Header Ads

ເຈົ້າໜ້າທີ່ຄຳມ່ວນເຂັ້ມງວດ 3 ເດືອນ ສາມາດຢຶດສັດປ່າຜິດກົດໝາຍ 337 ໂຕ



ເຈົ້າໜ້າທີ່ກວດກາສັດນ້ຳ-ສັດປ່າ ກອງກວດກາປ່າໄມ້ແຂວງຄຳມ່ວນ ສົບທົບກັບພາກສ່ວນທີ່ກ່ຽວຂ້ອງເຄື່ອນໄຫວ ຕິດຕາມ, ກວດກາການຫຼັກລອບຊື້-ຂາຍສັດນ້ຳ-ສັດປ່າ ແລະ ເຄື່ອງປ່າຂອງດົງທີ່ຜິດຕໍ່ລະບຽບກົດໝາຍ ຕາມສາຍທາງ, ຕະຫຼາດ, ແລວຊາຍແດນລະຫວ່າງປະເທດ ແລະ ສະຖານທີ່ຕ່າງໆ. ເຊິ່ງນັບແຕ່ຕົ້ນເດືອນມັງກອນ ຫາທ້າຍເດືອນມີນາ 2018 ສາມາດອາຍັດ ແລະ ຢຶດສັດປ່າທີ່ຜິດກົດໝາຍທັງສັດປ່າທີ່ຍັງມີຊີວິດ ແລະ ສັດປ່າທີ່ຕາຍແລ້ວໄດ້ທັງໝົດ 337 ໂຕ, ລວມນ້ຳໜັກເກືອບ 200 ກິໂລ ຊະນິດສັດປ່າທີ່ຢຶດໄດ້ປະກອບມີ: ໝູປ່າ, ຟານ, ໄກ່ປ່າ, ລີງ, ກະຮອກ, ໜູ, ແຫຼວ, ງູ, ນົກ ແລະ ອື່ນໆ.






ທ່ານ ສາລີ ໄຊຍະວົງ ຫົວໜ້າຂະແໜງກວດກາສັດນ້ຳ-ສັດປ່າ ກອງກວດກາປ່າໄມ້ແຂວງ ກ່າວວ່າ: ຈຳນວນ ສັດທີ່ຢຶດມາໄດ້ນີ້ ສຳລັບພາກສ່ວນທີ່ຍັງມີຊີວິດຢູ່ແມ່ນໄດ້ຄືນສູ່ທຳມະຊາດແລ້ວຈຳນວນ 84 ໂຕ, ລວມນ້ຳໜັກ 26,4 ກິໂລ, ສ່ວນທີ່ຕາຍແລ້ວແມ່ນໄດ້ເຜົາທຳລາຍແລ້ວຢູ່ທີ່ເມືອງຍົມມະລາດ ຈຳນວນ 90 ໂຕ, ລວມນ້ຳໜັກ 33 ກິໂລ ແລະ ອີກຈຳນວນ 163 ໂຕ, ລວມນ້ຳໜັກ 140,3 ກິໂລ ແມ່ນເຈົ້າໜ້າທີ່ກ່ຽວຂ້ອງໄດ້ທຳລາຍຖິ້ມດ້ວຍການຝັງດິນໃນວັນທີ 22 ມີນາ 2018 ທີ່ກອງກວດກາ ປ່າໄມ້ແຂວງຄຳມ່ວນ ເຊິ່ງເຂົ້າຮ່ວມໃນພິທີດັ່ງກ່າວມີທ່ານ ວຽງຄຳ ໄຊຍະພອນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີບັນດາເຈົ້າໜ້າທີ່ຈາກກອງກວດກາປ່າໄມ້ແຂວງ, ເຈົ້າໜ້າທີ່ຕຳຫຼວດ ແລະ ຂະແໜງການຕ່າງໆ ທີ່ກ່ຽວຂ້ອງເຂົ້າຮ່ວມ.


 ພາບ ແລະ ຂ່າວ: ຂ່າວແຂວງຄໍາມ່ວນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.