Header Ads

ການເປີດຖໍ້າຊ້າງນ້ອຍເປັນແຫຼ່ງທ່ອງທ່ຽວທາງດ້ານທຳມະຊາດ




ເມືອງຄອບ ແຂວງໄຊຍະບູລີ ໄດ້ຈັດພິທີເປີດ ຖໍ້າຊ້າງນ້ອຍ ບ້ານເຄິ່ງຫຼັກຄຳ ໃຫ້ເປັນແຫລ່ງທ່ອງທ່ຽວ ທາງດ້ານທຳມະຊາດຂອງເມືອງ ໃນ ວັນທີ 30 ມີນາ 2018 ທີ່ຜ່ານມານີ້.





ໂດຍໃຫ້ກຽດການເຂົ້າຮ່ວມຂອງ ທ່ານ ພົມ ມິ່ງບຸບຜາ ເຈົ້າເມືອງໆຄອບ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ອົງການ, ກົມກອງ, ນັກທຸລະກິດຜູ້ປະກອບການຕະຫຼາດຮອດອຳນາດການປົກຄອງບ້ານ ແລະ ປະຊາຊົນບ້ານເຄິ່ງຫຼັກຄຳເຂົ້າຮ່ວມ.
ໃນພິທີ ທ່ານ ຄຳຈັນ ອຸປະສິດ ຫົວໜ້າຫ້ອງການຖະແຫຼ່ງຂ່າວ ວັດທະນະທຳ ແລະ ການທ່ອງທ່ຽວເມືອງຄອບ ໃຫ້ກຽດຂຶ້ນລາຍງານໂດຍຫຍໍ້ໃນການຈັດຕັ້ງປະຕິບັດເປີດຖໍ້າຊ້າງນ້ອຍເປັນແຫຼ່ງທ່ອງທ່ຽວ ໂດຍອີງຕາມແຜນຍຸດທະສາດຂອງການທ່ອງທ່ຽວ ຂອງກະຊວງ ຖະແຫຼ່ງຂ່າວ ວັດທະນະທຳ ແລະ ການທ່ອງທ່ຽວ ກໍ່ຄືແຂວງ ເວົ້າລວມເວົ້າສະເພາະກໍ່ຄືແຜນພັດທະນາການທ່ອງທ່ຽວປີ 2018 ຂອງເມືອງຄອບ ໄດ້ຈັດຕັ້ງປະຕິບັດໃຫ້ປະກົດຜົນເປັນຈິງ ຊື່ງເມືອງຄອບໄດ້ກຳນົດແຫຼ່ງທ່ອງທ່ຽວມີທັງໝົດ 13 ແຫ່ງ ໃນນີ້ຈຸດຖ້ຳຊ້າງນ້ອຍກໍ່ເປັນໜຶ່ງຂອງການພັດທະນາທ່ອງທ່ຽວທຳມະຊາດຂອງເມືອງ.


ຖ້ຳຊ້າງນ້ອຍເປັນຖ້ຳໜຶ່ງທີ່ມີປະຫວັດຄວາມເປັນມາອັນຍາວນານມາແຕ່ດຶກດຳບັນ ແລະ ເປັນຖ້ຳທີ່ມີຄວາມສວຍສົດງົດງາມ ຈາກປາກຖ້ຳເຂົ້າໄປໃນມີລວງຍາວປະມານ 100 ກວ່າແມັດ ທາງໃນມີຫຼາຍຮູຫຼາຍມູມ ໃຫ້ນັກທ່ອງທ່ຽວໄດ້ເລືອກເຂົ້າໄປທ່ຽວຊົມ ໃນບໍລິເວນປາກຖ້ຳ ມີທົ່ງພຽງ ແລະ ຕົ້ນໄມ້ໃຫຍ່ຫຼາຍຊະນິດ ອາກາດຊຸມເຢັນຕະຫຼອດປີ ເໝາະສຳລັບການທ່ຽວຊົມສະຖານທີ່ຖ້ຳທຳມະຊາດ ເພື່ອພັກຜ່ອນ ແລະ ສະບາຍໃຈໃນແຕ່ລະປີ ເມື່ອຮອດປີໃໝ່ລາວກໍ່ມີບັນດານັກຮຽນ ຫຼື ປະຊາຊົນພາຍໃນເທດສະບານເມືອງກໍ່ໄດ້ໄປທ່ຽວຊົມທີວທັດທຳມະຊາດເປັນຈຳນວນຫຼວງຫຼາຍໃນແຕ່ລະປີ ສະຖານທີ່ແຫ່ງນີ້ ຫ່າງຈາກເທດສະບານເມືອງປະມານ 3 ກິໂລແມັດກວ່າ.


ໃນໂອກາດດຽວກັນນີ້ ທ່ານ ພົມ ມິ່ງບຸບຜາ ເຈົ້າເມືອງໆຄອບ ໄດ້ຂຶ້ນໃຫ້ທິດແນະນຳບາງບັນຫາທີ່ສຳຄັນ ໂດຍໃຫ້ໜ່ວຍງານທີ່ກ່ຽວຂ້ອງປະສານສົມທົບກັບອຳນາດການປົກຄອງບ້ານພ້ອມກັນພັດທະນາສະຖານທີ່ແຫ່ງນີ້ໃຫ້ກາຍເປັນສະຖານທີ່ທ່ອງທ່ຽວດ້ານທຳມະຊາດ ທັງສ້າງໃຫ້ມີຫຼາກຫຼາຍກິດຈະກຳເພື່ອເປັນການຮອງຮັບ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາຊົມນັບມື້ນັບຫຼາຍຂຶ້ນ.


ພາບ-ຂ່າວ: ວສລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.