Header Ads

ເຜີຍຄວາມຮູ້ສູ່ຜູ້ປະກອບການ ເພື່ອຮ່ວມຊີງລາງວັນທຸລະກິດອາຊຽນດີເດັ່ນທີ່ສິງກະໂປ



ສະພາການຄ້າ ແລະ ອຸດສາຫະກຳແຫ່ງຊາດລາວ ( ສຄອຊ ) ໄດ້ມີງານພົບປະ ແລະ ແລກປ່ຽນຂໍ້ມູນກ່ຽວກັບງານຊີງລາງວັນທຸລະກິດອາຊຽນດີເດັ່ນແຫ່ງ ສປປ ລາວ 2018 ຂຶ້ນໃນທ້າຍເດືອນມີນາຜ່ານມາ ທີ່ໂຮງແຮມເມີກຽວ ໂດຍການເຂົ້າຮ່ວມຂອງ ທ່ານ ທະນົງສິນ ກັນລະຍາ ຮອງປະທານ ສຄອຊ, ມີທ່ານ ເຢັນສ ເພເທີລິດເຄັນແຮມ ເອກອັກຄະລັດຖະທູດ ສາທາລະນະລັດ ສະຫະພັນເຢຍລະມັນ ປະຈຳ ສປປ ລາວ, ບັນດານັກທຸລະກິດທີ່ໄດ້ຮັບລາງວັນຊະນະເລີດໃນປີຜ່ານມາ ແລະ ບັນດາຜູ້ຕາງໜ້າຈາກບັນດາບໍລິສັດຕ່າງໆເຂົ້າຮ່ວມ.



ທ່ານ ທະນົງສິນ ກັນລະຍາ ກ່າວວ່າ: ສຳລັບປີນີ້ການແຂ່ງຂັນລາງວັນລະດັບພາກພື້ນຈະໄດ້ຈັດຂຶ້ນທີ່ປະເທດສິງກະໂປ ປະມານເດືອນພະຈິກ ແລະ ປະເທດລາວໄດ້ສຸມໃສ່ລາຍການເຂົ້າຮ່ວມແຂ່ງຂັນ ຄື: ພາກທຸລະກິດສາມາດເຊື່ອມໂຍງກັບພາກພື້ນໄດ້ ມີຄື: ໄອຊີທີ, ທຸລະກິດຍິງ, ຂາຍຍ່ອຍ, ຕັດຫຍິບ, ຫັດຖະກໍາ, ການທ່ອງທ່ຽວ, ພະລັງງານ, ຜະລິດຕະພັນ ຫຼື ເຟີນີເຈີທີ່ເຮັດດ້ວຍໄມ້. ນອກນັ້ນ, ພວກເຮົາຍັງມີລາງວັນທຸລະກິດຂະໜາດນ້ອຍ ແລະ ກາງ ແລະ ພວກເຮົາຈະໄດ້ເລືອກເອົາ 2 ບໍລິສັດ ທີ່ຊະນະເລີດແຕ່ລະລາຍການ; ທຸລະກິດທີ່ມີສ່ວນ ຮ່ວມທາງສັງຄົມ; ທຸລະກິດແມ່ຍິງໜຸ່ມ.


ທ່ານ ເຢັນສ ເພເທີລິດເຄັນແຮມ ກ່າວວ່າ: ການໄດ້ຮັບລາງວັນທຸລະກິດອາຊຽນດີເດັ່ນ ເປັນທ່າແຮງໜຶ່ງທີ່ສຳຄັນເພື່ອສາມາດແຂ່ງຂັນທຸລະກິດອາຊຽນ ແລະ ໃນການສ້າງເຄືອຂ່າຍກັບບັນດາບໍລິສັດທີ່ມີຄວາມສາມາດໃນການແຂ່ງຂັນ ແລະ ງ່າຍໃນການເຂົ້າຫາເຕັກໂນໂລຊີການລົງທຶນຕ່າງໆ. ນອກຈາກນັ້ນ, ລາງວັນດັ່ງກ່າວຍັງສະແດງໃຫ້ເຫັນບໍລິສັດລາວປະສົບຄວາມສຳເລັດ ແລະ ເປັນການຊຸກຍູ້ທຸລະກິດອື່ນໃນການປັບປຸງຕົນເອງ ແລະ ລັດຖະບານເຢຍລະ ມັນ ແມ່ນມີຄວາມຕັ້ງໃຈສະໜັບສະໜູນກ່ຽວກັບລາງວັນທຸລະກິດແຫ່ງ ສປປ ລາວ ແລະ ໃຫ້ລາວມີຄວາມສາມາດປະກອບສ່ວນເຊື່ອມໂຍງເຂົ້າກັບບັນດາປະເທດໃນເອີຣົບ ໂດຍສະເພາະແມ່ນບັນດາທຸລະກິດຂະໜາດນ້ອຍ ແລະ ກາງ.


ດ້ານ ທ່ານ ຕີ ຊິເຊັງ ຜູ້ພັດທະນາເຂດເສດຖະກິດພິເສດ ສະຫວັນ - ເຊໂນ ທີ່ໄດ້ຮັບລາງວັນນັກທຸລະກິດອາຊຽນດີເດັ່ນໃນປີ 2017 ໃຫ້ສຳພາດວ່າ: ບໍລິສັດຂອງພວກຂ້າພະເຈົ້າແມ່ນເປັນຜູ້ພັດທະນາເຂດເສດຖະກິດພິເສດ ສະຫວັນ - ເຊໂນ ເພື່ອຊອກວຽກເຮັດງານທຳໃຫ້ແກ່ປະຊາຊົນໃຫ້ມີຄວາມກ້າວໜ້າ. ປັດຈຸບັນມີບໍລິສັດທີ່ມາລົງທຶນໃນເຂດເສດຖະກິດພິເສດແຫ່ງນີ້ປະມານ 55 ບໍລິສັດ ເຊິ່ງໃນປີກາຍນີ້ບໍລິສັດຂອງພວກເຮົາໄດ້ເຂົ້າຮ່ວມການປະກວດ ແລະ ໄດ້ຮັບລາງ ວັນດັ່ງກ່າວ ມັນເປັນສິ່ງທີ່ພາກພູມໃຈຫຼາຍຂອງບໍລິສັດ.

ພາບ ແລະ ຂ່າວ: ນສພ ເສດຖະກິດ-ການຄ້າ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.