ເພື່ອອະນາຄົດຂອງປະເທດ.... ຄຳໂອວາດຂອງ ທ່ານທອງລຸນ ສີສຸລິດ

ເພື່ອອະນາຄົດຂອງປະເທດ

“…ຄົນລຸ້ນຜ່ານມາ ໄດ້ຕໍ່ສູ້ກູ້ຊາດ, ເສຍສະຫຼະເລືອດເນື້ອ, ເຫື່ອແຮງ ເພື່ອນຳເອົາຄວາມເປັນເອກະ ລາດ, ອຳນາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ຄວາມຢູ່ດີກິນດີມາໃຫ້ພວກລູກພວກຫຼານແລ້ວ. ສະນັ້ນ, ຜູ້ທີ່ຈະສືບຕໍ່ປົກປັກຮັກສາປະເທດຊາດ ໃຫ້ມີຄວາມໝັ້ນຄົງ, ຍືນຍົງ ແລະ ໄດ້ຮັບການພັດທະນາ ໃຫ້ມີຄວາມກ້າວໜ້າສີວິໄລ ໃນພາຍພາກໜ້າ ແມ່ນພວກລູກພວກຫຼານທີ່ນັ່ງຢູ່ໃນທີ່ນີ້ ລວມທັງ ເຍົາວະຊົນ, ນັກ ຮຽນ, ນັກສຶກສາ ໝົດທຸກຄົນໃນທົ່ວປະເທດ…”

ນີ້ແມ່ນຄຳເຫັນບາງຕອນ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ໂອ້ລົມຕໍ່ຄູອາຈານ ແລະ ນັກຮຽນ ມັດທະຍົມສົມບູນ ນ້ຳຮອນ, ເມືອງໝື່ນ, ແຂວງວຽງຈັນ ໃນວັນທີ 14 ມີນາ 2017.


ດ້ວຍຄວາມເປັນຫ່ວງເປັນໃຍຕໍ່ອະນາຄົດຂອງປະເທດຊາດ ກໍ່ຄື ອະນາຄົດພວກຂອງລູກຫຼານນັກຮຽນ ມັດທະຍົມສົມບູນນ້ຳຮອນ ເວົ້າສະເພາະ, ເວົ້າລວມ ເຍົາວະຊົນ, ນັກຮຽນ, ນັກສຶກສາ ໝົດທຸກຄົນໃນທົ່ວປະເທດ, ທ່ານ ທອງລຸນ ສີສຸລິດ ໄດ້ມີຄຳເຫັນກ່າວຢໍ້າຜ່ານຄູອາຈານ ແລະ ນັກຮຽນ ມັດທະຍົມສົມບູນນ້ຳຮອນວ່າ: ຜູ້ທີ່ຈະສືບຕໍ່ນຳພາປະເທດຊາດ ໃຫ້ກ້າວໄປຂ້າງໜ້າໄດ້ໃນອະນາຄົດ ຕ້ອງແມ່ນບຸກຄົນທີ່ມີຄວາມຮູ້ຄວາມ ສາມາດ, ເປັນຄົນດີ-ຄົນເກັ່ງ, ມີຄຸນສົມບັດສິນທຳປະຕິວັດ.

ມີຄວາມຮູ້ຄວາມສາມາດ: ພວກລູກພວກຫຼານ ຍັງໜຸ່ມຍັງນ້ອຍ, ອະນາຄົດຍັງຍາວໄກ ຈົ່ງພ້ອມກັນເອົາໃຈໃສ່ ຕັ້ງໃຈຄົ້ນຄວ້າ-ສຶກສາຮໍ່າຮຽນ, ຮຽນໃຫ້ເກັ່ງ, ເສັງໃຫ້ໄດ້, ນຳໃຊ້ໃຫ້ເປັນ; ເຊື່ອຟັງຄຳສັ່ງສອນຂອງພໍ່-ແມ່, ອ້າຍ-ເອື້ອຍ, ຄູ-ອາຈານ ແລະ ການຈັດຕັ້ງ; ອອກແຮງຝຶກຝົນຫຼໍ່ຫຼອມຕົນເອງ ໃຫ້ກາຍເປັນຄົນຮູ້ຜູ້ດີ. ໂດຍສະເພາະຄວາມສະເພາະດ້ານ ທີ່ຈະໃຊ້ໃນການປະກອບວຽກງານ. ບໍ່ວ່າຈະເຮັດວຽກສ່ວນຕົວ, ເຮັດວຽກນຳພາກລັດ ກໍ່ຄືເອກະຊົນ. ຖ້າຂາດຄວາມຮູ້ ບໍ່ມີການຄົ້ນຄວ້າ ່ແລະ ສະແຫວງຫາຄວາມຮູ້ໃໝ່ໆ ກໍ່ຈະເຮັດໃຫ້ ຂາດສັກກະຍະພາບ ໃນດ້ານການເຮັດວຽກງານຕ່າງໆ.

ເປັນຄົນດີ-ຄົນເກັງ: ເປັນພົນລະເມືອງດີຂອງປະເທດຊາດ, ເປັນນັກຮຽນດີ-ຮຽນເກັ່ງ ແລະ ມີລະບຽບວິໄນ ຂອງຄູອາຈານ, ເປັນລູກຮັກຫຼານແພງຂອງພໍ່ແມ່, ອ້າຍ, ເອື້ອຍ, ນ້ອງ ແລະ ຄົນຮອບຂ້າງ. ເດັດຂາດຢ່າໄປພົວພັນກັບສິ່ງບໍ່ດີຕ່າງໆນາໆ ທີ່ສັງຄົມກຳລັງປະເຊີນໃນປະຈຸບັນ, ນຳເອົາຫຼັກການສິນຫ້າ ທີ່ເຮັດໃຫ້ຄົນຍຸກໃໝ່ເປັນຄົນດີ, ຊື່ສັດ, ດຸໝັ້ນ, ບໍ່ຫຼິ້ນການພະນັນ ແລະ ບໍ່ເປັນໄພສັງຄົມ ໃນເລື່ອງຊູ້ສາວຕ່າງໆ. ຖ້າເຮັດໄດ້ ກໍ່ຈະເປັນຫຼັກການໃນການດຳເນີນຊີວິດ ທີ່ມີຄຸນນະພາບ. ສັງຄົມກໍ່ຈະມີຄວາມປອດໄພ, ມີຄວາມສຸກ ແລະ ມ່ວນຊື່ນ.


ມີຄຸນສົມບັດສິນທຳປະຕິວັດ:  ຍ້ອນມີຄົນລຸ້ນກ່ອນ ຈິ່ງມີຄົນລຸ້ນນີ້, ຍ້ອນລຸ້ນພໍ່ເສຍສະຫຼະ ລຸ້ນລູກຈິ່ງໄດ້ຢູ່ເຢັນເປັນສຸກ ດັ່ງໃນປະຈຸບັນ. ສະນັ້ນ, ຄົນຍຸກໃໝ່ ໂດຍສະເພາະ ໄວໜຸ່ມ ຈົ່ງມີສະຕິລະວັງຕົວ ແຕ່ເວລານີ້ເປັນຕົ້ນໄປ ໂດຍສະເພາະ ຢາເສບຕິດ ເພາະມັນເປັນສິ່ງທີ່ບໍ່ດີ, ພາໃຫ້ເສຍສຸຂະພາບ, ຮ້າຍແຮງໄປ ກວ່ານັ້ນ ແມ່ນພາໃຫ້ເສຍອະນາຄົດ, ອິດທິກຳລັງປໍລະປັກ ທີ່ຫວັງທຳລາຍຄວາມສະຫງົບຂອງຊາດ. ສຶກສາຮຽນຮູ້ ເອົາບົດຮຽນ ຈາກທ່ານຜູ່ນຳ ທີ່ເສຍສະຫຼະ ແລະ ເຫັນແກ່ຜົນປະໂຫຍດສ່ວນລວມ ໃຫ້ຫຼາຍກວ່າສ່ວນຕົວ.

 ເມື່ອພວກລູກພວກຫຼານປະຕິບັດໄດ້ຄືແນວນັ້ນ ຜູ້ທີ່ເປັນການນຳ, ເປັນພໍ່, ເປັນແມ່, ເປັນອ້າຍ, ເປັນເອື້ອຍ, ເປັນຄູອາຈານ ກໍ່ຄື ຜູ້ໃຫຍ່ ກໍ່ຈະມີຄວາມສຸກ ແລະ ພາກພູມໃຈ ໃນຕົວ ຂອງພວກລູກພວກຫຼານ; ພວກລູກພວກຫຼານ ຈຶ່ງຈະມີອະນາຄົດທີ່ສົດໃສ, ມີວິຊາອາຊີບທີ່ໝັ້ນຄົງ-ຍາວນານ, ມີໜ້າທີ່ການງານທີ່ດີ, ມີກຽດສັກສີ, ສັງຄົມຈຶ່ງໃຫ້ຄວາມເຄົາລົບນັບຖື ແລະ ຮັກແພງ.



ອັນສຳຄັນ ໃນຕອນທ້າຍ ທ່ານນາຍົກລັດຖະມົນຕີ ຍັງໄດ້ກ່າວຕື່ມອີກວ່າ: ຂ້າພະເຈົ້າ ຂໍຝາກອະນາຄົດຂອງປະເທດຊາດຊາດ, ບ້ານເມືອງ ໄວ້ນຳພວກລູກພວກຫຼານໝົດທຸກຄົນ ສືບຕໍ່ພັດທະນາ ແລະ ປົກປັກຮັກສາ ໃຫ້ໝັ້ນຄົງ, ຍືນຍົງ ແລະ ກ້າວເດີນໄປຂ້າງໜ້າດ້ວຍກຽດສັກສີ, ມີກຽດຕິພູມ, ມີຄວາມເປັນຊາດລາວ ແລະ ໃຫ້ສົມກັບວ່າ ສປປ ລາວ ເປັນປະເທດທີ່ມີເອກະລາດ, ມີອຳນາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ ຢ່າງແທ້ຈິງ ເພາະອະນາຄົດຂອງປະເທດຊາດ ຈະໄດ້ເພິ່ງພວກລູກພວກຫຼານຢ່າງແນ່ນອນ.

ແຫຼ່ງຂໍ້ມູນ: ຄັດຈາກວາລະສານ “ນັກບໍລິຫານ” ສະບັບທີ 51
ຂຽນໂດຍ: ວັນທອງ ລັດຕະນະວິໄລ


FOR WHOM DON'T HAVE LAO FONT





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




Post a Comment

0 Comments