Header Ads

ປະທານ ສນຊ ເນັ້ນໃຫ້ລະດົມເຕົ້າໂຮມຄວາມສາມັກຄີ ເພື່ອປະກອບສ່ວນຊ່ວຍ ພັດທະນາປະເທດຊາດ



​ໃນ​ວັນ​ທີ 16 ມີນາ 2017 ທີ່​ຫໍ​ປະຊຸມ​ແຫ່ງ​ຊາດ  ນະຄອນຫລວງ​ວຽງຈັນ ທ່ານ ​ໄຊ​ສົມ​ພອນ ພົມວິຫານ ປະທານ ​ສູນ​ກາງ​ແນວ​ລາວ​ສ້າງ​ຊາດ (ສນຊ) ​ໄດ້​ໂອ້ລົມ ​ຕໍ່​ກອງ​ປະຊຸມຄົບ​ຄະນະ​ກຳມະການ​ສູນ​ກາງ​ແນວ​ລາວ​ສ້າງ​ຊາດ  ຄັ້ງ​ທີ 3 ສະ​ໄໝ​ທີ X ​ເຊິ່ງທ່ານ ​ໄດ້​ເນັ້ນ​ໃຫ້ ​ຄະນະ​ກຳມະການ​ສູນ​ກາງ​ແນວ​ລາວ​ສ້າງ​ຊາດ ​ທີ່​ໄດ້​ຮັບ​ການ​ແຕ່ງ​ຕັ້ງ​ໃໝ່ ​ແລະ ຄະນະ​ທີ່​ປຶກສາ ​ເສດຖະກິດ ​ແລະ ກົດໝາຍ ແລະ ຄະນະທີ່​ປຶກສາ ​ທີ່​ໄດ້​ຖຶກ​ແຕ່ງ​ຕັ້ງ ​ເອົາ​ໃຈ​ໃສ່​ສ້າງ​ແຜນການ​ ເຄື່ອນ​ໄຫວ​ຕາມ​ພາລະ​ບົດບາດຂອງ​ຕົນ ເປັນ​ຕົ້ນ ​ການ​ປຸກລະດົມ​ຂົນຂວາຍ, ​ເຕົ້າ​ໂຮມ​ຄວາມ​ສາມັກຄີ, ​ເຜີຍ​ແຜ່ ​ແນວທາງ​ນະ​ໂຍບາຍ​ຂອງ​ພັກ, ລະບຽບ​, ກົດໝາຍ, ການ​ພັດທະນາ​ເສດຖະກິດ -ສັງຄົມ ​ແຕ່ລະ​ໄລຍະ​ ໃຫ້​ປະຊາຊົນ​ທຸກ​ຊັ້ນ​ຄົນ ຮັບ​ຮູ້ ແລະ ​ເຂົ້າ​ໃຈ​ຢ່າງ​ຖືກຕ້ອງ  ​ເພື່ອ​ປະກອບສ່ວນ​ ຊ່ວຍ​ພັດທະນາ ​ແລະ ສ້າງສາ​ປະ​ເທດ​ຊາດ ຕາມ​ເງື່ອນ​ໄຂ ​ທ່າ​ແຮງ ​ແລະ ຄວາມ​ສາມາດ​ຕົວ​ຈິງ.



ທ່ານ ​ໄຊ​ສົມ​ພອນ ພົມວິຫານ ຍັງ​ເນັ້ນ​ໜັກ ​ບາງ​ດ້ານ ​ເຊັ່ນ: ສະ​ເໜີ​ ໃຫ້​ແນວ​ລາວ​ສ້າງ​ຊາດ ​ນັບ​ແຕ່​ສູນ​ກາງ​ຮອດ​ທ້ອງ​ຖິ່ນ ສົມ​ທົບ​ກັບ​ຄະນະ​ພັກ, ອົງການ​ປົກຄອງ​ທ້ອງ​ຖິ່ນ ​ຂອງ​ຕົນ​ເອົາ​ໃຈ​ໃສ່​ກະກຽມ​ສ້າງ​ຂະ​ບວນການ ​ຕ້ອນຮັບ​ວັນ​ສ້າງ​ຕັ້ງ ​ແນວ​ລາວ​ສ້າງ​ຊາດ ຄົບຮອບ 68 ປີ​ ໃຫ້​ກວ້າງ​ຂວາງ​ດ້ວຍ​ ຮູບ​ແບບ​ຕ່າງໆ; ​ໃຫ້​ແນວ​ລາວ​ສ້າງ​ຊາດ​ຂັ້ນ​ທ້ອງ​ຖິ່ນ ​ສົມທົບ​ປຶກ​ສາ​ຫາລື ກັບ​ຄະນະ​ປະຈຳ​ພັກ​ແຂວງ,  ນະຄອນຫລວງ ​ເພື່ອ​ກຽມ​ສ້າງ​ ຂະ​ບວນການ​ຕ່າງໆ ຕ້ອນຮັບ​ວັນ​ສ້າງ​ຕັ້ງ ​ແນວ​ລາວ​ສ້າງ​ຊາດ ຄົບຮອບ 70 ປີ ​ໃນ​ປີ 2020; ​ໃຫ້​ຄະນະ ​ຮັບຜິດຊອບ​ໂຄງການ​ຕ່າ​ງໆ​ ຢູ່​ຂັ້ນ​ສູນ​ກາງ ​ກໍ​ຄື​ທ້ອງ​ຖິ່ນ ​ເອົາ​ໃຈ​ໃສ່​ຈັດ​ຕັ້ງ ​ປະຕິບັດ​ບັນ ດາ​ໂຄງການ​ຮ່ວມ​ມື ​ທີ່​ໄດ້​ເຊັນ​ສັນຍາ​ນຳ​ກັນ ລະຫວ່າງ​ ສູນ​ກາງ​ແນວ​ລາວ​ສ້າງ​ຊາດ ກັບ ​ກະຊວງ​ຊັບພະຍາ ກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ກະຊວງ​ ສາທາລະນະ​ສຸກ, ອົງການ​ຢູນິ​ເຊັບ, ອົງການ​ ອາຫານ​ໂລກ ​ແລະ ກຸ່ມ​ບໍລິ​ສັດ ​ພົງ​ສະຫວັນ ສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ​ ຕິດ​ພັນກັບ​ການ​ແກ້​ໄຂ​ຄວາມ ທຸກ​ຍາກ  ຢູ່​ເມືອງ​ລ່ອງ​ຊານ ​ແຂວງ​ ໄຊ​ສົມບູນ ​ໃຫ້​ມີ​ຜົນ​ຄືບ​ໜ້າ ​ໂດຍ​ປຸກ​ລະ​ດົມ​ ໃຫ້​ປະຊາຊົນ​ໃນ​ເຂດ​ເປົ້າ​ໝາຍ​ ໃຫ້​ມີ​ສ່ວນ​ຮ່ວມ​ກັບ​ບັນດາ​ກິດຈະກຳ  ​ເພື່ອ​ນຳ​ເອົາ​ຜົນ​ປະ​ໂຫຍ​ດ ມາສູ່​ປະຊາຊົນ; ​ໃຫ້​ຄະນະ​ຮັບຜິດຊອບ​ຮ່າງ ​ແລະ ປັບປຸງ​ກົດໝາ​ຍ ວ່າ​ດ້ວຍ​ແນວ​ລາວ​ສ້າງ​ຊາດ ​ເອົາ​ໃຈ​ໃສ່​ສືບ ​ຕໍ່​ປັບປຸງ, ຮຽບຮຽງ​ຮ່າງ​ກົດ ໝາຍ​ດັ່ງກ່າວ
  

ຕາມ​ກອງ​ປະຊຸມ​ຄະນະ​ລັດຖະບານ​ ປະຈຳ​ເດືອນ​ກຸມພາ ​ແລະ ກອງ​ປະຊຸມ​ຄະນະ​ປະຈຳ​ສູນ​ກາງ ​ແນວ​ລາວ​ສ້າງ​ຊາດ ​ເພື່ອ​ສະ​ເໜີ​ ຄະນະ​ປະຈຳ​ສະພາ​ແຫ່ງ​ຊາດ ນຳ​ເຂົ້າ​ຜ່ານ​ ໃນ​ກອງ​ປະຊຸມ​ສະ​ໄໝ​ສາ ມັນ​ເທື່ອ​ທີ່ 5 ຂອງ​ສະ​ແຫ່ງ​ຊາດ​ຊຸດ​ທີ VIII; ສຳລັບ​ວຽກ​ງານ​ຊົນ​ເຜົ່າ​ ໃຫ້​ແນວ​ລາວ​ສ້າງ​ຊາດ​ແຕ່ລະ​ຂັ້ນ ກໍ​ຄື​ຜູ້​ຊົງ​ຄຸນ​ວຸດ​ທິ  ຈະ​ຕ້ອງ​ໄດ້​ເອົາ​ໃຈ​ໃສ່​ວຽກ​ງານ ​ສຶກສາ​ອົບຮົມ​ການ​ເມືອງ​ແນວ​ຄິດ, ​ເຕົ້າ​ໂຮມ​ ຄວາມ​ສາມັກ ຄີ​ບັນດາ​ເຜົ່າ, ຊຸກຍູ້​ສົ່ງ​ເສີມ ​ແລະ ປົກ​ປັກ​ຮັກສາ​ຮີດ ຄອງ​ປະ​ເພນີ, ວັດທະນະທຳ​ອັນ​ດີງາມ ​ຂອງ ​ບັນດາ​ເຜົ່າ, ກວດກາ​ຄືນ​ຄວາມ​ເຊື່ອ​ຖື ​ທີ່​ບໍ່​ຖືກຕ້ອງ, ​ແນວ​ຄິດ​ໄຝ່ຝັນ, ບັນຫາ​ຫຍໍ້​ທໍ້​ ຂອງ​ເຜົ່າ​ເພື່ອ​ຊອກ​ວິທີ ​ແກ້​ໄຂ​ທີ່​ເໝາະ​ສົມ; ວຽກ​ງານ​ສາສະໜາ​ ໃຫ້​ເອົາ​ໃຈ​ໃສ່​ສຶກສາ​ອົບຮົມ ​ເຕົ້າ​ໂຮມ​ຄວາມ​ສາມັກຄີ​ ສາສະໜາ​ຕ່າງໆ​ເຂົ້າ​ຮ່ວມ ​ໃນ​ການ​ປະຕິບັດ​ແນວທາງ​ນະ​ໂຍບາຍ ​ຂອງ​ພັກ, ຫລັກ​ຄຳ​ສອນ​ຂອງ​ບັນດາ ​ສາສະໜາ​ຕ່າງໆ ສືບ​ຕໍ່​ຈັດ​ຕັ້ງ​ເຊືອມ​ຊຶມ ​ເອກະສານ​ຂອງ​ພັກ-ລັດ ​ໃຫ້​ສາສະໜາ​ຕ່າງໆ ຢູ່​ທ້ອງ​ຖິ່ນ ​ແລະ ປະສານ​ສົມທົບ​ໃນ​ການ​ປັບປຸງ ​ທຳ​ມະນູນ​ປົກຄອງ​ໃຫ້​ມີ​ຜົນສຳ​ເລັດ;  ສະ​ເພາະ​ ວຽກ​ງານ​ຄົນ​ເຊື້ອ​ຊາດ​ລາວ ​ໃຫ້​ເອົາ​ໃຈ​ໃສ່​ ປຸກລະດົມ​ຂົນຂວາຍ ​ເຕົ້າ​ໂຮມ​ຄວາມ​ສາມັກຄີ ​ພີ່ນ້ອງ​ຄົນ​ເຊື້ອ​ຊາດ​ລາວ ​ຢູ່​ຕ່າງປະ​ເທດ, ພ້ອມທັງ​ໃຫ້​ຊ່ວຍ​ອະທິບາຍ​ ເຖິງ​ສະພາບ​ຕົວ​ຈິງ​ການ​ສ້າງສາ ​ແລະ ພັດທະນາ​ ປະ​ເທດ​ຊາດ, ​ແນວທາງ​ນະ​ໂຍບາຍ​ ຂອງ​ພັກ-ລັດ ​ໃຫ້​ພີ່ນ້ອງ​ຊາວ​ລາວ​ ຢູ່​ຕ່າງປະ​ເທດ ​ໃຫ້​ເຂົ້າ​ໃຈ​ຢ່າງ​ຖືກຕ້ອງ ​ແລະ ​ເຊີນຊວນ​ພີ່ນ້ອງ​ຄົນ​ລາວ​ ຜູ້​ທີ່ ​ບໍ່​ທັນ​ເຄີຍ​ມາ​ຢ້ຽມ ຢາມ​ບ້ານ​ເກີດ​ເມືອງ​ນອນ​ ຂອງ​ຕົນ ​ໃຫ້​ອ່ວຍ​ກັບ​ຄືນ​ມາ​ປະກອບສ່ວນ​ ສ້າງສາ​ພັດທະນາ​ປະ​ເທດ​ຊາດ  ຕາມ​ເງື່ອນ​ໄຂ ​ແລະ ຄວາມ​ສາມາດ ​ຂອງ​ຕົນ.

ພ້ອມ​ນີ້, ​ໃຫ້​ແນວ​ລາວ​ສ້າງ​ຊາດ​ ແຕ່ລະ​ຂັ້ນ​ ເອົາ​ໃຈ​ໃສ່​ສືບ​ຕໍ່​ຜັນ​ຂະ​ຫຍາ​ຍ ບົດ​ບັນທຶກ​ການ​ຮ່ວມ​ມື 3 ປະທານ​ແນວ​ໂຮມ (ລາວ-ຫວຽດນາມ-ກຳປູ​ເຈຍ), ບົດ​ບັນທຶກ ​ການ​ຮ່ວມ​ມື​ ວຽກ​ງານ​ເສີມ​ສ້າງ​ ຊາຍ​ແດນ​ສັນ ຕິພາບ, ມິດຕະພາບ ​ໂດຍ​ສະ​ເພາະ ​ບັນດາ​ແຂວງ​ທີ່​ມີ​ຊາຍ​ແດນ​ ຕິດ​ຈອດ​ກັນ ​ເພື່ອ​ເພີ່ມ​ທະວີ​ການ​ໂຄສະນາ ​ມູນ​ເຊື້ອສາຍ​ພົວພັນ​ມິດຕະພາບ​ ການ​ຮ່ວມ​ມື, ການ​ຊ່ວຍ​ເຫລືອ ​ເຊິ່ງກັນ ​ແລະ ກັນ ​ໃນ​ການ ​ພັດທະນາ​ເສດ ຖະກິດ-ສັງຄົມ, ຊ່ວຍ​ເຫລືອ​ກັນ​ ໃນ​ການ​ກໍ່ສ້າງ​ພື້ນຖານ​ໂຄ່ງ​ລ່າງ, ​ແກ້​ໄຂ​ຜົນ​ຮ້າຍ​ ຈາກ ​ໄພ​ພິບັດ​ທຳ​ມະ​ຊາດ, ປຸກລະດົມ​ຂົນຂວາຍ​ ປະຊາຊົນ​ສ້າງ​ຊາຍ​ແດນ ​ເປັນ​​ເສັ້ນ​ຊາຍ​ແດນ ​ແຫ່ງ​ສັນຕິພາບ, ມິດຕະພາບ, ສະຖຽນ​ລະ​ພາບ, ການ​ຮ່ວມ​ມື ​ແລະ ການ​ພັດທະນາ.


ຂ່າວ: ສົມ​ຫວັງ ພາບ: ​ໄອ່​ຄຳ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.