Header Ads

ປະກາດເມືອງວັງວຽງ ເປັນເມືອງສະຫະພັນແມ່ຍິງ 3 ດີ ຄັ້ງທີ 2 ໄລຍະ ປີ 2015-2017



ໃນວັນທີ 19 ມີນາ 2018 ຜ່ານມານີ້, ຢູ່ທີ່ສະໂມສອນເມືອງວັງວຽງ ແຂວງວຽງຈັນ ໄດ້ຈັດ ພິທີປະກາດເມືອງວັງວຽງ ເປັນສະຫະພັນແມ່ຍິງ ເມືອງ 3 ດີ ຄັ້ງທີ 2 ໄລຍະ ປີ 2015-2017 ຂຶ້ນຢ່າງເປັນທາງການ, ໂດຍພາຍໃຕ້ການເປັນປະທານ ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງເຈົ້າເມືອງໆວັງວຽງ. ມີ ທ່ານ ຈັນທະບູນ ໂພສາລາດ ປະທານສະຫະພັນແມ່ຍິງແຂວງວຽງຈັນ, ມີ ທ່ານນາງ ຂັນຄຳ ສີທານີ ກຳມະການພັກເມືອງ ປະທານສະຫະພັນແມ່ຍິງເມືອງວັງວຽງ, ມີປະທານສະຫະພັນແມ່ຍິງບ້ານ ແລະ ໜ່ວຍກົມກອງ, ມີພະນັກງານທີ່ກ່ຽວຂ້ອງ, ອຳນາດການປົກຄອງບ້ານ ແລະ ສະມາຊິກສະຫະພັນແມ່ຍິງ ເຂົ້າຮ່ວມຢ່າງພ້ອມພຽງ.





ໃນພິທີ ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ຍັງໄດ້ໃຫ້ກຽດກ່າວເປີດພິທີປະກາດເມືອງວັງວຽງ ເປັນສະຫະພັນແມ່ຍິງ ເມືອງ 3 ດີ ຄັ້ງທີ 2 ໄລຍະປີ 2015-2017 ຢ່າງເປັນທາງການ. ແລະ ຫລັງຈາກນັ້ນ ທ່ານນາງ ຂັນຄຳ ສີທານີ ກຳມະການພັກເມືອງ ປະທານສະຫະພັນແມ່ຍິງເມືອງວັງວຽງ ຍັງໄດ້ຂຶ້ນຜ່ານບົດລາຍງານການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງເມືອງວັງວຽງ ໄລຍະ 2015-2017 ວ່າ: ເມືອງວັງວຽງ ໄດ້ແບ່ງອອກເປັນ 6 ກຸ່ມບ້ານ, ມີ 63 ບ້ານ, ມີ 10.360 ຄົວເຮືອນ, ມີ 11.810 ຄອບຄົວ, ມີພົນລະເມືອງທັງໝົດ 57.493 ຄົນ, ຍິງ 29.044 ຄົນ, ທົ່ວເມືອງມີໜ່ວຍສະຫະພັນແມ່ຍິງ 115 ໜ່ວຍ, ໃນນັ້ນມີໜ່ວຍບ້ານ 63 ບ້ານ ແລະ 52 ໜ່ວຍກົມກອງອ້ອມຂ້າງເມືອງ, ມີຄະນະບໍລິຫານງານ 19 ສະຫາຍ, ມີສະມາຊິກສະຫະພັນແມ່ຍິງທັງໝົດ 8.047 ສະຫາຍ, ສະມາຊິກສະຫະພັນແມ່ຍິງຜູ້ເປັນພະນັກງານລັດຖະກອນ 620 ສະຫາຍ, ສະມາຊິກສະຫະພັນແມ່ຍິງທີ່ເປັນປະຊາຊົນມີ 6.613 ສະຫາຍ ແລະ ນັກຮຽນມີ 760 ສະຫາຍ, ຂະຫຍາຍສະມາຊິກສະຫະພັນແມ່ຍິງລາວໃໝ່ໄດ້ທັງໝົດ 1.211 ສະຫາຍ, ບໍາລຸງ-ຍົກລະດັບທາງດ້ານທິດສະດີການເມືອງ 45 ວັນ, ລວມ 74 ຄົນ, ຮຽນກົດໝາຍຊັ້ນຕົ້ນຈໍານວນ 57 ຄົນ, ເດັ່ນໃນການປູກເຂົ້າສາມາດສ້າງລາຍຮັບແຕ່ 20-50 ລ້ານຕໍ່ປີ, ມີ 9 ຄອບຄົວ, ການປູກໄມ້ໃຫ້ ໝາກສາມາດສ້າງລາຍຮັບແຕ່ 45-80 ລ້ານກີບຕໍ່ປີ, ມີ 10 ຄອບຄົວ. ການປູກຜັກສາມາດສ້າງລາຍຮັບແຕ່ 45 – 80 ລ້ານກີບຕໍ່ປີ, ມີ 33 ຄອບຄົວ. 




ການລ້ຽງສັດປີກສາມາດສ້າງລາຍຮັບໄດ້ແຕ່ 15 – 30 ລ້ານກີບຕໍ່ປີ,ມີ 23 ຄອບຄົວ. ການລ້ຽງໝູສາມາດສ້າງລາຍຮັບໄດ້ແຕ່ 50 – 150 ລ້ານກີບຕໍ່ປີ, ມີ 14 ຄອບຄົວ. ການຕໍ່າຫູກທໍ່ໄໝສາມາດສ້າງລາຍຮັບໄດ້ແຕ່ 10 – 20 ລ້ານກີບຕໍ່ປີ, ມີ 17 ຄອບຄົວ. ການຂາຍເຄື່ອງອຸດສາຫະກໍາ ແລະ ຂາຍເຄື່ອງຍ່ອຍ ສາມາດສ້າງລາຍຮັບໄດ້ແຕ່ 35-60 ລ້ານກີບຕໍ່ປີ, ມີ 8 ຄອບຄົວ. ເດັ່ນໃນການບໍລິການເຮືອນພັກ - ຮ້ານອາຫານ ສາມາດສ້າງລາຍຮັບໄດ້ແຕ່ 40-100 ລ້ານກີບຕໍ່ປີ, ມີ 9 ຄອບຄົວ. 



ຜ່ານການຈັດຕັ້ງປະຕິບັດຂໍ້ແຂ່ງຂັນ 3 ດີສະຫະພັນແມ່ຍິງ ເມືອງວັງວຽງ ເຊິ່ງສາມາດຮັບຮອງໜ່ວຍງານສະຫະພັນແມ່ຍິງ 3 ດີໄດ້ທັງໝົດ 115 ໜ່ວຍ, ໃນນີ້ໜ່ວຍກົມກອງອ້ອມຂ້າງໄດ້ 52 ໜ່ວຍ, ໜ່ວຍບ້ານໄດ້ 63 ໜ່ວຍ. ມີສະມາຊິກສະຫະພັນແມ່ຍິງ 3 ດີທັງໝົດ 7.927 ຄົນ, ໃນນີ້ມີສະມາຊິກ 3 ດີປະເພດ 1 ຈໍານວນ 5.587 ຄົນ, ສະມາຊິກ 3 ດີປະເພດ 2 ຈໍານວນ 2.340 ຄົນ. ເປັນພົນລະເມືອງດີມີ 7.610 ຄົນ, ພັດທະນາດີມີ 5.858 ຄົນ, ຄອບຄົວດີມີ 7.340 ຄົນ. ທິດທາງແຜນການຈັດຕັ້ງປະຕິບັດຂໍ້ແຂ່ງຂັນໃນປີຕໍ່ໜ້າ ໂດຍນໍາເອົາແນວທາງນະໂຍບາຍຂອງພັກ-ລັດຖະທໍາມະນູນ, ກົດໝາຍຂອງລັດ, ກົດລະບຽບແມ່ຍິງລາວ ແລະ ເອກະສານຕ່າງໆ ມາສຶກສາຄົ້ນຄວ້າໃຫ້ມີຄວາມຮັບຮູ້ເຊື່ອມຊື່ມເຂົ້າໃຈ, ສືບຕໍ່ຈອງວາລະສານໜັງສືພິມຂອງສູນກາງສະຫະພັນແມ່ຍິງລາວເພື່ອ ມາຈໍາໜ່າຍໃຫ້ເອື້ອຍນ້ອງແມ່ຍິງກໍ່ຄືການຈັດຕັ້ງທຸກພາກສ່ວນ, ສືບຕໍ່ປັບປຸງການຈັດຕັ້ງແມ່ຍິງຂັ້ນບ້ານ, ຂັ້ນໜ່ວຍກົມກອງໃຫ້ມີຄວາມເຂັ້ມແຂງໜັກແໜ້ນ.




ໃຫ້ກຽດຂຶ້ນມອບໃບຢັ້ງຢືນ ສະຫະພັນແມ່ຍິງ ເມືອງ 3 ດີ ຄັ້ງທີ 2 ປີ 2015-2017 ໂດຍທ່ານນາງ ຈັນທະບູນ ໂພສາລາດ ປະທານສະຫະພັນແມ່ຍິງແຂວງວຽງຈັນ ແລະ ກ່າວຮັບໂດຍ ທ່ານນາງ ຂັນຄຳ ສີທານີ ກຳມະການພັກເມືອງ ປະທານສະຫະພັນແມ່ຍິງເມືອງວັງວຽງ. ແລະ ຍັງໄດ້ມອບໃບຢັ້ງຢືນ ໜ່ວຍສະຫະພັນແມ່ຍິງ ບ້ານແລະກົມກອງ 3 ດີ ຄັ້ງທີ 2 ປີ 2015-2017 3 ດີ ໂດຍ ທ່ານ ຄຳຜອງ ດວງວິໄລ ເລຂາພັກເມືອງເຈົ້າເມືອງໆວັງວຽງ ແລະ ກ່າວຮັບໂດຍ ປະທານສະຫະພັນແມ່ຍິງບ້ານ ແລະ ກົມກອງ.

ຈາກນັ້ນ, ຄະນະປະທານກໍ່ໄດ້ຜັດປ່ຽນກັນຂຶ້ນໂອລົມ, ພ້ອມທັງໃຫ້ກຽດລັ່ນຄ້ອນ 9 ບາດ ແລະ ເປີດປ້າຍ ພິທີປະກາດເມືອງວັງວຽງ ເປັນສະຫະພັນແມ່ຍິງ ເມືອງ 3 ດີ ຄັ້ງທີ 2 ປີ 2015-2017 ໃນວັນທີ່ 19 ມີນາ 2018 ໂດຍສ່ອງໜ້າອຳນາດການປົກຄອງຂອງເມືອງວັງວຽງຕື່ມອີກ

ພາບ ແລະ ຂ່າວ: ຂ່າວແຂວງວຽງຈັນ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.