Header Ads

ສພຂ ຮັບຮອງເອົາແຜນປີທ່ອງທ່ຽວລາວ 2018 ຂອງແຂວງຈຳປາສັກ




ສະພາປະຊາຊົນແຂວງຈຳປາສັກ (ສພຂ) ໄດ້ຮັບຮອງເອົາແຜນການຮັບຮອງປີທ່ອງທ່ຽວລາວ 2018 ຂອງແຂວງຈຳປາສັກ ຊຶ່ງມີເຂດທ່ອງທ່ຽວ 4 ເຂດ, ມີ 8 ກິດຈະກຳຫຼັກ ທີ່ຈະເປັນຂະບວນການທ່ອງທ່ຽວ; ພ້ອມນີ້ ຍັງໄດ້ຮັບຮອງເອົາແຜນປັບປຸງຊຸກຍູ້ຄຸນນະພາບດ້ານການບໍລິການ ທ່ອງທ່ຽວ ອີກຈຳນວນໜຶ່ງ.


ການຮັບຮອງເອົາແຜນການຮັບຮອງປີທ່ອງທ່ຽວລາວ 2018 ຂອງແຂວງຈຳປາສັກທີ່ນຳສະ ເໜີໂດຍພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຈຳປາສັກ ມີຂຶ້ນໃນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຈຳປາສັກ ຊຸດທີ I ໃນທ້າຍເດືອນ ທັນວາ 2017ຜ່ານມາ. ໂດຍແຂວງຈຳປາສັກໄດ້ແບ່ງເຂດການທ່ອງທ່ຽວເປັນ 4 ເຂດຄື: 



1. ເຂດມະຫານະທີສີພັນດອນ (ເມືອງໂຂງ) ໃຫ້ນັກທ່ອງທ່ຽວ ໄດ້ທ່ຽວຊົມນຳ້ຕົກຕາດ ຄອນພະເພັງ ໄຂ່ມຸກແຫ່ງອາຊຽນ ຊຶ່ງເປັນນຳ້ຕົກຕາດທີ່ກວ້າງໃຫຍ່ຕິດອັນດັບ 1 ໃນ 10 ຂອງໂລກ. ພ້ອມນີ້ ຍັງໄດ້ທ່ຽວຊົມເກາະດອນ ແລະ ວິຖີຊີວິດຂອງປະຊາຊົນໃນເຂດດັ່ງກ່າວ,ທ່ຽວຊົມຮ່ອງຮອຍ ທາງປະຫວັດສາດ ( ທ່າກຳປັ່ນ,ຂົວຂ້າມບ້ານດອນເດດ-ດອນຄອນ ), ທ່ຽວຊົມປາຂ່ານຳ້ຈືດເຂດບ້ານ ຫາງຄອນ ແລະ ທ່ຽວຊົມວັດວາອາຮາມເກົ່າແກ່ທີ່ດອນໂຂງ. 
2. ເຂດວັດທະນະທຳມໍລະດົກໂລກ ຈຳປາສັກ ລວມມີ 4 ເມືອງຄື: ເມືອງຈຳປາສັກ, ເມືອງປະທຸມພອນ, ເມືອງສຸຂຸມາ ແລະ ເມືອງມຸນລະປາໂມກ. 
3. ເຂດພູພຽງບໍລະເວນເມືອງປາກຊ່ອງ. 
4. ເຂດວັດທະນະທຳ ແລະ ທຳມະຊາດລວມມີ 4 ເມືອງຄື: ເມືອງ ປາກເຊ, ເມືອງໂພນທອງ, ເມືອງຊະນະສົມບູນ ແລະ ເມືອງບາຈຽງຈະເລີນສຸກ. 





ສຳລັບບັນດາກິດຈະກຳຫຼັກ ທີ່ຈະເປັນຂະບວນຕ້ອນຮັບປີທ່ອງທ່ຽວລາວ 2018ທີ່ແຂວງຈຳປາ ສັກນັ້ນປະກອບມີ: ງານນະມັດສະການຜາສາດຫີນວັດພູ ( ເມືອງຈຳປາສັກ ), ບຸນຊ້າງບ້ານກຽດໂງ້ງ ( ເມືອງປະ ທຸມພອນ ), ບຸນພະເຫວດ ( ເມືອງຊະນະສົມບູນ ), ບຸນບັ້ງໄຟ ( ເມືອງຊະນະສົມບູນ ), ບຸນປີໃໝ່ລາວ ( ເມືອງປາກເຊ ), ງານເທດສະການໝາກໄມ້ສົດ ( ເມືອງບາຈຽງຈະເລີນສຸກ ) ແລະ ງານບຸນປະວໍລະນາ ອອກພັນສາ ( ຊ່ວງເຮືອປາກເຊ ). 




ສ່ວນແຜນປັບປຸງ ຊຸກຍູ້ຄຸນນະພາບດ້ານການບໍລິການທ່ອງທ່ຽວນັ້ນ ປະກອບມີ: ປັບປຸງຄຸນນະ ພາບພະນັກງານບໍລິການຂອງໂຮງແຮມ, ເຮືອນພັກ ແລະ ຮ້ານອາຫານ; ຍົກສູງຄຸນນະພາບການບໍລິ ການຂອງບັນດາຫົວໜ່ວຍທຸລະກິດບໍລິການນຳທ່ຽວໃຫ້ໄດ້ມາດຕະຖານ; ປະສານກັບພາກສ່ວນກ່ຽວ ຂ້ອງ ປັບປຸງຄຸນນະພາບດ້ານບໍລິການຂົນສົ່ງນັກທ່ອງທ່ຽວ ທາງບົກ,ທາງນຳ້ ແລະ ທາງອາກາດ; ປະສານ ກັບພາກສ່ວນກ່ຽວຂ້ອງຈັດສັນສິ່ງປຸກສ້າງ ໃນເຂດບໍລິການທ່ອງທ່ຽວ, ສະຖານທີ່ແຫຼ່ງທ່ອງທ່ຽວ ທີ່ຍັງບໍ່ ທັນສອດຄ່ອງຕາມລະບຽບ ທີ່ສົ່ງຜົນກະທົບຕໍ່ທິວທັດທຳມະຊາດ; ສົມທົບກັບທ້ອງຖິ່ນ, ພະແນກການທີ່ ກ່ຽວຂ້ອງ ແລະ ພາກທຸລະກິດກຳນົດໃຫ້ມີໜຶ່ງເມືອງ ໜຶ່ງຜະລິດຕະພັນທ່ອງທ່ຽວ ໂດຍການຈັດຕັ້ງກິດຈະ ກຳສົ່ງເສີມການທ່ອງທ່ຽວເຊັ່ນ: 





ບຸນປະເພນີ, ງານມະຫະກຳວັດທະນະທຳຊົນເຜົ່າ, ງານເທດສະການ, ງານມະຫະກຳກີລາ, ງານວາງສະແດງຜະລິດຕະພັນຫັດຖະກຳ-ເຄື່ອງທີ່ລະນຶກ, ການປະກວດນາງສາວ ຈຳປາສັກ, ຂະບວນຄາລະວານລົດທ່ອງທ່ຽວ, ງານປະກວດສຽງຂັບລຳ, ບົດຮ້ອງ, ບົດຟ້ອນ ແລະ ອື່ນໆ; ຍົກລະດັບຄວາມສາມາດ, ທັກສະປະສົບການຂອງບຸກຄະລາກອນ ແລະ ນິຕິກຳລະບຽບຄຸ້ມຄອງ ໃນຂະແໜງທ່ອງທ່ຽວ ໃຫ້ແທດເໝາະກັບສະພາບຕົວຈິງ; ປັບປຸງເວັບໄຊການທ່ອງທ່ຽວຂອງແຂວງ www.Southern-Laos.com ແລະ ສື່ສັງຄົມອອນລາຍ ໃຫ້ເຂົ້າເຖິງກຸ່ມຕະຫຼາດນັກທ່ອງທ່ຽວ ໄດ້ຕາມ ເປົ້າໝາຍ; ສູ້ຊົນດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາຢ້ຽມຢາມທ່ຽວຊົມຢູ່ແຂວງຈຳ ປາສັກ ໃຫ້ໄດ້ເຖິງ 917.707ຄົນ ໃນນັ້ນ ນັກທ່ອງທ່ຽວພາຍໃນໃຫ້ໄດ້ 271.660 ຄົນ, ນັກທ່ອງທ່ຽວຕ່າງ ປະເທດໃຫ້ໄດ້ 248.667 ຄົນ, ນັກທ່ອງທ່ຽວຊາຍແດນ 397.380 ຄົນ ທຽບໃສ່ປີຜ່ານມາໃຫ້ເພີ່ມຂຶ້ນ 15%. 

ທີ່ມາ: ໜັງສືພພິມຈໍາປາໃໝ່

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.