Header Ads

ສອງນາຍົກ ລາວ ແລະ ຫວຽດນາມ ໃຫ້ກຽດເປີດສຳນັກງານໃຫຍ່ ບໍລິສັດ ສະຕາໂທລະຄົມ (Unitel)


ໃນວັນທີ 4 ກຸມພາ 2018 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ແລະ ທ່ານ ຫງວຽນ ຊວນ ຟຸກ ນາຍົກລັດຖະມົນຕີແຫ່ງ ສສ ຫວຽດນາມ, ພ້ອມດ້ວຍ ລັດຖະມົນຕີ ກະຊວງປ້ອງກັນປະເທດລາວ ແລະ ຫວຽດນາມ ໄດ້ເຂົ້າຮ່ວມ ພິທີເປິດນຳໃຊ້ສຳນັກງານໃໝ່ ຂອງບໍລິສັດສະຕາໂທລະຄົມ ຫລື ຢູນີເທວ(Unitel) ພາຍຫລັງດຳເນີນ ການກໍ່ສ້າງໃນເດືອນ ພຶດສະພາ 2015 ດ້ວຍມູນຄ່າ 12 ລ້ານໂດລາສະຫະລັດ. ເຊິ່ງຕັ້ງຢູ່ຖະໜົນໜອງບອນ ບ້ານໂພນໄຊ ເມືອງໄຊເຊດຖາ ນະຄອນຫລວງວຽງຈັນ ມີຄວາມສູງ 11 ຊັ້ນ, ມີລັກສະນັກຄ້າຍ ໂລ້ໂກ້ຂອງຢູ່ນິເທວ ແລະ ເປັນອາຄານທີ່ມີ ເອກະລັກສະເພາະໂຕ.



ໃນພິທີທ່ານ ອຸລາຫາ ທອງວັນທາ ປະທານສະພາບໍລິຫານ ແລະ ທ່ານ ກາວແອັງເຊິງ ຜູ້ອຳ ນວຍການໃຫຍ່ບໍລິສັດ ສະຕາໂທລະຄົມ ໄດ້ຂຶ້ນລາຍງານຜົນສຳເລັດ ການກໍ່ສ້າງໂຄງການ ສຳນັກງານໃໝ່ ແລະ ການດຳເນີນທຸລະກິດໃນຜ່ານມາ, ບໍລິສັດລາວ-ເອເຊຍໂທລະຄົມ ແລະ ບໍລິສັດຫວຽດເທວໂທລະຄົມ ໄດ້ເຊັນສັນຍາຮ່ວມມື ສ້າງຕັ້ງເປັນບໍລິສັດສະຕາໂທລະຄົມ ຫລື ບໍລິສັດຢູນີເທວ ໃນວັນທີ 24 ພະຈິກ 2007.



ຕະຫລອດໄລຍະ 9 ປີຂອງການດຳເນີນທຸລະກິດ ມາຮອດປະຈຸບັນຢູນີເທວ ເປັນເຄືອຂາຍໜຶ່ງທີ່ນອນ ຢູ່ໃນອັນດັບແຖວໜ້າ ດ້ວຍຈຳນວນລູກຄ້າທັງໝົດ 2,8 ລ້ານເລກໝາຍ ສ່ວນແບ່ງການ ຕະຫລາດ ກວມເອົາ 52% ມີລະບົບພື້ນຖານໂຄງລ່າງກວ້າງຂວາງທີ່ສຸດ ດ້ວຍຈຳນວນສູນສະຖານີ ຮັບສົ່ງສັນຍານ 2 ຈີ, 3 ຈີ ແລະ 4 ຈີ ມີເຖິງ 6 ພັນສູນສະຖານີ ພື້ນທີ່ປົກຄຸມສັນຍານກວມ 95% ທົ່ວປະເທດ ອັນໄດ້ປະກອບສ່ວນຢ່າງຕັ້ງໜ້າ ໃນການປ່ຽນແປງຂອງຂະແໜງ ໂທລະຄົມໃນລາວ ຈຳນວນປະຊາກອນ ທີ່ສາມາດເຂົ້າເຖິງການນຳໃຊ້ ໂທລະສັບເພີ່ມຂຶ້ນ 5 ທົບພຽງເວລາອັນສັ້ນເທົ່ານັ້ນ ຈາກ 18% ຂຶ້ນເຖິງ 85% ສັນບຍານໂທລະສັບ ໄດ້ກະຈາຍໄປທົ່ວພື້ນທີ່ ພາຍໃນປະເທດ ເພື່ອປະຊາຊົນທຸກຄົນ ສາມາດນຳໃຊ້ໂທລະສັບ ແລະ ອິນເຕີເນັດໄດ້ຢ່າງກວ້າງຂວາງ.



ການຮ່ວມທຸລະກິດກັບ ຫວຽດເທວຊ່ວຍໃຫ້ບໍລິສັດ ລາວ-ເອເຊຍໂທລະຄົມ ມີການຂະຫຍາຍຕົວຢ່າງເຂັ້ມແຂງ ພາຍຫຼັງ 9 ປີ ຢູນິເທວ ມີລາຍຮັບລວມ 1,22 ຕື້ໂດລາ ຜົນກຳໄລ 480 ລ້ານໂດລາ ປະ ກອບສ່ວນເສຍ ພັນທະພາສີອາກອນ 350 ລ້ານໂດລາ ເຊິ່ງກາຍເປັນບໍລິສັດໂທລະຄົມ ທີ່ໃຫຍ່ອັນດັບຕົ້ນໆ ບໍ່ວ່າຈະເປັນກຳລັງແຮງ ທັງເປັນການປະກອບສ່ວນ ໃຫ້ກັບສັງຄົມ ແລະ ປະເທດຊາດ ດ້ວຍວິໄສທັດການ ດຳເນີນທຸລະກິດ ຕ້ອງຕິດພັນກັບການຊ່ວຍເຫລືອສັງຄົມ ນັບແຕ່ມື້ສ້າງຕັ້ງເຖິງປະຈຸບັນ ຢູນິເທວໄດ້ຊ່ວຍເຫລືອສັງຄົມ ມູນຄ່າຫລາຍກວ່າ 11 ລ້ານໂດລາ ຕິດຕັ້ງສະໜອງອິນເຕີເນັດ ລົງສູ່ໂຮງຮຽນ ຫລາຍກວ່າ 1.000 ແຫ່ງໃນທົ່ວປະເທດ ຊ່ວຍເຫລືອສ້າງສຸກສາລາ ໃນເຂດຊົນນະບົດຫ່າງໄກສອກຫລີກ ຝຶກອົບຮົມໃຫ້ວິຊາການ ໃຫ້ຂະແໜງໂທລະຄົມ ເຕັກໂນໂລຊີ ຂໍ້ມູນຂ່າວສານ ແລະ ກິດຈະກຳຊ່ວຍເຫລືອສັງຄົມ ແລະ ອື່ນໆ.




ຂ່າວ: ຈັນທະລອນ, ຂປລ
ພາບ: Unitel


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.