ລາວ-ກູບາ ສືບຕໍ່ເພີ່ມທະວີການຮ່ວມມື ດ້ານການພົວພັນຕ່າງປະເທດ



ນະຄອນຫຼວງວຽງຈັນ : ໃນວັນທີ 15 ມັງກອນ 2018, ທີ່ຄະນະພົວພັນຕ່າງປະເທດສູນກາງພັກ ປະຊາຊົນປະ ຕິວັດລາວ ທ່ານ ນາງ ສູນທອນ ໄຊຍະຈັກ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດ ສູນກາງພັກ ປະຊາຊົນ ປະຕິວັດລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຮວນ ກາຣໂລດສ ມາຣແຊັງ ອາກີເລຣາ ຮອງຫົວໜ້າຄະນະພົວພັນ ຕ່າງປະເທດສູນກາງພັກກອມມູນິດກູບາ, ພ້ອມຄະນະ ທີ່ໄດ້ເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງ ວັນທີ 14-16 ມັງ ກອນ 2018.

ໃນການພົບປະຄັ້ງນີ້ທ່ານ ນາງ ສູນທອນ ໄຊຍະຈັກ ໄດ້ສະແດງຄວາມຊົມເຊີຍ ແລະ ຕີລາ ຄາສູງຕໍ່ການມາຢ້ຽມຢາມລາວ ຂອງຄະນະພົວພັນຕ່າງປະເທດ ສູນກາງພັກກອມມູນິດກູບາ,  ເຊິ່ງເປັນການ ປະກອບສ່ວນທີ່ສຳຄັນ ເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດ ຕະພາບຖານສະຫາຍອ້າຍນ້ອງ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃຫ້ນັບມື້ ແໜ້ນແຟ້ນຍິ່ງໆຂຶ້ນ. ທ່ານນາງ ສູນທອນ ໄຊຍະຈັກ ຍັງໄດ້ສະແດງຄວາມຂອບໃຈ ຕໍ່ການສະໜັບສະໜູນ ແລະ ຊ່ວຍເຫລືອຂອງພັກ, ລັດ ກໍຄື ປະຊາຊົນກູບາອ້າຍນ້ອງ ໃນພາລະກິດຕໍ່ສູ້ກູ້ຊາດ ໃນເມື່ອກ່ອນ ກໍຄື ການປົກປັກຮັກສາ ແລະ ສ້າງສາພັດທະນາປະເທດຊາດຂອງ ສປປ ລາວໃນປັດຈຸບັນ. ພ້ອມນີ້, ຍັງສະແດງຄວາມຊົມເຊີຍ ຕໍ່ບັນດາຜົນສຳເລັດຂອງກູບາ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໂດຍສະເພາະ ແມ່ນການພັດທະນາ ເສດຖະກິດ-ສັງຄົມ, ສືບຕໍ່ປົກປັກຮັກສາ ໝາກຜົນແຫ່ງການປະຕິວັດ ຕະຫລອດໄລຍະເວລາ 50 ກວ່າປີ ແລະ ສືບຕໍ່ຈັດຕັ້ງປະຕິບັດ ບັນດາມະຕິກອງປະຊຸມໃຫຍ່ ຄັ້ງທີ VII ຂອງພັກກອມມູນິດກູບາ ໃຫ້ປະກົດຜົນເປັນຈິງ.

ທ່ານ ຮວນ ກາຣໂລດສ ມາຣແຊັງ ອາກີເລຣາ ໄດ້ສະແດງຄວາມຂອບໃຈມາຍັງ ທ່ານ ນາງ ສູນທອນ ໄຊຍະຈັກ ທີ່ໄດ້ໃຫ້ການຕ້ອນຮັບ ອັນອົບອຸ່ນໃນຄັ້ງນີ້, ທ່ານໄດ້ຕີລາຄາສູງ ຕໍ່ການພົວພັນຮ່ວມ ມືທີ່ເປັນມູນເຊື້ອ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃນດ້ານຕ່າງໆ ທີ່ເປັນທ່າແຮງຂອງສອງຝ່າຍ ແລະ ໄດ້ສະແດງຄວາມດີໃຈ ທີ່ໄດ້ມີໂອກາດຢ້ຽມຢາມ ແລະ ມາເຫັນບັນດາ ຜົນສຳເລັດ ອັນໃຫຍ່ຫລວງຂອງປະຊາຊົນລາວ ທີ່ຍາດມາໄດ້ໃນພາລະກິດສ້າງສາພັດທະນາປະເທດຊາດ ພາຍໃຕ້ການນຳພາອັນສະຫລາດສ່ອງໃສຂອງພັກ ປປ ລາວ, ອັນໄດ້ເຮັດໃຫ້ຊີວິດ ການເປັນຢູ່ຂອງ ປະຊາຊົນລາວ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ບົດບາດ, ອິດທິພົນ ຂອງ ສປປ ລາວ ນັບມື້ສູງເດັ່ນຂຶ້ນ ໃນເວທີພາກພື້ນ ແລະ ສາກົນ.

ໃນວັນດຽວກັນ, ຄະນະຜູ້ແທນກູບາ ຍັງໄດ້ພົບປະກັບຮອງຫົວໜ້າ ຄະນະພົວພັນຕ່າງປະເທດສູນກາງພັກ, ການນຳສູນກາງຊາວໜຸ່ມ ປປ ລາວ, ສູນກາງສະຫະພັນແມ່ຍິງລາວ ແລະ ໄດ້ຢ້ຽມຊົມ ພື້ນຖານເສດຖະກິດ, ສະຖານທີ່ປະຫວັດສາດ ແລະ ວັດທະນະທຳ ໜຶ່ງທີ່ນະຄອນຫລວງວຽງຈັນ.
ຂ່າວ: ມະນີທອນ, ພາບ: ໄອ່ຄຳ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments