Header Ads

ປີ 2017 ໄຊຍະບູລີ ປາບຄໍຣັບຊັ້ນ ເກັບເງິນຄືນຄັງລັດໄດ້ 6,7 ຕື້ກວ່າກີບ

ຕາມການລາຍງານຂອງ ທ່ານ ດວງຕາ ໄຊວຸດ ປະທານຄະນະກວດກາພັກແຂວງ ໄຊຍະບູລີ ຕໍ່ກອງປະຊຸມ ວຽກງານກວດກາທົ່ວແຂວງ ປະຈຳປີ 2017 ໃນລະຫວ່າງວັນທີ 27-28 ມີນາຜ່ານມາໃຫ້ຮູ້ວ່າ: 1 ປີ ຜ່ານມາຄະນະກວດກາພັກແຂວງແມ່ນໄດ້ຕິດຕາມ-ກວດກາການປະຕິບັດການກວດກາພະນັກງານລັດຖະກອນ ແລະພາກທຸລະກິດທີ່ກ່ຽວຂ້ອງຕາມລະບຽບກົດໝາຍຊຶ່ງມີຈໍານວນ 4 ເປົ້າໝາຍ, ໃນນີ້ຂັ້ນແຂວງ 3 ເປົ້າໝາຍ ແລະ ຂັ້ນເມືອງ 1 ເປົ້າໝາຍຖືວ່າເຫັນຂໍ້ກະທຳຜິດຫຼາຍຢ່າງ.






ໂດຍຜ່ານການລົງກວດສອບຕົວຈິງພົບເຫັນມູນຄ່າເສຍຫາຍເປັນສະກຸນເງິນກີບ 407 ລ້ານກວ່າກີບ, ສະກຸນເງິນບາດ 630.000 ບາດ, ສາມາດເກັບກູ້ໄດ້ຄືນເປັນສະກຸນເງິນກີບ 264 ລ້ານກວ່າກີບ, ສະກຸນເງິນບາດ 630.000 ບາດ, ພະນັກງານຖືກປະຕິບັດວິໄນ 4 ຄົນ, ໃນນີ້: ຖືກເອົາອອກຈາກລັດຖະການ 1 ຄົນ, ໄດ້ສະຫຼູບ ແລະ ປະກອບສໍານວນຄະດີສົ່ງອົງການໄອຍະການປະຊາຊົນແຂວງ 3 ຄົນ.


ໄດ້ຕິດຕາມ-ກວດກາຊຳລະໂຄງການຂາຍແບບມີສ່ວນຫຼຸດ 30-70% ຮັບເງິນເກີນ-ນັບເງິນຊໍ້າຊ້ອນມີ 9 ບໍລິສັດມີຜົນເສຍຫາຍທັງໝົດ 14,94 ຕື້ກີບ, ເກັບກູ້ຄືນໃຫ້ລັດ 14,28 ຕື້ກີບ, ຍັງຄ້າງ 662 ລ້ານກີບ; ໄດ້ດໍາເນີນການກວດກາ, ສືບສວນ-ສອບສວນພົບເຫັນ ພະນັກງານຂອງລັດ ມີພຶດຕິກໍາທີເປັນການສໍ້ລາດບັງຫຼວງ ຕາມມາດຕາ 11 ຂອງກົດໝາຍວ່າດ້ວຍການສໍ້ລາດບັງຫຼວງສະບັບປັບປຸງ ປີ 2013 ແລະ ຜູ້ປະກອບການກະທໍາຜິດຕໍ່ກົດໝາຍອາຍາ ທັງໝົດ 5 ເລື່ອງ, ມີ 21 ຄົນ, ຍິງ 02 ຄົນ, ສ້າງຄວາມເສຍຫາຍໃຫ້ແກ່ລັດ ຫຼື ລວມໝູ່ທັງໝົດ 7.621.313.127 ກີບ, ເກັບກູ້ຄືນໄດ້ 6.762.604.127 ກີບ, ໄດ້ຖືກສານຕັດສິນ ຈໍານວນ 1 ຄົນ, ຍິງ 1 ຄົນ, ສະຫຼຸບ ແລະ ປະກອບສໍານວນຄະດີສົ່ງອົງການໄອຍະການປະຊາຊົນແຂວງ ຈໍານວນ 5 ຄົນ, ກະກຽມສະຫຼຸບ ແລະ ປະກອບສໍານວນຄະດີ 1 ຄົນ, ຍິງ 1 ຄົນ, ດໍາເນີນການສືບສວນ-ສອບສວນ 1 ຄົນ, ປະຕິບັດວິໄນຕາມກົດລະບຽບຂອງພັກ ແລະ ກົດໝາຍລັດຖະກອນ 13 ຄົນ.





ນອກນີ້ຍັງໄດ້ເປັນເຈົ້າການຊີ້ນໍາ-ນໍາພາ ແລະ ຈັດຕັ້ງການແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນທົ່ວແຂວງ ໃນຮອບທີ II ປະຈໍາປີ 2017 ເຊິ່ງມີເປົ້າໝາຍແຈ້ງຊັບສິນ ແລະ ລາຍຮັບ ທັງໝົດ 10.740 ຄົນ, ຍິງ 4.786 ຄົນ, ໄດ້ຮັບເອກະສານແຈ້ງຊັບສິນ ແລະ ລາຍຮັບຕົວຈິງ ຈໍານວນ 10.638ຄົນ, ຍິງ 4.749 ຄົນໃນນີ້: ພະນັກງານຂັ້ນສູນກາງຄຸ້ມຄອງມີທັງໝົດ 43 ສະຫາຍ, ຍິງ 04 ສະຫາຍ; ສໍາເລັດການມອບ-ຮັບເອກະສານແລ້ວຈໍານວນ 41 ສະຫາຍ,ຍິງ 04 ສະຫາຍ; ຂັ້ນແຂວງຄຸ້ມຄອງ ເປົ້າໝາຍແຈ້ງຊັບສິນທັງໝົດ 2.135 ຄົນ, ຍິງ 879 ຄົນ ເຊິ່ງໄດ້ສໍາເລັດການມອບ-ຮັບເອກະສານຕົວຈິງ 2.135 ຄົນ, ຍິງ 879 ຄົນ; ຂັ້ນເມືອງຄຸ້ມຄອງ ເປົ້າໝາຍແຈ້ງຊັບສິນທັງໝົດ 8.562 ຄົນ, ຍິງ 3.903 ຄົນ.





ທ່ານຍັງໃຫ້ຮູ້ຕື່ມອີກວ່າ: ພັກ ແລະ ລັດເຮົາຍາມໃດກໍ່ຊີ້ໃຫ້ເຫັນເຖິງໄພອັນຕະລາຍຂອງການສໍ້ລາດບັງຫຼວງ ທັງເອົາໃຈໃສ່ນໍາພາສະກັດກັ້ນ ແກ້ໄຂບັນຫາດັ່ງກ່າວຕະຫຼອດມາ, ໃນນີ້ ຖືເອົາການສະກັດກັ້ນ ແຕ່ຫົວທີເປັນຕົ້ນຕໍ ແລະ ເປັນບັນຫາພື້ນຖານຍາວນານ; ຄະນະພັກ ແລະ ອົງການປົກຄອງແຕ່ລະຂັ້ນໄດ້ເອົາໃຈໃສ່ນໍາພາສຶກສາອົບຮົມ ໃຫ້ສະມາຊິກພັກ-ພະນັກງານຮັບຮູ້ເຂົ້າໃຈ ແລະ ປຸກລະດົມເຂົ້າຮ່ວມການສະກັດກັ້ນຕ້ານການສໍ້ລາດບັງຫຼວງ; ພ້ອມກັນນັ້ນກໍ່ໄດ້ປັບປຸງ, ອອກມະຕິ ແລະ ນິຕິກໍາລຸ່ມກົດໝາຍຫຼາຍສະບັບ ເປັນຕົ້ນ: ມະຕິວ່າດ້ວຍວຽກງານຄຸ້ມຄອງທີ່ດິນ, ຄໍາສັ່ງ ວ່າດ້ວຍການປະຢັດລາຍຈ່າຍງົບປະມານ, ດໍາລັດວ່າດ້ວຍການຄຸ້ມຄອງລົດປະຈໍາຕໍາແໜ່ງ, ຂໍ້ຫ້າມ ແລະ ວິໄນຂອງພະນັກງານການເງິນ, ປັບປຸງບົດແນະນໍາການແຈ້ງຊັບສິນ ແລະ ໄດ້ຫັນເອົາຍຸດທະສາດຕ້ານການສໍ້ລາດບັງຫຼວງເຂົ້າໃນຫຼັກສູດການຮຽນ-ການສອນຊັ້ນອານຸບານ, ປະຖົມ, ມັດທະຍົມຕອນຕົ້ນ, ຕອນປາຍ ແລະ ນິຕິກໍາອື່ນໆ.



ແຫຼ່ງຂ່າວຈາກ: ແຂວງໄຊຍະບູລີ

No comments

Powered by Blogger.