ກະລຶມສຳເລັດບັ້ນຝຶກອົບຮົມການເມືອງ ແລະ ຫັດແອບການທະຫານໃຫ້ນາຍ ແລະພົນທະຫານປະຈຳປີ 2017



ພາຍຫຼັງກອງບັນຊາການທະຫານເມືອງກະລຶມ ແຂວງເຊກອງ ໄດ້ໄຂບັ້ນອົບຮົມການເມືອງ, ຫັດແອບການທະຫານໃຫ້ແກ່ນາຍ ແລະພົນທະຫານຢູ່ຂັ້ນກົມກອງຂອງຕົນປະຈຳປີ 2017 ມາເປັນເວລາ 3 ເດືອນ ແລະອັດລົງຢ່າງເປັນທາງການໃນວັນທີ 12 ມັງກອນ 2018 ຜ່ານມາ ຢູ່ທີ່ສະໜາມຍິງປືນກອງບັນຊາການທະຫານເມືອງ ໂດຍການເຂົ້າຮ່ວມຂອງ ສະຫາຍ ພັຕ ສົມໃຈ ວຽງພະລິງ ຮອງຫົວໜ້າກອງບັນຊາການທະຫານເມືອງ ພ້ອມດ້ວຍແຂກຖືກເຊີນຈາກຂະແໜງການອ້ອມຂ້າງເມືອງ, ນາຍ ແລະພົນທະຫານເຂົ້າຮ່ວມຢ່າງຫຼວງຫຼາຍ.





ສະຫາຍ ຮ້ອຍໂທ ສຸກຂີນ້ອຍ ບຸດເສົາເພນ ຫົວໜ້າຂະແໜງອົບຮົມ-ຫັດແອບການເມືອງການທະຫານກອງບັນຊາການທະຫານ ເມືອງກະລຶມ ລາຍງານໃຫ້ຮູ້ວ່າ: ການອົບຮົມການເມືອງ, ຫັດແອບການທະຫານປະຈຳປີ 2017 ຢູ່ພາຍໃນກົມກອງຂອງຕົນໄລຍະຜ່ານມາເຫັນວ່າຄະນະພັກ, ຄະນະກອງບັນຊາການ, ພະນັກງານຂະແໜງການທີ່ກ່ຽວຂ້ອງຕະຫຼອດຮອດນາຍ ແລະພົນທະຫານພາຍໃນກົມກອງຂອງພວກເຮົາໄດ້ພ້ອມກັນເປັນເຈົ້າການເອົາໃຈໃສ່ຮັບຜິດຊອບສູງຕໍ່ໜ້າທີ່ວຽກງານຂອງຕົນ ຈຶ່ງປະສົບຜົນສຳເລັດໄດ້ 100% ເຊິ່ງການຮໍ່າຮຽນໃນຄັ້ງນີ້ແມ່ນມີຈຳນວນພົນເຂົ້າຮຽນທັງໝົດ 24 ສະຫາຍ, ຍິງ 0 ສະຫາຍ ປະກອບມີ 6 ວິຊາຮຽນ ໃນນັ້ນມີ ວິຊາການເມືອງ, ວິຊາລະບຽບ, ກິລາ, ສີລະປະຍຸດ, ພາລາທິການ ແລະຍິງລູກປືນແທ້ ຜ່ານການລົງສະໜາມຍິງລູກປືນແທ້ສາມາດຈັດປະເພດເກັ່ງໄດ້ 5 ສະຫາຍ, ກາງ 9 ສະຫາຍ, ຂັ້ນຄາດໝາຍ 6 ສະຫາຍ, ອ່ອນ 4 ສະຫາຍ ທັງນີ້ເພື່ອເພີ່ມຄວາມຮູ້, ຄວາມສາມາດທາງດ້ານການເມືອງນຳພາແນວຄິດ, ສິລະປະຍຸດ, ຍຸດທະວິທີໃຫ້ແກ່ນາຍ ແລະພົນທະຫານໄດ້ມີຄວາມເຂັ້ມແຂງຂຶ້ນກວ່າເກົ່າ, ມີລະບຽບວິໄນຢ່າງເຂັ້ມງວດ, ກຽມພ້ອມກຳລັງການຕໍ່ສູ້ໃນທຸກກໍລະນີ ແລະໃຫ້ບັນລຸຕາມ 4 ແຜນງານ, 26 ໂຄງການຂອງກະຊວງປ້ອງກັນປະເທດວາງອອກໃຫ້ປະກົດຜົນເປັນຈິງ.



ໃນຕອນທ້າຍຂອງພິທີດັ່ງກ່າວຍັງໄດ້ຮັບຟັງການໂອ້ລົມຂອງ ສະຫາຍ ພັຕ ສົມໃຈ ວຽງພະລິງ ເຊິ່ງທ່ານໄດ້ເນັ້ນໃຫ້ນາຍ ແລະພົນທະຫານ ຈົ່ງນຳເອົາເນື້ອໃນຈິດໃຈທີ່ຮຽນມາໃປນຳໃຊ້ເຂົ້າໃນວຽກງານຕົວຈິງ ພ້ອມທັງຈັດຕັ້ງຜັນຂະຫຍາຍໃຫ້ໄດ້ຮັບການພັດທະນາຢ່າງຕໍ່ເນື່ອງ ໂດຍຍຶດໝັ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະສືບຕໍ່ເປັນເຈົ້າການປົກປ້ອງຂອບເຂດລຽບຕາມຊາຍແດນຢ່າງເຂັ້ມງວດ ເພື່ອປະກອບສ່ວນເຂົ້າໃນການແກ້ໄຂບັນຫາປະກົດການຫຍໍ້ທໍ້ທາງສັງຄົມໃຫ້ດີຂຶ້ນເທື່ອລະກ້າວ.



ຂ່າວ
: ອັດສະວິນ ແສງສີຈັນ | ຂ່າວ: ເຂກອງ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments