ເມືອງເງິນ ຈັດພິທີປາຖະກະຖາມູນເຊື້ອວັນສ້າງຕັ້ງກອງທັບ ຄົບຮອບ 69 ປີ ແລະ ວັນຕ້ານການສໍ້ລາດບັງຫຼວງ ສາກົນ ຄົບຮອບ 14 ປີ



ເມືອງເງິນ ແຂວງໄຊຍະບູລີ ຈັດພິທີປາຖະກະຖາມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 69 ປີ( 20 ມັງກອນ 1949- 20 ມັງກອນ 2018) ແລະ ວັນຕ້ານການສໍ້ລາດບັງຫຼວງ ສາກົນ ຄົບຮອບ 14 ປີ. ພິທີດັ່ງກ່າວແມ່ນຈັດຂຶ້ນໃນຕອນເຊົ້າຂອງວັນທີ 11 ມັງກອນ 2018 ນີ້ ຢູ່ທີ່ສະໂມສອນເມືອງເງິນ, ມີຄະນະບໍລິຫານງານພັກເມືອງ, ຫົວໜ້າຫ້ອງການ, ຫົວໜ້າໜ່ວຍງານ, ກົມກອງ, ນັກທຸລະກິດ ຜູ້ປະກອບການ ນັກປະຕິວັດອາວຸໂສບຳນານ, ເລຂາຄະນະພັກຮາກຖານກຸ່ມບ້ານ, ເລຂາໜ່ວຍພັກນາຍບ້ານ, ແລະ ພະນັກງານ ຫຼັກແຫຼ່ງເຂົ້າຮ່ວມ





ພິທີປາຖະກະຖາເລົ່າຄືນມູນເຊື້ອໃນຄັ້ງນິີ້ ທ່ານ ບຸນຈັນ ແສນສະຫວັດ ຄະນະປະຈຳພັກເມືອງ ປະທານກວດກາພັກ-ລັດ ເມືອງ ໄດ້ຍົກໃຫ້ເຫັນມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ທີ່ໄດ້ເຄື່ອນໄຫວຕໍ່ສູ້ຕີຕ້ານກັບຈັກກະພັດອາເມລິກາຜູ້ຮຸກຮານແບບເກົ່າ ແລະ ໃໝ່ ເພື່ອກອບກູ້ເອົາຜື້ນແຜ່ນດິນອັນຄົບຖ້ວນມາສູ່ປວງຊົນລາວທັງຊາດແຕ່ເໜືອຮອດໃຕ້ ໂດຍແມ່ນພັກເປັນຜູ້ນຳພາ ອັນສະຫຼາດສ່ອງໃສກ້າແກ່ນອາດຫານ ສາມາດຍາດເອົາໄຊຊະນະ ໂດຍຕະຫຼອດມາ 


ພ້ອມທັງຍົກໃຫ້ເຫັນມູນເຊື້ອພິລະອາດຫານ ຄວາມສາມັກຄີລະຫວ່າງກອງທັບປະຊາຊົນລາວ ກັບ ກອງທັບຫວຽດນາມ ທີໄດ້ຮ່ວມກັນຕີສັດຕູໂຕດຽວ ທັງເປັນການປຸກລະດົມສຶກສາອົບຮົມຍົກລະດັບຄວາມຮັບຮູ້ໃຫ້ພະນັກງານ ທະຫານ ຕຳຫຼວດ ໄປໜູນໃຊ້ ເຂົ້າໃນໜ້າທີ່ວຽກງານຕົວຈິງ ເພື່ອພ້ອມກັນ ສືບຕໍ່ຮັກສາມູນເຊື້ອຄວາມສາມັກຄີກັນໃຫ້ແໜ້ນແຟ້ນ ມີຄວາມຈົງຮັກພັກດີ,ແລະ ມີຄວາມຈູບຈ້າວຫ້າວຫັນຕໍ່ໜ້າທີ່ວຽກງານ ພ້ອມກັນຫັນເອົາພະນັກງານລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ, ເພື່ອນຳພາພໍ່ແມ່ປະຊາຊົນສ້າງສາພັດທະນາປະເທດຊາດ ໃຫ້ຮັ່ງມີເຂັ້ມແຂງ, ສັງຄົມມີຄວາມສະຫງົບ ແລະ ຍຸດຕິທຳ.


ຈາກນັ້ນຜູ້ຮ່ວມກໍ່ໄດ້ຮັບຟັງການເຜີຍແຜ່ ວັນຕ້ານຕ້ານການສໍ້ລາດບັງຫຼວງ ສາກົນ ຄົບຮອບ 14 ປີ ແລະ ດໍາລັດວ່າດ້ວຍມາດຖານພົ້ນທຸກ ແລະ ມາດຕະຖານການພັດທະນາ ອີກດ້ວຍ.


ໂດຍ: ສຸລິຍາ ແສງເດືອນ





































Post a Comment

0 Comments