂົ້າຮ່ວມງານແລກປ່ຽນວັດທະນະທໍາທີ່ປະເທດອິນເດຍ




ໜັງສືພິມຈໍາປາໃໝ່ : ໃນລະຫວ່າງວັນທີ 2-3 ກຸມພາ 2018 ຜ່ານມາ ຄະນະສິລະປະສູນລວມນັກສຶກສາແຂວງຈໍາປາສັກ ນໍາໂດຍທ່ານ ພູເງິນ ບົວສີ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຈໍາປາສັກ ພ້ອມດ້ວຍຄະນະ ແລະ ທີມງານນັກສະແດງ ໄດ້ເຂົ້າຮ່ວມງານແລກປ່ຽນວັດທະນະທໍາຂອງຊາວພຸດໃນທົ່ວໂລກ ແລະ ງານແຫ່ພະບໍລົມສາລີລິກະທາດ (ແຫ່ພະອັດຖິຂອງພະພຸດທະເຈົ້າ) ຊຶ່ງຈັດຂຶ້ນຢູ່ເມືອງ ພຸດຄະຍາ ປະເທດອິນເດຍ. ງານນີ້ມີ 16 ປະເທດທີ່ນັບຖືສາສະໜາພຸດເຂົ້າຮ່ວມ.





ທ່ານ ພູເງິນ ບົວສີ ກ່າວວ່າ: ການເຂົ້າຮ່ວມງານດັ່ງກ່າວ ແມ່ນເປັນຄັ້ງທໍາອິດ ຂອງ ສປປ ລາວ ຊຶ່ງຄະນະນັກສະແດງຈາກແຂວງຈໍາປາສັກ ແມ່ນເປັນຕົວແທນໃຫ້ແກ່ ສປປ ລາວ ແລະ ກໍ່ໄດ້ນໍາເອົາບັນດາບົດຟ້ອນຕ່າງໆທີ່ມີເນື້ອໃນການສະແດງກ່ຽວກັບວັດທະນະທໍາ, ປະເພນີອັນດີງາມຂອງຊາດ ເຂົ້າຮ່ວມສະແດງໃຫ້ມວນຊົນຫຼາຍປະເທດໄດ້ຮັບຊົມ ເຊັ່ນ: ບົດຟ້ອນເຜົ່າລາວງົດງາມ, ບົດຟ້ອນຢ້ຽມວິມານ, ບົດຟ້ອນເກັບກາເຟ, ບົດຟ້ອນສຽງແຄນແດນເຂົ້າໜຽວ, ບົດຟ້ອນຈໍາປາເມືອງລາວ, ບົດຟ້ອນອວຍພອນງານຂອງຊາວພຸດ. ພ້ອມນີ້ກໍ່ໄດ້ຈັດຕັ້ງຂະບວນແຫ່ ພະບໍລົມສາລີລິກະທາດ ໂດຍມີການຕົກແຕ່ງລົດແຫ່ທີ່ເປັນເອກະລັກແບບລາວໆ.




ທ່ານ ພູເງິນ ບົວສີ ກ່າວຕື່ມວ່າ: ຜ່ານການສະແດງບົດຟ້ອນ ແລະ ຂະບວນແຫ່ ຂອງຄະນະສິລະປະຄັ້ງນີ້ແມ່ນມີຄວາມປະທັບໃຈ ທີ່ເຫັນວ່າໄດ້ຮັບການຕອບຮັບຈາກ ຜູ້ຊົມເປັນຢ່າງດີ ຊຶ່ງມີທັງຄົນລາວ ແລະ ຄົນຕ່າງປະເທດ. ພ້ອມນີ້ກໍ່ເປັນການສະແດງໃຫ້ຫຼາຍປະເທດໃນທົ່ວໂລກ ໄດ້ຮັບຮູ້ເຖິງວັດທະນະທໍາຂອງຊາດລາວ. ຈາກຜົນງານການສະແດງຄັ້ງນີ້ ມີບັນດາປະເທດຈໍານວນໜຶ່ງ ທີ່ເຫັນໄດ້ຄວາມສໍາຄັນ, ຄວາມງົດງາມຂອງສິລະປະ ວັດທະນະທໍາຂອງຊາດລາວ ຊຶ່ງຈະເຊື້ອເຊີນເອົາຄະນະສິລະປະສູນລວມນັກສຶກສາແຂວງຈໍາປາສັກ ເຂົ້າຮ່ວມສະແດງໃນງານສໍາຄັນຕ່າງໆ ຂອງປະເທດຈັດຂຶ້ນ ເປັນຕົ້ນ: ປະເທດຍີ່ປຸ່ນ, ອາເມລິກາ.









ຂ່າວ : ຈັນທະວີສັກ ໜັງສືພິມຈໍາປາໃໝ່
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.