Header Ads

ຮອງນາຍົກ ກວດກາຄວາມຄືບໜ້າ ສະໜາມບິນແຂວງຫົວພັນ



ໃນລະຫວ່າງວັນທີ 19-20 ມີນາ 2018, ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ພ້ອມຄະນະລົງເຄື່ອນໄຫວເຮັດວຽກ ແລະ ຢ້ຽມຢາມໂຄງການກໍ່ສ້າງສະໜາມບິນ ແຂວງຫົວພັນ ເພື່ອກວດກາຄວາມຄືບໜ້າຂອງໂຄງການດັ່ງກ່າວ.

ທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ໄດ້ລາຍງານຄວາມຄືບໜ້າຂອງໂຄງການກໍ່ສ້າງສະໜາມບິນໜອງຄ້າງ ແຂວງຫົວພັນ, ເຊິ່ງເປັນໂຄງການໜຶ່ງທີ່ສໍາຄັນຂອງແຂວງ ໂດຍແມ່ນບໍລິສັດພັດທະນາກະສິກໍາຮ່ວງແອັງ ອັດຕະປື ຮັບເໝົາກໍ່ສ້າງ ເລີ່ມຈັດຕັ້ງມາຕັ້ງແຕ່ວັນທີ 7 ຕຸລາ 2013 ແລະ ໄດ້ສິ້ນສຸດສັນຍາໂຄງການໃນ 24 ເດືອນ ກໍຄືປີ 2015 ແຕ່ໂຄງການບໍ່ສາມາດປະຕິບັດສໍາເລັດໄດ້ຕາມແຜນ ເນື່ອງຈາກຫຼາຍປັດໄຈເຊັ່ນ: ໂຄງການຕັ້ງຢູ່ເຂດຫ່າງໄກສອກຫຼີກ ເຮັດໃຫ້ການຂົນສົ່ງວັດສະດຸ, ພາຫະນະກົນຈັກ ເພື່ອມາຮັບໃຊ້ໂຄງການພົບຄວາມຫຍຸ້ງຍາກ ລວມທັງໄພທໍາມະຊາດທີ່ເປັນອຸປະສັກ ແລະອື່ນໆ, ເພື່ອເປັນການສືບຕໍ່ໂຄງການດັ່ງກ່າວໃຫ້ສໍາເລັດພາກສ່ວນທີ່ກ່ຽວຂ້ອງ ເປັນຕົ້ນແມ່ນການນຳແຂວງຫົວພັນ, ກະຊວງໂຍທາທິການ-ຂົນສົ່ງ ແລະ ບໍລິສັດຜູ້ຮັບເໝົາ ໄດ້ເປັນເອກະພາບເຫັນດີໃຫ້ເລີ່ມສືບຕໍ່ຈັດຕັ້ງປະຕິບັດໂຄງການດັ່ງກ່າວ ເລີ່ມແຕ່ວັນທີ 26 ກຸມພາ 2018 ເປັນຕົ້ນໄປ ມາຮອດປັດຈຸບັນແມ່ນເຂົ້າສູ່ການລົງມືຈັດຕັ້ງປະຕິບັດແລ້ວ ສໍາຫຼັບໜ້າວຽກແມ່ນ: ປັບປຸງແຜນຈັດຕັ້ງປະຕິບັດໂຄງການ ເພື່ອໃຫ້ສອດຄ່ອງກັບສະພາບຕົວຈິງ; ວຽກອານະໄມ ແລະ ບຸກເບີກພື້ນທີ່ການກໍ່ສ້າງ ເຊັ່ນ: ທາງຂຶ້ນ-ລົງເຮືອບິນ, ທາງຂັບເຄື່ອນ, ລານຈອດເຮືອບິນ, ເຂດປອດໄພທາງຂ້າງ ແລະອື່ນໆ; ກໍ່ສ້າງທາງລົດມອດໄຟສະໜາມບິນ ແລະ ເຂດປອດໄພທາງຂ້າງຂອງທາງຂຶ້ນ-ລົງເຮືອບິນ; ວຽກກໍ່ສ້າງທາງຍ່າງຢູ່ໜ້າອາຄານຜູ້ໂດຍສານ ແລະ ວຽກດິນຖົມຫຼັງທໍ່ຂ້າມທາງຂຶ້ນລົງ ແລະອື່ນໆ.

ໃນໂອກາດດຽວກັນ, ທ່ານຮອງນາຍົກລັດຖະມົນຕີ ພ້ອມຄະນະ ຍັງໄດ້ລົງເຄື່ອນໄຫວວຽກຢູ່ແຂວງຊຽງຂວາງ ໂດຍການຕ້ອນຮັບຂອງ ທ່ານ ບຸນຕົ້ນ ຈັນທະພອນ ຮັກສາການເຈົ້າແຂວງໆຊຽງຂວາງ, ເຊິ່ງທ່ານລາຍງານສະພາບບາງດ້ານ ເປັນຕົ້ນແມ່ນວຽກງານພັກ-ພະນັກງານ, ວຽກງານການພັດທະນາເສດຖະກິດສັງຄົມຂອງແຂວງ ພ້ອມທັງຂໍທິດຊີ້ນຳ ເພື່ອເປັນທິດເຢືອງທາງໃຫ້ຄະນະພັກ-ຄະນະນໍາຂອງແຂວງໃນການແກ້ໄຂບັນຫາຄົງຄ້າງໃນຕໍ່ໜ້າ.
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.