Header Ads

ຄໍາເຫັນຂອງທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ກ່ຽວກັບປີທ່ອງທ່ຽວລາວ 2018




ຂ້າພະເຈົ້າ, ໃນນາມຕາງໜ້າຄະນະພັກ, ອົງການປົກຄອງ ແລະ ປະຊາຊົນບັນດາເຜົ່າແຂວງ ຫຼວງພະບາງ ມີຄວາມຮູ້ສຶກພາກພູມໃຈເປັນຢ່າງຍິ່ງທີ່ພັກ-ລັດຖະບານ ແຫ່ງ ສປປ ລາວ ໄດ້ເປີດປີທ່ອງທ່ຽວລາວ 2018 ຢູ່ນະຄອນຫຼວງວຽງຈັນ ໃນເດືອນພະຈິກ (11) ປີ 2017 ຜ່ານມານີ້.
ເປັນທີ່ຮູ້ກັນດີແລ້ວວ່າ: ແຂວງຫຼວງພະບາງເປັນດິນແດນແຫ່ງອະລິຍະທໍາອັນອຸດົມສົມບູນ, ມີປະຫວັດສາດອັນຍາວນານທີ່ໜ້າຊື່ນຊົມ, ມີວັດທະນະທໍາ-ຮີດຄອງປະເພນີອັນດີງາມ ຊຶ່ງໄດ້ຮັບການອະນຸລັກຮັກສາໃຫ້ຄົງຄຸນຄ່າຕະຫຼອດມາ. ນອກຈາກນີ້ຫຼວງພະບາງຍັງມີທີ່ຕັ້ງພູມສັນຖານອັນພິດສະ ດານວິຈິດບັນຈົງ, ອຸດົມຮັ່ງມີໄປດ້ວຍພູຜາປ່າໄມ້, ແມ່ນໍ້າລໍາເຊອັນເປັນອົງປະກອບທີ່ສໍາຄັນ ເຮັດໃຫ້ ຫຼວງພະບາງມີຄວາມສວຍສົດງົດງາມເປັນເອກະລັກ ດ້ວຍເງື່ອນໄຂມາດຖານທີ່ເອື້ອອໍານວຍບວກກັບ ການເອົາໃຈໃສ່ຊີ້ນໍາຈາກພັກ ແລະ ລັດຖະບານຫຼວງພະບາງ ຈຶ່ງໄດ້ຮັບຮອງຈາກອົງການຢູແນສໂກ ໃຫ້ ເປັນເມືອງມໍລະດົກໂລກ ຕັ້ງແຕ່ວັນທີ 09 ທັນວາ ປີ 1995 ເປັນຕົ້ນມາ.



ຈາກທ່າແຮງ ແລະ ສະພາບຈຸດພິເສດທີ່ໂດດເດັ່ນຂອງຕົວເມືອງຫຼວງພະບາງນັ້ນ ໄດ້ສ້າງຄວາມ ສົນໃຈໃຫ້ນັກທ່ອງທ່ຽວຈາກຫຼາຍໆປະເທດໃນໂລກຢາກເຫັນ ແລະ ເດີນທາງເຂົ້າມາທ່ອງທ່ຽວຢ່າງຕໍ່ ເນື່ອງ, ດ້ວຍເຫດນີ້ຄະນະພັກ ແລະ ອົງການປົກຄອງແຂວງຫຼວງພະບາງ ໄດ້ຖືເອົາວຽກງານການທ່ອງ ທ່ຽວເປັນໜຶ່ງໃນວຽກບູລິມະສິດ ເພື່ອພັດທະນາເສດຖະກິດ-ສັງຄົມຂອງແຂວງ ໂດຍສະເພາະກໍ່ແມ່ນການແກ້ໄຂຄວາມທຸກຍາກ; ສະນັ້ນຈຶ່ງໄດ້ກໍານົດແຕ່ປີ 2015-2020 ຕ້ອງສ້າງໃຫ້ເປັນໃຈກາງບໍລິ ການທ່ອງທ່ຽວຂອງບັນດາແຂວງພາກເໜືອ ແລະ ເຊື່ອມໂຍງກັບພາກພື້ນ, ພ້ອມທັງຫັນໃຫ້ເປັນອຸດສາ ຫະກໍາການທ່ອງທ່ຽວໃນຊຸມປີຕໍ່ໜ້າ.





ສະນັ້ນ, ໃນງານສະເຫຼີມສະຫຼອງປີທ່ອງທ່ຽວລາວ 2018 ແຂວງຫຼວງພະບາງໄດ້ມີການກະ ກຽມຫຼາຍກິດຈະກໍາ ໃນນັ້ນ, ກິດຈະກໍາຫຼັກແມ່ນຈະຈັດໃສ່ພ້ອມກັບການສະເຫຼີມສະຫຼອງປີໃໝ່ລາວ ວັນທີ 15 ເມສາ 2018. ຂ້າພະເຈົ້າ, ຕາງໜ້າໃຫ້ການນໍາແຂວງຫຼວງພະບາງ ກໍຄືໃນນາມສ່ວນຕົວຂໍເຊີນຊວນຊາວລາວຈາກພາຍໃນ ແລະ ຕ່າງປະເທດໃນທົ່ວໂລກມາທ່ຽວຊົມງານບຸນປີໃໝ່ລາວ ກໍຄືສະ ເຫຼີມສະຫຼອງປີທ່ອງທ່ຽວທີ່ເມືອງມໍລະດົກໂລກຫຼວງພະບາງ ແລະ ສຶກສາຄວາມອາດສາມາດການລົງທຶນໃນດ້ານຕ່າງໆຢູ່ຫຼວງພະບາງ, ຊຶ່ງທາງແຂວງຫຼວງພະບາງມີຄວາມພ້ອມທຸກດ້ານໃນການຕ້ອນຮັບທຸກໆທ່ານ ແລະ ຈະອໍານວຍຄວາມສະດວກດ້ານຕ່າງໆ ແກ່ບັນດາທ່ານທີ່ສົນໃຈໃນການສຶກສາຄົ້ນຄວ້າການລົງທຶນ.




ເນື່ອງໃນໂອກາດປີໃໝ່ລາວປີນີ້ ຂ້າພະເຈົ້າ, ຂໍອວຍພອນໃຫ້ການນໍາພັກ-ລັດຂັ້ນສູນກາງກໍຄືຂັ້ນ ແຂວງ, ຂັ້ນເມືອງ ຈົ່ງມີພາລະນາໄມສົມບູນ, ມີອາຍຸໝັ້ນຂວັນຍືນ, ມີຄວາມສຸກກາຍສະບາຍໃຈສືບຕໍ່ຊີ້ນໍາ-ນໍາພາປະເທດຊາດ ເພື່ອກ້າວຂຶ້ນຕາມທິດທີ່ກອງປະຊຸມໃຫຍ່ ຄັ້ງທີ x ຂອງພັກວາງອອກເຮັດໃຫ້ປະເທດຊາດຂອງພວກເຮົາ ເວົ້າລວມ, ເວົ້າສະເພາະ ແຂວງຫຼວງພະບາງ ໃຫ້ມັ່ງຄັ່ງເຂັ້ມແຂງທຽບເທົ່າກັບບັນດາປະເທດອື່ນໆໃນໂລກ, ຂໍອວຍພອນແຂກທັງພາຍໃນ ແລະ ຕ່າງປະເທດ ແລະ ປະຊາຊົນບັນດາເຜົ່າໃນທົ່ວປະເທດ ທີ່ເຂົ້າມາທ່ອງທ່ຽວຢູ່ເມືອງມໍລະດົກໂລກ ຈົ່ງມີສຸກຂະພາບເຂັ້ມແຂງ, ມີຄວາມຜາສຸກ, ມີຜົນສໍາເລັດໃນໜ້າທີ່ການງານຕະຫຼອດໄປ.



ໂດຍ: ຄຸດແກ້ວ ແສງທະວີ, ໜ່ວຍງານຂໍ້ມູນ-ຂ່າວສານ ເທັກໂນໂລຊີຫ້ອງວ່າການແຂວງຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.