Header Ads

ສາລະວັນສັ່ງຢຸບໂຮງງານປຸງແຕ່ງໄມ້-ໂຮງຊ່າງໄມ້ 119 ແຫ່ງ





ອໍານາດການປົກຄອງແຂວງສາລະວັນໄດ້ເປີດເຜີຍອາທິດຜ່ານມານີ້ວ່າແຂວງຂອງຕົນໄດ້ມີການກວດຄົ້ນ ແລະ ສັ່ງໃຫ້ຢຸດເຊົາການເຄື່ອນດໍາເນີນທຸລະກິດໂຮງງານປຸງແຕ່ງໄມ້-ໂຮງຊ່າງຫັດຖະກໍາໄມ້ທີ່ບໍ່ສອດຄ່ອງກັບລະບຽບກົດໝາຍຈໍານວນ 119 ແຫ່ງ ຈາກທັງໝົດ 158 ແຫ່ງ ຂະນະທີ່ເຈົ້າໜ້າທີ່ສະເພາະກິດພາຍໃນແຂວງຍັງຢືນຢັນວ່າຈະສືບຕໍ່ເພີ່ມທະວີການລົງເຄື່ອນໄຫວກວດກາຕາມຈຸດຫລໍ່ແຫລມ ລວມທັງດັດສົມບັນດາທຸລະກິດຢ່າງເຄັ່ງຂັດບົນພື້ນຖານເນື້ອໃນຈິດໃຈຄໍາສັ່ງເລກທີ 15/ນຍ (ຫ້າມສົ່ງອອກໄມ້).

ທ່ານ ຄໍາຜ່ານ ສີລາວີ ຮັກສາການຫົວໜ້າພະແນກອຸດສາຫະກໍາ ແລະ ການຄ້າໄດ້ໃຫ້ສໍາພາດນັກຂ່າວສໍານັກຂ່າວສານປະເທດລາວອາທິດຜ່ານມານີ້ວ່າ: ພາຍຫລັງໄດ້ຮັບຄໍາສັ່ງຂອງນາຍົກລັດຖະມົນຕີສະບັບເລກທີ 15 ລົງວັນທີ 13 ພຶດສະພາ 2016 ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນ, ການເຄື່ອນຍ້າຍໄມ້ ແລະ ທຸລະກິດໄມ້ ພ້ອມນີ້ ກໍອີງຕາມຂໍ້ຕົກລົງຂອງເຈົ້າແຂວງສາລະວັນເລກທີ 469/ຈຂ.ສວ ລົງວັນທີ 8/09/2017ວ່າດ້ວຍການແຕ່ງຕັ້ງຄະນະສະເພາະກິດຂັ້ນແຂວງລົງກວດກາ, ປະເມີນຄືນໄມ້ຄ້າງໂຮງງານ ແລະ ການເຄື່ອນໄຫວຂອງໂຮງງານທ່ົວແຂວງສາລະວັນ ເຊິ່ງພົບວ່າສາມາດຍາດໄດ້ຜົນສໍາເລັດເປັນຮູບປະທໍາດັ່ງນີ້: ສາມາດຢຶດລົດລັກລອບແກ່ໄມ້ໄດ້ 7 ຄັນ,ກັກຢຶດຈັກສະຕິນຕັດໄມ້ໄດ້ 674 ເຄື່ອງ, ກັກຕົວຜູ້ກະທໍາຄວາມຜິດ 7 ຄົນ ( ລາວ 4 ຄົນ, ຫວຽດນາມ 2 ຄົນ, ຈີນ 1 ຄົນ), ໄດ້ມີການປັບໃໝໄມ້ ແລະ ມອບເຂົ້າງົບແລ້ວ 12.000 ກວ່າແມັດກ້ອນ ມູນຄ່າ 118 ລ້ານກີບ, ໄດ້ກັກຢຶດໄມ້ທັງໝົດ 1.200 ແມັດກ່ອນ. ພ້ອມນີ້ ກ່ອນການຈັດຕັ້ງປະຕິບັດຄໍາສັ່ງເລກທີ 15/ນຍ ພົບເຫັນໂຮງງານປຸງແຕ່ໄມ້ ແລະ ໂຮງຊ່າງຫັດຖະກໍາໄມ້ທົ່ວແຂວງ 158 ແຫ່ງ ແຕ່ປັດຈຸບັນໄດ້ມີການສັ່ງໂຈະ ແລະ ຢຸດເຊົາການເຄື່ອນໄຫວເຫລືອພຽງ 119 ແຫ່ງ ແລະ ຍັງໃຫ້ສືບຕໍ່ພຽງແຕ່ 39 ແຫ່ງເທົ່ານັ້ນ ແຕ່ມີທ່າອ່ຽງຈະຢຸດເຊົາໄປແບບອັດຕະໂນມັດໃນຕໍ່ໜ້າເນື່ອງຈາກບໍ່ມີວັດຖຸດິບປ້ອນໂຮງງານນັ້ນເອງ. 


ທີ່ມາ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.