Header Ads

ເສດຖະກິດເມືອງຄອບແຂວງໄຊຍະບູລີຂະຫຍາຍຕົວ 7,6 % ຕໍ່ປີ




ທ່ານ ພົມ ມິ່ງບຸບຜາ ເລຂາພັກເມືອງ, ເຈົ້າເມືອງ-ເມືອງຄອບແຂວງໄຊຍະບູລີ ໄດ້ລາຍງານໃນງານບຸນນະມັດສະການພຣະທາດປວກ ປະຈໍາປີ ແລະ ການສະເຫຼີມສະຫຼອງປີທ່ອງທ່ຽວລາວ 2018 ທີ່ໄດ້ຈັດຂຶ້ນໃນລະຫວ່າງວັນທີ 13-15 ມີນາ 2018 ນີ້ວ່າ: ເສດຖະກິດຂອງເມືອງແມ່ນຂະຫຍາຍຕົວຕໍ່ເນື່ອງ ແລະ ໝັ້ນທ່ຽງໃນລະດັບສະເລ່ຍ 7,6% ຕໍ່ປີ, ລວມຍອດລາຍຮັບປະຕິບັດໄດ້ 302,30 ຕື້ກີບ, ສະເລ່ຍໃສ່ຫົວຄົນໜຶ່ງໄດ້ 14,62 ລ້ານກີບ ຫຼື ເທົ່າກັບ 1.828 ໂດລາສະຫະລັດ, ຜະລິດເຂົ້າໄດ້ທັງໝົດ 11.316,92 ໂຕນ, ສາລີລ້ຽງສັດ 12.642,96 ໂຕນ, ໝາກເດືອຍ 15.464,49 ໂຕນ, ສາລີຫວານ 217 ໂຕນ; ຜັກທຽມ 480,49 ໂຕນ





ປັດໃຈໃໝ່ແມ່ນການປູກຜັກໃນເຮືອນຮົ່ມຢູ່ບ້ານເຄິ່ງຫຼັກຄຳ ແລະ ບ້ານສະຖານ ມີ 8 ຄອບຄົວ, ສາມາດຜະລິດຜັກສະອາດອອກຈຳໜ່າຍສະໜອງຄວາມຕ້ອງການພາຍໃນເມືອງໄດ້ຢ່າງພຽງພໍ; ການປູກຫຍ້າລ້ຽງສັດມີ 50 ຄອບຄົວ ເນື້ອທີ່ 43,84 ເຮັກຕາ ມີສັດທັງໝົດ 137.913 ໂຕ, ສາມາດຜະລິດຊີ້ນ, ປາໄດ້ສະໜອງຄວາມຕ້ອງການພາຍໃນຢາງພຽງພໍ, ການຂຸດຄົ້ນລາຍຮັບພາຍໃນເຂົ້າງົບປະມານໄດ້ທັງໝົດ 2,82 ຕື້ກີບ, ລາຍຈ່າຍງົບປະມານ ໂດຍເລັ່ງໃສ່ແກ້ໄຂເບີກຈ່າຍເງິນເດືອນ, ຈ່າຍບໍລິຫານ, ອຸດໜູນນະໂຍບາຍທີ່ຈຳເປັນໄດ້ທັງໝົດ 7,95 ຕື້ກີບ; ພື້ນຖານໂຄງລ່າງກໍ່ໄດ້ຮັບການພັດທະນາດີຂື້ນກວ່າເກົ່າ, ວຽກງານສຶກສາກໍ່ໄດ້ຮັບການປັບປຸງດີຂື້ນ ເທື່ອລະກ້າວ ເຊີ່ງປັດຈຸບັນໄດ້ເປີດການຮຽນ-ການສອນຊັ້ນມັດທະຍົມຕອນປາຍບໍາລຸງໄດ້ 9 ບ້ານ 2 ກົມກອງ, ວຽກງານສາທາລະນະສຸກກໍໄດ້ຮັບການປັບປຸງ ເປັນຕົ້ນແມ່ນການສັກຢາ, ຢອດຢາກັນພະຍາດໃຫ້ເດັກນ້ອຍ ແລະ ແມ່ຍິງໃນເກນອາຍຸເປົ້າໝາຍ; 





ສ້າງແຜນແມ່ບົດດ້ານການທ່ອງທ່ຽວເພື່ອຮອງຮັບໃຫ້ແກ່ການເປີດດ່ານສາກົນ, ປະຕິບັດນະໂຍບາຍຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດ ແລະ ນະໂຍບາຍອື່ນໆຕາມຄວາມເໝາະສົມ, ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ດີຂື້ນເທື່ອລະກ້າວ, ນອກນີ້ເມືອງຍັງໄດ້ເອົາໃຈໃສ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບຮອບດ້ານ, ເອົາໃຈໃສ່ສຶກສາອົບຮົມປະຊາຊົນທີ່ອາໄສຢູ່ລຽບຊາຍແດນ ເລັ່ງໃສ່ສ້າງ ແລະ ປັບປຸງບ້ານປ້ອງກັນຊາດເຂັ້ມແຂງ, ປັດຈຸບັນມີບ້ານປ້ອງກັນຊາດດີ 25 ບ້ານ ເທົ່າກັບ 92,59%; ບ້ານປ້ອງກັນຄວາມສະຫງົບດີ 22 ບ້ານເທົ່າກັບ 81,48%, ບ້ານປອດຢາເສບຕິດ 7 ບ້ານ, ພ້ອມກັນນີ້ກໍ່ຈັດຕັ້ງປະຕິບັດໂຄງການຈັດສັນລະບຽບສັງຄົມ ແລະ ສ້າງຄວາມເຂັ້ມແຂງໃຫ້ປກສ-ກອງຫຼອນບ້ານ ສຳເລັດ 10 ບ້ານ, ເຮັດໃຫ້ປະກົດການຫຍໍ້ທໍ້ຕ່າງໆຫຼຸດລົງເທື່ອລະກ້າວ,ເຮັດໃຫ້ເມືອງຄອບຮັກສາໄດ້ຄວາມມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ,ມີຄວາມເປັນລະບຽບຮຽບຮອຍໂດຍພື້ນຖານ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.