Header Ads

ຈັບພໍ່ ແລະ ລູກຊາຍ ຮ່ວມກັນຄ້າຂາຍຢາເສບຕິດ




ບັນຫາການແຜ່ລະບາດຂອງຢາເສບຕິດໄດ້ສົ່ງຜົນກະທົບໂດຍກົງຕໍ່ຄວາມບໍ່ສະຫງົບ ແລະ ຄວາມບໍ່ເປັນລະບຽບ ຮຽບຮ້ອຍຂອງສັງຄົມຕາມມາ ເປັນຕົ້ນແມ່ນບັນຫາການປຸ້ນຈີ້, ຊິງຊັບ, ຂີ້ລັກ-ງັດແງະ ແລະ ບັນຫາອື່ນໆ, ໃນ ການສະກັດກັ້ນ ແລະ ຕ້ານຢາເສບຕິດ ເຈົ້າໜ້າທີ່ຕໍາຫຼວດວິຊາສະເພາະກໍໄດ້ສຸມໃສ່ຢ່າງເອົາຈິງຈັງ ເພື່ອເຮັດໃຫ້ບັນ ຫາຢາເສບຕິດຫຼຸດລົງ ເຊັ່ນ: ໃນວັນທີ 12 ມີນາ 2018, ທີ່ຜ່ານມາ ເຈົ້າໜ້າທີ່ຕໍາຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ ເມືອງອະນຸວົງ ແຂວງໄຊສົມບູນ ສາມາດຈັບຕົວຜູ້ຖືກຫາລັກລອບຄ້າຂາຍຢາເສບຕິດໄດ້ 3 ຄົນ ພ້ອມຢາບ້າ 74 ເມັດ.

ເຈົ້າໜ້າທີ່ກອງບັນຊາການ ປກສ ເມືອງອະນຸວົງ ໃຫ້ຮູ້ວ່າ: ໃນເວລາປະມານ 8:30 ໂມງ ຂອງວັນທີ 12 ມີນາ ຜ່ານ ມານີ້, ໄດ້ຮັບລາຍງານຈາກພົນລະເມືອງດີໄດ້ມີກຸ່ມຄົນບໍ່ດີຈໍານວນໜຶ່ງລັກລອບຄ້າ-ຂາຍຢາເສບຕິດ ແລະ ມົ້ວສຸມ ຢາເສບຕິດ ຈຶ່ງໄດ້ແຕ່ງຕັ້ງພະນັກງານວິຊາສະເພາະລົງຕິດຕາມກວດກາການເຄື່ອນໄຫວຢູ່ເຂດບ້ານພູຫົວຊ້າງ ເຫັນວ່າມີມູນຄວາມຈິງ. ຈາກນັ້ນ, ເຈົ້າໜ້າທີ່ໄດ້ຂຶ້ນແຜນປະສານສົມທົບກັບ ປກສ ບໍລິການປະຊາຊົນກຸ່ມບ້ານ ເທດສະບານ ເມືອງອະນຸວົງ ສະແດງຕົວເຂົ້າສະກັດກຸ່ມເປົ້າໝາຍ ສາມາດກັກຕົວໄດ້ທັງໝົດ 3 ຄົນ ຄື: ທ້າວ ເຢຊົ່ງ ອາຍຸ 55 ປີ, ປະຊາຊົນ, ທ້າວ ຈົງຊົ່ງ ອາຍຸ 42 ປີ ປະຊາ ຊົນ, ທັງສອງເປັນພໍ່ລູກຢູ່ບ້ານພູຫົວຊ້າງ ແລະ ທ້າວ ຢົວ ເຢຍ ອາຍຸ 42 ປີ, ປະຊາຊົນບ້ານກໍໄຮ່ ເມືອງອະນຸວົງ ພ້ອມທັງຢຶດຂອງກາງປະເພດຢາບ້າໄດ້ທັງໝົດຈຳນວນ 74 ເມັດ, ບັ້ງເສບຢາບ້າ ຈຳນວນ 7 ບັ້ງ, ປືນແກບ 1 ກະ ບອກ, ພ້ອມລູກປືນຈໍານວນໜຶ່ງ, ໂທສັບຈໍານວນ 4 ໜ່ວຍ, ໂຟນີ 1 ເຄື່ອງ ແລະ ເງິນສົດຈຳນວນ 2.600.000 ກີບ.

ຜ່ານການສືບສວນ-ສອບສວນຂອງເຈົ້າໜ້າທີ່ ຜູ້ກ່ຽວທັງສາມໄດ້ຮັບສະລາພາບວ່າ: ໄດ້ເລີ່ມຄ້າ-ຂາຍຢາຕັ້ງແຕ່ປີ 2015 ເປັນຕົ້ນມາ, ຢາບ້າທີ່ໄດ້ເອົາມາຂາຍແຕ່ລະຄັ້ງຜູ້ກ່ຽວໄດຊື້ນຳທ້າວ ຈູເຊັ່ງລໍ່ ຈຳນວນ 3 ຄັ້ງ ຄັ້ງລະ 10 ເມັດ. ຈາກນັ້ນ, ທ້າວ ຈົງຊົ່ງ ລູກຊາຍ ( ທ້າວ ເຢຊົ່ງ ) ໄດ້ນໍາເອົາຢາບ້າມາແຕ່ບ້ານ 516 ແລະ ລູກຊາຍຊື່ ທ້າວ ປາວ ຊົ່ງ ຢູ່ບ້ານຊຽງມີ ເປັນຜູ້ສົ່ງຢ່າໃຫ້ມາຂາຍຄັ້ງລະ 1-2 ຖົງ. ຄັ້ງສຸດທ້າຍ, ຜູ້ກ່ຽວໄດ້ຊື້ຢາບ້ານໍາທ້າວ ເຈວື ຈຳນວນ 74 ເມັດ ຈຶ່ງໄດ້ຖືກເຈົ້າໜ້າທີ່ກັກຕົວ ພ້ອມປືນຈຳນວນ 1 ກະບອກ ແລະ ລູກປືນຈຳນວນໜຶ່ງ, ສ່ວນທ້າວ ຢົວເຢຍຊົ່ງ ຜູ້ກ່ຽວແມ່ນໄດ້ອອກມາຫາທ້າວ ເຢຊົ່ງ ຈຸດປະສົ່ງແມ່ນມາສູບຝິ່ນຢູ່ທີ່ເຮືອນຂອງທ້າວ ເຢຊົ່ງ. ຈາກນັ້ນ, ພວກກ່ຽວ ໄດ້ພາກັນໄດ້ພາກັນໄປຂຸດຖ້ຳເຈົ້າອະນຸວົງ ເພື່ອຊອກຫາວັດຖຸທີ່ມີຄ່າໄດ້ໃຊ້ອຸປະກອນຄື: ຄ້ອນຕີຂະໜາດໃຫຍ່ 1 ອັນ, ເຫຼັກສະກັດ 4 ອັນ, ສຽມ 1 ດວງ ແລະ ທູບ-ທຽນ 1 ຫໍ່.

ຈາກການສັງເກດຕີລາຄາ ເຈົ້າໜ້າທີ່ ປກສ ເມືອງອະນຸວົງ ພວກກ່ຽວທັງສາມແມ່ນມີຄວາມຜິດແທ້, ຖານມີຢາ ເສບຕິດໄວ້ໃນຄອບຄອງ ແລະ ກະທຳຜິດແທ້, ເຊິ່ງຜິດຕໍ່ລະບຽບກົດໝາຍໃນມາດຕາ 146 ຂອງກົດໝາຍອາຍາ ພ້ອມທັງກັກຕົວຜູ້ຖືກຫາໄວ້ເພື່ອດຳເນີນຄະດີຕາມຂັ້ນຕອນກົດໝາຍ. ພ້ອມທັງດຳເນີນການສືບສວນ-ສອບສວນ ເພື່ອຂະຫຍາຍຜົນຕໍ່ໄປ.

ພາບ ແລະ ຂ່າວ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.