Header Ads

ດ່ານສາກົນ ຂົວມິດຕະພາບ 2 ເກັບລາຍຮັບໄດ້ 444 ຕື້ກວ່າກີບ





ປີ 2017 ຜ່ານມາ ດ່ານສາກົນ ຂົວມິດຕະພາບ 2 ສະຫວັນນະເຂດ-ມຸກດາຫານ ການ ເຄື່ອນໄຫວຄຸ້ມຄອງກວດກາ ແລະ ບໍລິການ ເຫັນວ່າ ການເຂົ້າ-ອອກຂອງຄົນ, ຍານພາຫະນະ ແລະ ສິນຄ້າມີທ່າອ່ຽງເພີ່ມຂຶ້ນ  ອັນໄດ້ເຮັດໃຫ້ການຈັດເກັບລາຍຮັບ ດ້ານພາສີ ແລະ ຄ່າທຳນຽມຕ່າງໆ ໄດ້ຕາມແຜນການ ໃນນັ້ນສາມາດ ເກັບຄ່າບໍລິການລ່ວງເວລາ ສາມາດເກັບໄດ້ 4 ຕື້ກວ່າກີບ, ມີຄົນເຂົ້າເມືອງ ທີ່ຜ່ານດ່ານ 753.978 ຄົນ ແລະ ຄົນອອກເມືອງ 804.986 ຄົນ ແລະ ພາສີ ກໍສາມາດເກັບລາຍຮັບ ໄດ້ 444,036 ຕື້ກີບ ປະຕິບັດໄດ້ 94,06%.




ຂໍ້ມູນດັ່ງກ່າວ ໄດ້ຮັບການລາຍງານ ໃນໂອກາດທີ່ ທ່ານ ໂພໄຊ ໄຊຍະສອນ ຮອງ ເຈົ້າແຂວງໆສະຫວັນນະເຂດ ພ້ອມຄະນະກຳມະການ ກວດກາພັກແຂວງ, ຫ້ອງວ່າການ ປົກຄອງແຂວງ ໄດ້ລົງຊຸກຍູ້ການປະຕິບັດໜ້າທີ່ ວຽກງານຢູ່ດ່ານສາກົນ ຂົວມິດຕະພາບ 2 ສະຫວັນນະເຂດ-ມຸກດາຫານ ໂດຍສະເພາະ ແມ່ນການເຮັດໜ້າທີ່ ບໍລິການຄຸ່້ມຄອງ ແລະ ກວດກາຄົນເຂົ້າ-ອອກປະເທດ ພ້ອມທັງຮັກສາ ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມຊາຍແດນ, ຄຸ້ມຄອງພື້ນຖານໂຄງລ່າງເປັນຕົ້ນ  ແມ່ນຂົວ, ເສັ້ນທາງ, ອາຄານຫ້ອງການ, ວັດຖຸເຕັກນິກ, ອຸປະກອນຮັບໃຊ້ ວິຊາສະເພາະ; ຈັດເກັບລາຍຮັບ ດ້ານພາສີອາກອນ, ຄ່າທຳນຽມຕ່າງໆ ເຂົ້າງົບປະມານແຫ່ງຊາດ ທັງອຳນວຍຄວາມສະດວກ ໃຫ້ແກ່ການຂົນສົ່ງ ແລະ ການຈໍລະຈອນສິນຄ້າ ທີ່ນຳເຂົ້າ ແລະ ສົ່ງອອກໂດຍຜ່ານດ່ານ; ຕິດຕາມເຝົ້າລະວັງ ພະຍຸພະຍາດຄົນ, ສັດ, ພືດ ທີ່ມີຄວາມສ່ຽງ ເພື່ອສະກັດກັ້ນ ໃຫ້ທັນເວລາ ພ້ອມທັງຕິດຕາມກວດກາ ຜະລິດຕະພັນອາຫານ ແລະ ຢາສານເຄມີຕັ້ງຕົ້ນອື່ນໆ ຖືກຕ້ອງຕາມການອະນຸຍາດນຳເຂົ້າ ແລະ ສົ່ງອອກ.



ໃນໂອກາດນີ້ ທ່ານ ໂພໄຊ ໄຊຍະສອນ ໄດ້ເນັ້ນໃຫ້ເຈົ້າໜ້າທີ່ ແຕ່ລະຂັ້ນທີ່ປະຈຳຢູ່ດ່ານ ຈົ່ງໄດ້ເພີ່ມ ຄວາມຮັບຜິດຊອບ ໃນການປະຕິບັດໜ້າທີ່ ວຽກງານໃຫ້ສູງຂຶ້ນກວ່າເກົ່າ, ສຳຄັນກໍແມ່ນ ເຮັດໜ້າທີ່ໂຄສະນາ ແລະ ບໍລິການແຂກ ເຮັດແນວໃດ ເຮັດໃຫ້ເຂົາ ໄດ້ເຂົ້າມາແລ້ວ ກໍເກີດຄວາມປະທັບໃຈ ໃນການບໍລິການ ເຊິ່ງເປົ້າໝາຍ ໃນຕໍ່ໄປ ທາງພັກ-ລັດ ກໍຄື ອຳນາດການປົກຄອງ ຂອງແຂວງ ກຽມທຸກເງື່ອນໄຂ ເພື່ອເປີດການບໍລິການປະຕູດຽວ ຢູ່ທີ່ດ່ານຂົວມິດຕະພາບ 2 ຄືກັນກັບດ່ານ ສາກົນ ສະຫວັນ-ລາວບາວ, ຕ້ອງໄດ້ມີການປັບປຸງ ຄືແບບແຜນວິທີເຮັດວຽກ ຂອງພະນັກງານ ແຕ່ລະໜ່ວຍງານ ແລະ ຕ້ານປະກົດການຫຍໍ້ທໍ້ ທີ່ເກີດຂຶ້ນ ພ້ອມນີ້ຄະນະ ຮັບຜິດຊອບດ່ານ ກໍຄວນມີແຜນຢ່າງລະອຽດ ໃນການປັບປຸງພື້ນຖານໂຄງລ່າງ ພາຍໃນດ່ານໃຫ້ມີຄວາມສວຍງາມ ແລະ ໃຫ້ເອົາໃຈໃສ່ ເລື່ອງຄວາມສະຫງົບ ແລະ ຄວາມເປັນລະບຽບຮຽບຮ້ອຍ.


ຂ່າວ: ສີລຳພັນ  (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.