ວິທະຍຸກະຈາຍສຽງແຫ່ງຊາດລາວ ມອບເຄື່ອງຊ່ວຍເຫລືອໃຫ້ 2 ພາກສ່ວນພາຍໃນເມືອງອະນຸວົງ


ວັນທີ 19 ມັງກອນ 2018 ວິທະຍຸກະຈາຍສຽງແຫ່ງຊາດລາວ ນຳໂດຍທ່ານ ວໍລະສັກ ປຣະວົງວຽງຄຳ ຮອງຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວ ໄດ້ນຳເອົາເຄື່ອງຊ່ວຍເຫລຶອໄປມອບໃຫ້ 2 ພາກສ່ວນພາຍໃນເມືອງ ອະນຸວົງ ແຂວງ ໄຊສົມບູນ ຄື: ກອງບັນຊາການທະຫານເມືອງ ອະນຸວົງ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວວັນທີ 20 ມັງກອນ ຄົບຮອບ 69 ປີ ແລະ ບ້ານ ອ່າວກາງ ທີ່ຕັ້ງຢູ່ຫ່າງຈາກເທດສະບານເມືອງປະມານ 20 ກິໂລແມັດ.

ເຄື່ອງທີ່ນຳໄປມອບຄັ້ງນີ້ປະກອບມີ: ເຄື່ອງອຸປະໂພກ-ບໍລິໂພກ, ເຄື່ອງນຸ່ງຮົ່ມ ແລະ ອຸປະກອນການຮຽນ, ລວມມູນຄ່າປະມານ 30 ລ້ານກີບ ໂດຍໄດ້ມາຈາກການປຸກລະດົມການປະກອບສ່ວນຊ່ວຍເຫລືອຈາກສັງຄົມ ກໍຄື ບັນດາບໍລິສັດ, ຫ້າງຮ້ານ ແລະ ປະຊາຊົນທົ່ວໄປໃນສັງຄົມ, ໃນນີ້ ກອງບັນຊາການທະຫານເມືອງໄດ້ຮັບເຄື່ອງອຸປະໂພກ-ບໍລິໂພກຈຳນວນຫນຶ່ງ, ສ່ວນບ້ານ ອ່າວກາງ ແບ່ງເປັນ 2 ພາກສ່ວນ ຄື: ປະຊາຊົນມອບໃຫ້ຄອບຄົວທີ່ທຸກຍາກໄດ້ຮັບເຄື່ອງນຸ່ງຮົ່ມ ແລະ ນັກຮຽນປະຖົມສຶກສາສົມບູນອ່າວກາງໄດ້ຮັບອຸປະກອນການຮຽນ ແລະ ເຄື່ອງນຸ່ງຫົ່ມ. ບ້ານ ອ່າວກາງ ມີທັງໝົດ 89 ຫລັງຄາເຮືອນ, 136 ຄອບຄົວ, ພົນລະເມືອງ 700 ກ່ວາຄົນ. ສະເພາະນັກຮຽນປະຖົມສົມບູນມີທັງໝົດ 140 ກ່ວາຄົນ.


ນີ້ຖືເປັນຄັ້ງທີ 3 ທີ່ວິທະຍຸກະຈາຍສຽງແຫ່ງຊາດໄດ້ເຄື່ອນໄຫວມອບເຄື່ອງຊ່ວຍເຫລືອໃຫ້ປະຊາຊົນພາຍໃນເມືອງ ອະນຸວົງ ແຂວງ ໄຊສົມບູນ ແລະ ໄລຍະຜ່ານມາວິທະຍຸກະຈາຍສຽງແຫ່ງຊາດລາວ ໄດ້ເຄື່ອນໄຫວມອບເຄື່ອງຊ່ວຍເຫລືອໃຫ້ບັນດາເມືອງໃນທົ່ວປະເທດມາແລ້ວຫລາຍເມືອງ ເປັນຕົ້ນ: ເມືອງ ປາກລາຍ, ແກ່ນທ້າວ ແລະ ເມືອງ ພຽງ, ແຂວງ ໄຊຍະບູລີ, ເມືອງ ສະຫມ້ວຍ ແລະ ເມືອງ ຄົງເຊໂດນ, ແຂວງ ສາລະວັນ, ເມືອງ ເຟືອງ ແຂວງ ວຽງຈັນແລະ ອື່ນໆ. ສຳລັບເຄື່ອງທີ່ນຳໄປຊ່ວຍເຫລືອແມ່ນໄດ້ຈາກການປຸກລະດົມການຊ່ວຍເຫລືອຈາກສັງຄົມຜ່ານກິດຈະກຳການກຸສົນເພື່ອປະຊາຊົນຜູ້ທຸກຍາກຂອງວິທະຍຸກະຈາຍສຽງແຫ່ງຊາດລາວທີ່ຈັດຕັ້ງປະຕິບັດມາແລ້ວ 10 ກ່ວາປີ.

ທີ່ມາ: Lao National Radio

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments