Header Ads

ລັດຖະບານ ປຶກສາຫາລືກ່ຽວກັບການພັດທະນາເສດຖະກິດ-ສັງຄົມ ປະຈຳປີ 2018 ທີ່ເມືອງ ວຽງໄຊ ແຂວງ ຫົວພັນ



ກອງປະຊຸມລັດຖະບານເປີດກວ້າງ ຄັ້ງທີ 1 ປະຈໍາປີ 2018 ຈັດຂຶ້ນຢູ່ເມືອງ ວຽງໄຊ ແຂວງ ຫົວພັນ ໃນວັນທີ 22-23 ມີນາ 2018 ນີ້ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ຊຶ່ງເປັນກອງປະຊຸມສັນຈອນເທື່ອທໍາອິດທີ່ມີລັກສະນະພິເສດຂອງຄະນະລັດຖະບານຊຸດທີ 8 ໂດຍຈັດຂຶ້ນໃນໄລຍະເວລາທີ່ພໍດີກັບວັນສ້າງຕັ້ງພັກປະຊາຊົນ ປະຕິວັດລາວ ວັນທີ 22 ມີນາ ຄົບຮອບ 63 ປີ (22 ມີນາ 1955-22 ມີນາ 2018). 


ບັນດາຜູ້ເຂົ້າຮ່ວມກອງປະຊຸມ ໄດ້ຮັບຟັງ ແລະ ປະກອບຄໍາເຫັນຢ່າງກົງໄປກົງມາຕໍ່ການເຜີຍແຜ່ແນະນໍາ ແລະ ຊຸກຍູ້ແຕ່ຫົວທີກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2018 ລວມມີ: 

- ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2018, ບັນດາໂຄງການຈຸດສຸມພັດທະນາຂອງລັດຖະບານຢູ່ສູນກາງ ແລະ ທ້ອງຖິ່ນ, ການປັບປຸງຄວາມສະດວກໃນການດໍາເນີນທຸລະກິດ ແລະ ການລົງທຶນຜ່ານປະຕູດຽວ.

- ການຜັນຂະຫຍາຍຜົນ ແລະ ການຈັດຕັ້ງປະຕິບັດແຜນການຮ່ວມມືລາວ-ຫວຽດນາມ, ການຜັນຂະຫຍາຍ ແລະ ການຈັດຕັ້ງປະຕິບັດແຜນການຮ່ວມມືລາວ-ຈີນ.

- ສະພາບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາ 2 ເດືອນ, ຄາດຄະເນງວດ 1 ແລະ ຄາດຄະເນ 6 ເດືອນຕົ້ນປີ 2018 ແລະ ທິດທາງແຜນການປີ 2018.

- ການຈັດຕັ້ງປະຕິບັດແຜນພັດທະນາຊົນນະບົດ ແລະ ລຶບລ້າງຄວາມທຸກຍາກ, ການສົ່ງເສີມການຜະລິດເປັນສິນຄ້າ ແລະ ຄໍ້າປະກັນສະບຽງອາຫານ.

- ການຄຸ້ມຄອງລາຄາສິນຄ້າ ແລະ ການບໍລິການ, ການດັດສົມໂຮງງານປຸງແຕ່ງໄມ້, ການສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ.

- ສະພາບການຈັດຕັ້ງປະຕິບັດປີທ່ອງທ່ຽວລາວ 2018.

- ຄວາມຄືບໜ້າໃນການກະກຽມໃມສະເຫຼີມສະຫຼອງວັນສ້າງຕັ້ງເມືອງວຽງໄຊ ຄົບຮອບ 50 ປີ.

ໃນໂອກາດກ່າວເປີດກອງປະຊຸມຄັ້ງນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ກ່າວບາງຕອນວ່າ: ຈຸດປະສົງຂອງການຈັດກອງປະຊຸມລັດຖະບານຢູ່ເມືອງວຽງໄຊໃນຄັ້ງນີ້ ເນື່ອງຈາກວ່າສະຖານທີ່ດັ່ງກ່າວ ເປັນສະຖານທີ່ໆມີຄວາມໝາຍ, ຄວາມສໍາຄັນຍິ່ງ, ເປັນຖິ່ນກໍາເນີດຂອງສູນບັນຊາສູ້ຮົບ ແລະ ຖານທີ່ໝັ້ນຂອງການປະຕິວັດ, ທັງເປັນຈຸດກໍາເນີດຂອງ ສປປ ລາວ. ປີນີ້ຍັງເປັນປີກະກຽມການສະເຫຼີມສະຫຼອງວັນສ້າງຕັ້ງເມືອງວຽງໄຊ ຄົບຮອບ 50 ປີ (30 ພະຈິກ 1968-30 ພະຈິກ 2018). ພ້ອມກັນນີ້ກໍ່ເປັນປີທີ່ພວກເຮົາຫາກໍ່ສະເຫຼີມສະຫຼອງວັນປົດປ່ອຍຜາຖີ່ ຄົບຮອບ 50 ປີ (11 ມີນາ 1968-11 ມີນາ 2018). ສິ່ງສໍາຄັນກວ່ານີ້ ແມ່ນການສ້າງເງື່ອນໄຂໃຫ້ພວກເຮົາໝົດທຸກຄົນໄດ້ທົບທວນ ແລະ ລໍ້າລຶກເຖິງບຸນຄຸນອັນໃຫຍ່ຫຼວງ ສູງສົ່ງຂອງຜູ້ນໍາປະຕິວັດ, ບຸນຄຸນຂອງການປະຕິວັດ, ບຸນຄຸນອັນໃຫຍ່ຫຼວງທີ່ຝັ່ງໄວ້ໃນຫົວໃຈຂອງປະຊາຊົນລາວຕະຫຼອດໄປ ໂດຍສະເພາະແມ່ນຜູ້ເສຍສະຫຼະເພື່ອພາລະກິດຂອງການປະຕິວັດ ປົດປ່ອຍຊາດ, ປົດປ່ອຍປະຊາຊົນອອກຈາກການຄອບຄອງຂອງຈັກກະພັດລ່າເມືອງຂຶ້ນ ເຊິ່ງນໍາມາເຖິງປັດຈຸບັນ ຄື: ການປົກປັກຮັກສາ ແລະ ພັດທະນາ ສປປ ລາວຂອງພວກເຮົາ, ພ້ອມນີ້ ທ່ານນາຍົກລັດຖະມົນຕີ ຍັງໄດ້ຮຽກຮ້ອງມາຍັງຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບຂອງຕົນເຂົ້າໃນການປະກອບຄໍາເຫັນຢ່າງກົງໄປກົງມາ, ກະທັດຮັດ ແລະ ມີຈຸດສຸມ ໂດຍລົງເລິກເຖິງຂໍ້ຄົງຄ້າງທີ່ຍັງປະຕິບັດບໍ່ທັນໄດ້ດີ, ວິເຄາະວິໄຈເຖິງສາຍເຫດ ແລະ ສະເໜີທິດທາງ, ມາດຕະການແກ້ໄຂຕົວຈິງ ເພື່ອຮັບປະກັນການຄຸ້ມຄອງ ແລະ ບໍລິຫານປະເທດດໍາເນີນໄປດ້ວຍປະສິດທິພາບ ແລະ ມີປະສິດທິຜົນສູງ.
ຂ່າວ-ພາບ: ບຸນຕຽງ ຈັນທະວົງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.