ຫສນຍ ຈັດປາຖະກະຖາ ວັນຕ້ານການສໍ້ລາດບັງຫຼວງສາກົນ



ໃນຕອນບ່າຍ ຂອງວັນທີ 22 ມັງກອນ 2018 ຫ້ອງວ່າການສຳນັກງານນາຍົກລັດຖະມົນຕີ (ຫສຍນ) ໄດ້ຈັດກອງປະຊຸມປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ (9 ທັນວາ 2003 - 9 ທັນວາ 2017). ໃຫ້ກຽດເຜີຍແຜ່ໂດຍສະຫາຍ ສົມສະນິດ ສຸວັນນະລາດ ຮອງເລຂາຄະນະພັກ, ປະທານກວດກາພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີສະມາຊິກພັກ ແລະ ພະນັກງານ ພາຍໃນຫ້ອງວ່າການສຳນັກງານນາຍົກລັດຖະມົນຕີ ເຂົ້າຮ່ວມ.



ໃນໂອກາດດັ່ງກ່າວ, ສະຫາຍ ສົມສະນິດ ສຸວັນນະລາດ ໄດ້ນຳສະເໜີໃຫ້ຜູ້ເຂົ້າຮ່ວມ ຮັບຮູ້ຈຸດປະສົງ ຂອງການຈັດກອງປະຊຸມປາຖະກະຖາໃນຄັ້ງນີ້. ພ້ອມທັງ, ທົບທວນຄືນ ການສ້າງຕັ້ງວັນຕ້ານການສໍ້ລາດບັງຫຼວງ, ການປະຕິບັດ ການສະກັດກັ້ນ ແລະ ຕ້ານການສໍ້ລາດບັງຫຼວງ ໃນສປປ ລາວ ໃນໜຶ່ງປີທີ່ຜ່ານມາ ແລະ ທິດທາງ, ໜ້າທີ່ ໃນສະເພາະໜ້າ ເພື່ອເຮັດໃຫ້ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ໄດ້ກາຍເປັນໜ້າທີ່ ແລະ ຄວາມຮັບຜິດຊອບ ຂອງທົ່ວປວງຊົນ ໃນການຕິດຕາມ, ກວດກາ ແລະ ແກ້ໄຂ ພຶດຕິກໍາທີ່ເປັນການສໍ້ລາດບັງຫຼວງ ຮ່ວມກັນຢ່າງກວ້າງຂວາງ ແລະ ເລິກເຊິ່ງ. 



ທີ່ສຳຄັນ, ສະຫາຍ ສົມສະນິດ ສຸວັນນະລາດ ໄດ້ຍົກໃຫ້ເຫັນຜົນຮ້າຍ ແລະ ໄພອັນຕະລາຍ ຂອງການສໍ້ລາດບັງຫຼວງ ວ່າ: ການສໍ້ລາດບັງຫຼວງ ແມ່ນສະພາບຫຍໍ້ທໍ້ໜຶ່ງໃນກົງຈັກການຈັດຕັ້ງ, ເປັນໄພອັນຕະລາຍອັນຮ້າຍແຮງ ເຊິ່ງສົ່ງຜົນກະທົບ ແລະ ກົດໜ່ວງຖ່ວງດຶງ ການພັດທະນາເສດຖະກິດ-ສັງຄົມ ຂອງແຕ່ລະປະເທດໃນໂລກ ບໍ່ວ່າຈະເປັນປະເທດນ້ອຍ ຫຼື ໃຫຍ່, ທຸກຍາກ ຫຼື ຮັ່ງມີ ກໍ່ລ່ວນແຕ່ມີຜົນກະທົບເຊັ່ນດຽວກັນ; ປະຈຸບັນ, ການສໍ້ລາດບັງຫຼວງ ພວມເປັນໄພຂົ່ມຂູ່ເຖິງຄວາມມີສະຖຽນລະພາບ ຂອງການຈັດຕັ້ງ ທັງພາກລັດ ແລະ ເອກະຊົນ, ສ້າງໃຫ້ເກີດມີຄວາມບໍ່ສະຫງົບ, ຄວາມບໍ່ຍຸຕິທຳໃນສັງຄົມ, ເປັນການບັນທອນກຳລັງແຮງ ກໍ່ຄື ຄວາມເຊື່ອໝັ້ນ ແລະ ຄ່ານິຍົມຂອງສັງຄົມ ຕໍ່ສະຖາບັນການປົກຄອງ; ໃນຂະນະດຽວກັນ, ການສໍ້ລາດບັງຫຼວງ ກໍ່ເປັນການຕັດຮອນເອົາ ລາຍໄດ້ຂອງຊາດ, ຂອງລວມໝູ່ ກໍ່ຄື ຂອງພົນລະເມືອງ ດ້ວຍຫຼາຍຮູບ-ຫຼາຍວິທີ, ສ້າງຄວາມເສຍຫາຍ ໃຫ້ແກ່ຊັບສິນ, ເງິນ, ຄຳ ຂອງລັດ, ລວມໝູ່ ແລະ ຂອງປະຊາຊົນ ເປັນຈຳນວນມະຫາສານ; ການສໍ້ລາດບັງຫຼວງ ຍັງເປັນການສະແດງອອກຢ່າງເປີດແປນ ຂອງການຂາດຄຸນນະທຳ, ຂາດຈັນຍາບັນ ຂອງຜູ້ດຳເນີນງານໃນສັງຄົມ ກໍ່ໃຫ້ເກີດມີກຸ່ມກ້ອນຮ່ວມຮັບຜົນປະໂຫຍດທາງເສດຖະກິດ, ການເມືອງ, ນຳໄປສູ່ຄວາມບໍ່ເປັນເອກະພາບ, ເກີດຄວາມແຕກແຍກ ແລະ ອື່ນໆ.

ທີ່ມາ: ຫ້ອງວ່າການສຳນັກງານນາຍົກລັດຖະມົນຕີ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments