ນາຍົກລັດຖະມົນຕີ ຢ້ຽມຢາມ ສສ ມຽນມາ ຢ່າງເປັນທາງການ



ໂດຍຕອບສະໜອງຕາມຄຳເຊີນຂອງ ທ່ານ ຕິນ ຈໍ ປະທານາທິບໍດີ ແຫ່ງ ສາທາລະນະລັດ ສະຫະພາບ ມຽນມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມ ສສ ມຽນມາ ຢ່າງເປັນທາງການ ໃນລະຫວ່າງວັນທີ 15-16 ມັງກອນ 2018, ເຊິ່ງເປັນການຢ້ຽມຢາມ ສສ ມຽນມາ ຄັ້ງທໍາອິດ ພາຍຫລັງດໍາລົງຕໍາເເໜ່ງເປັນນາຍົກລັດຖະມົນຕີ ແຫ່ງ ສປປ ລາວ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ລາວ ແລະ ມຽນມາ ໃຫ້ແໜ້ນແຟ້ນຍິ່ງໆຂຶ້ນ.

ໃນວັນທີ 15 ມັງກອນ 2018, ພິທີຕ້ອນຮັບຢ່າງເປັນທາງການໄດ້ຈັດຂຶ້ນຢ່າງອົບອຸ່ນ ແລະ ສົມກຽດ ທີ່ທຳນຽບປະທານາທິບໍດີ, ໂດຍການໃຫ້ກຽດຕ້ອນຮັບຂອງ ທ່ານ ຕິນ ຈໍ ປະທານາທິບໍດີ ແຫ່ງ ສສ ມຽນມາ ແລະ ພັນລະຍາ. ພາຍຫລັງສໍາເລັດພິທີຕ້ອນຮັບຜູ້ນຳທັງສອງຝ່າຍ ໄດ້ດຳເນີນການພົບປະ, ໂດຍສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືທີ່ດີ ລະຫວ່າງສອງປະເທດເພື່ອນບ້ານໃກ້ຄຽງໃນກຸ່ມອາຊຽນ ໃນໄລຍະຜ່ານມາ, ເຊິ່ງເຫັນໄດ້ຈາກການແລກປ່ຽນການຢ້ຽມຢາມເຊິ່ງກັນ ແລະ ກັນ ຢ່າງເປັນປົກກະຕິຂອງການນຳຂັ້ນສູງຂອງສອງປະເທດ. 
ໃນໂອກາດນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສົມກຽດ ຖານເພື່ອນມິດສະໜິດແໜ້ນ; ໄດ້ສະແດງຄວາມຊົມເຊີຍຕໍ່ຜົນສໍາເລັດອັນໃຫຍ່ຫລວງຂອງລັດຖະບານ ແລະ ປະຊາຊົນມຽນມາ ໃນການພັດທະນາປະເທດຊາດໃຫ້ກ້າວໜ້າຍິ່ງໆຂຶ້ນ. 

ພ້ອມນັ້ນ ທ່ານກໍ່ໄດ້ນຳເອົາຄວາມຢື້ຢາມຖາມຂ່າວຈາກ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ເຖິງ ທ່ານປະທານາທິບໍດີ ແຫ່ງ ສສ ມຽນມາ.  ໃນໂອກາດດຽວກັນ, ທ່ານປະທານາທິບໍດີ ຕິນຈໍ ກໍ່ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ໄດ້ຕີລາຄາສູງຕໍ່ການຢ້ຽມຢາມຢ່າງເປັນທາງການຢູ່ ສສ ມຽນມາ ຂອງ ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ຄະນະ ເຊິ່ງຈະເປັນການຊຸກຍູ້ສົ່ງເສີມສາຍພົວພັນ ແລະ ການຮ່ວມມືລະຫວ່າງສອງປະເທດໃຫ້ຂະຫຍາຍຕົວຍິ່ງໆຂຶ້ນໄປ. 

ພ້ອມກັນນັ້ນ, ທ່ານປະທານາທິບໍດີ ກໍ່ໄດ້ຝາກຄວາມຢື້ຢາມຖາມຂ່າວເຖິງ ທ່ານປະທານປະເທດ ແຫ່ງ ສປປ ລາວ ແລະ ອວຍພອນໃຫ້ທ່ານນາຍົກລັດຖະມົນຕີພ້ອມດ້ວຍຄະນະ ຈົ່ງໄດ້ຮັບຜົນສຳເລັດໃນການຢ້ຽມຢາມ ສສ. ມຽນມາ ຢ່າງເປັນທາງການໃນຄັ້ງນີ້.

ໃນວັນດຽວກັນ, ພະນະທ່ານນາຍົກລັດຖະມົົນຕີ ທອງລຸນ ສີສຸລິດຍັງໄດ້ພົບປະສອງຝ່າຍກັບທ່ານນາງ ອອງຊານ ຊູຈີ ທີ່ປຶກສາແຫ່ງລັດແຫ່ງ ສສ. ມຽນມາ ທີ່ ທຳນຽບປະທານາທິບໍດີ. 

ສອງຝ່າຍໄດ້ແຈ້ງສະພາບການພັດທະນາເສດຖະກິດ-ສັງຄົມ ຢູ່ພາຍໃນປະເທດຂອງຕົນໃຫ້ກັນຊາບ, ພ້ອມໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນການຮ່ວມມືສອງຝ່າຍໃນດ້ານຕ່າງໆທີ່ມີບາດກ້າວຂະຫຍາຍຕົວທີ່ດີ ໃນໄລຍະຜ່ານມາ, ເປັນຕົ້ນແມ່ນທາງດ້ານການເມືອງ, ດ້ານປ້ອງກັນປະເທດ, ປ້ອງກັນຄວາມສະຫງົບ, ວຽກງານຊາຍແດນ, ຄົມມະນາຄົມ ແລະ ຂົນສົ່ງ, ພະລັງງານໄຟຟ້າ, ການສຶກສາ, ວິທະຍາສາດ ແລະ ເຕັກໂນໂລຊີ, ການຄ້າ-ການລົງທຶນແລະ ດ້ານອື່ນໆ. 

ນອກນັ້ນ, ສອງຝ່າຍເຫັນດີນຳກັນວ່າ ສອງປະເທດມີທ່າແຮງບົ່ມຊ້ອນຫລາຍ ທີ່ຈະຮ່ວມມືກັນ ໃນຫລາຍດ້ານ ເປັນຕົ້ນ ແມ່ນດ້ານການທ່ອງທ່ຽວ, ໂດຍສະເພາະປີທ່ອງທ່ຽວລາວ 2018 ຈະສືບຕໍ່ຮ່ວມມືກັນແລກປ່ຽນເຊິ່ງກັນ ແລະ ກັນ ແລະ ຊຸກຍູ້ການໄປມາຫາສູ່ກັນລະຫວ່າງ ປະຊາຊົນສອງປະເທດນຳກັນຫລາຍຂຶ້ນ.

ໃນໄລຍະຜ່ານມາ ສປປ ລາວ ແລະ ສສ ມຽນມາ ໄດ້ມີການລົງນາມສັນຍາ ແລະ ບົດບັນທຶກຄວາມເຂົ້າໃຈຮ່ວມກັນ ຫລາຍກວ່າ 30 ສະບັບ, ເຊິ່ງສອງຝ່າຍເຫັນດີວ່າຄວນຊຸກຍູ້ໃຫ້ພາກສ່ວນກ່ຽວຂ້ອງປະຕິບັດຕາມສັນຍາ ແລະ ບົດບັນທຶກຄວາມເຂົ້າໃຈທີ່ໄດ້ເຊັນກັນແລ້ວນັ້ນ ໃຫ້ມີປະສິດຕິຜົນຫລາຍຂຶ້ນກວ່າເກົ່າ, ພ້ອມທັງເຫັນດີຊຸກຍູ້ໃຫ້ບັນດາຂະແໜງການເຫລົ່ານັ້ນ ເພີ່ມທະວີປຶກສາຫາລື ແລະ ຊອກຊ່ອງທາງການຮ່ວມມືນຳກັນໃຫ້ຫລາຍຂຶ້ນຕື່ມ. 

ພ້ອມກັນນັ້ນ, ທ່ານນາຍົກລັດຖະມົົນຕີ ທອງລຸນ ສີສຸລິດ ຍັງໄດ້ເຊື້ອເຊີນທ່ານນາງອອງຊານ ຊູຈີ ຢ້ຽມຢາມທາງການທີ່ ສປປ ລາວ ເພື່ອເສີມຂະຫຍາຍສາຍພົວພັນມິດຕະພາບ ລະຫວ່າງສອງປະເທດ ລາວ ແລະ ມຽນມາ ໃຫ້ແໜ້ນແຟ້ນຍິ່ງໆຂຶ້ນ.

ພາຍຫລັງສຳເລັດການພົບປະ, ທ່ານ ທອງລຸນ ສີສຸລິດນາຍົກລັດຖະມົນຕີ ແຫ່ງ ສປປ ລາວ ແລະ ທ່ານນາງ ອອງຊານ ຊູຈີ ທີ່ປຶກສາແຫ່ງລັດແຫ່ງສສມຽນມາ ກໍ່ໄດ້ເຂົ້າຮ່ວມເປັນສັກຂີພິຍານ ໃນພິທີລົງນາມເອກະສານສຳຄັນ 3 ສະບັບ ຄື: ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານພະລັງງານໄຟຟ້າ ລະຫວ່າງ ກະຊວງພະລັງງານ ແລະ ບໍ່ແຮ່ ແຫ່ງ ສປປ ລາວ ແລະ ກະຊວງໄຟຟ້າ ແລະ ພະລັງງານ ແຫ່ງ ສສ. ມຽນມາ, ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານວິທະຍາສາດ ແລະ ເຕັກໂນໂລຊີລະຫວ່າງ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ ແລະ ກະຊວງສຶກສາ (ວິທະຍາສາດ ແລະ ເຕັກໂນໂລຊີ) ແຫ່ງ ສສ ມຽນມາ, ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານການຕ້ານການສໍ້ລາດບັງຫລວງ ລະຫວ່າງ ອົງການກວດກາລັດຖະບານ ແລະ ຕ້ານການສໍ້ລາດບັງຫລວງແຫ່ງ ສປປ ລາວ ແລະ ຄະນະກຳມະການຕ້ານການສໍ້ລາດບັງຫລວງແຫ່ງ ສສ ມຽນມາ.

ໃນໂອກາດຢ້ຽມຢາມ ສສ. ມຽນມາ ຄັ້ງນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ຈະໄປຢ້ຽມຢາມນະຄອນຢາງກຸງ, ເຂດເສດຖະກິດພິເສດທີລາວາ ແລະ ພະທາດສະເວດາກ໋ອງ.

ພາບ ແລະ ຂ່າວ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments