ບຸນວັດພູປີນີ້ ເຂົ້າຊົມຟຣີ! ປະທານບໍລິສັດຜູ່ສຳປະທານຈັດງານແຈ້ງ!


ເປັນຂ່າວດີຄັ້ງປະຫວັດສາດ ຈາກແຂວງຈຳປາສັກ ໃນບຸນນະມັດສະການວັດພູ 2018 ທັງເປັນການຕອນຮັບປີທ່ອງທ່ຽວລາວ, ຫຼັງຈາກ ທີ່ຫຼາຍປີຜ່ານມາ ໄດ້ມີສຽງຈົ່ມສຽງວ່າ ຈາກຜູ່ໄປຮ່ວມບຸນວັດພູ ທີ່ຕ້ອງແບກຮາບພາລະ ຈ່າຍຕັ້ງແຕ່ ທາງໄປວັດພູ ຈົນຮອດຈອມວັດ.

ມື້ນີ້ 20​ ມັງກອນ 2018 ເວລາປະມານ 7:58 ນາທີ ທ່ານນາງ ສົມເລັດ ໂສສາລາດ ປະທານກຸ່ມບໍລິສັດ ຍິ່ງໂຊກໄຊ ທີ່ເປັນຜູ່ສຳປະທານ ແຫຼ່ງທ່ອງທ່ຽວວັດພູ ໄດ້ອອກແຈ້ງຜ່ານເຟສບຸກ ສ່ວນຕົວຂອງລາວວ່າ:



ຂ້າພະເຈົ້ານາງສົມເລັດ ໂພສາລາດ ປະທານກຸ່ມບໍລິສັດຍິ່ງໂຊກໄຊ ໃນນາມຜູ້ສໍາປະທານແຫຼ່ງທ່ອງທ່ຽວສະຖານບູຮານວັດພູຈໍາປາສັກ ມໍລະດົກໂລກແຫ່ງທີ 2 ຂອງ ສປປ ລາວ ຂໍຖືເປັນກຽດແຈ້ງມາຍັງບັນດາທ່ານຊາບທົ່ວເຖິງກັນວ່າ: “ງານບຸນວັດພູປີ 2018 ຈະບໍ່ເກັບຄ່າເຂົ້າຊົມ 3ວັນ“ ຕາມປົກກະຕິການເກັບຄ່າເຂົ້າຊົມສະຖານບູຮານວັດພູຈໍາປາສັກ ຄົນລາວເກັບ 20 ພັນກີບຕໍ່ຄົນ, ຄົນຕ່າງປະເທດ 50 ພັນກີບຕໍ່ຄົນ ເຊິ່ງລວມຄ່າລົດໄຟຟ້ານໍາສົ່ງ, ຄ່າເຂົ້າຊົມຫ້ອງວາງສະແດງວັດພູ, ຫ້ອງນໍ້າ ແລະຄ່າໄວຟາຍ. ແຕ່ເນື່ອງໃນໂອກາດງານບຸນນະມັດສະການຜາສາດກີນວັດພູປີ 2018 ໃນວັນທີ 29-31ມັງກອນ 2018 ນີ້ ແມ່ນນະໂຍບາຍບໍ່ໄດ້ເກັບຄ່າເຂົ້າຊົມແຕ່ຢ່າງໃດ.



ເພື່ອໃຫ້ມີລາຍຮັບໃນການໃຊ້ຈ່າຍ ປະດັບປະດາຕົກແຕ່ງ ແສງ ສີ ສຽງ, ລວມທັງນະໂຍບາຍຕໍ່ນັກສິນລະປິນ ທັງພາຍໃນ ແລະຕ່າງປະເທດ ທີ່ມາຄົບງັນ, ຄ່າອະນາໄມ ແລະມອບພັນທະໃຫ້ລັດ, ທາງບໍລິສັດຈະໄດ້ເກັບເງິນນໍາລົດທີ່ເຂົ້າມາໃນງານ ໃນນັ້ນຄ່າຝາກລົດຈັກ20ພັນ ກີບຕໍ່ຄັນ, ລົດທົ່ວໄປ 60ພັນກີບຕໍ່ຄັນ. ສໍາລັບລົດບັດ ແລະລົດໂດຍສານ 80 ພັນກີບຕໍ່ຄັນ ລາຄາໄດ້ຝັງຄ່າປ້າຍວົງກົມເພື່ອຫຼຸດຜ່ອນລົດຕິດ ສ່ວນສະຖານທີ່ຝາກລົດປີນີ້ ຈັດຢູ່ທາງໃນສະຖານບູຮານວັດພູ ມີ 2ຈຸດອີກ1ຈຸດສໍາຮອງເຊິ່ງມີຄວາມສະດວກສະບາຍ,ສາມາດເຂົ້າເຖິງງານໄດ້ເລີຍ.
ນອກນີ້ ຍັງໄດ້ມີການຈັດງານຕະຫຼາດນັດ ວາງສະແດງ ແລະຈໍາໜ່າຍສິນຄ້າ ເຊິ່ງມີນັກທຸລະກິດ, ຜູ້ປະກອບການ ແລະຊາວຄ້າຂາຍທັງພາຍໃນ ແລະຕ່າງປະເທດ ນໍາເອົາສິນຄ້າມາຮ່ວມວາງສະແດງ, ຈໍາໜ່າຍ, ຊື້-ຂາຍ ມີທັງສິນຄ້າໜຶ່ງຜະລິດຕະພັນ, ປະເພດພາຫະນະ, ເສື້ອຜ້າ, ເຄື່ອງສໍາອາງ, ເຄື່ອງໃຊ້ຄົວ, ໂທລະສັບ, ເຄື່ອງມືສອງ ແລະອື່ນໆ.
ນອກນີ້ຍັງມີຫ້ອງສໍາລັບຂາຍອາຫານ ເຊິ່ງໄດ້ແບ່ງອອກເປັນ 3ກຸ່ມຄື: ກຸ່ມອາຫານແຄມທາງ ມີ ປີ້ງໄກ່, ຕໍາຫມາກຮຸ່ງ, ໝາກໄມ້, ເຂົ້າຫຼາມ. ກຸ່ມອາຫານລາວເອກກະລັກ ມີຕົ້ມໄກ່ໃສ່ໄຂ່ມົດແດງ. ກຸ່ມອາຫານອາຊຽນມີ ອາຫານລາວຕາມສັ່ງ, ອາຫານຫວຽດ, ອາຫານໄທ, ອາຫານຈີນ, ອາຫານຍີ່ປຸ່ນ. ສໍາລັບຄ່າເຊົ່າບຸດ ແມ່ນມີຫຼາຍລາຄາ, ລາຄາຕໍ່ສຸດ 6ແສນກີບ, ສູງສຸດ 6ລ້ານກີບ ໂດຍຂື້ນກັບທ່າແຮງຂອງຜູ້ປະກອບການ.



ສໍາລັບແມ່ຄ້າທີ່ຂາຍດອກໄມ້ທູບທຽນແມ່ນບໍ່ໄດ້ເກັບຄ່າສະຖານທີ່ ແຕ່ຈະເກັບຄ່າພັນທະປະກອບສ່ວນໃນການອະນາໄມໃນແຕ່ລະວັນ. ສ່ວນແມ່ຄ້າຫາບເຂົ້າປຸ້ນ, ເຂົ້າລອດຊ່ອງ, ເຂົ້າຫຼາມແມ່ນບໍ່ໄດ້ເກັບຄ່າສະຖານທີ່ ແລະບໍ່ເກັບຄ່າພັນທະຕ່າງໆ ແຕ່ຈະຂໍຮ້ອງໃຫ້ຊ່ວຍເຫຼືອ ໃນການຮັກສາອະນາໄມ ແລະຄວາມເປັນລະບຽບຮຽບຮ້ອຍ.
ສໍາລັບຄ່າໃຊ້ຈ່າຍເຂົ້າໃນວຽກງານປະດັບປະດາສະຖານທີ່ ລະບົບເວທີກາງ ແສງ ສີ ສຽງ ລວມທັງນະໂຍບາຍຕໍ່ນັກຮ້ອງ, ນັກສິນລະປິນ ທັງພາຍໃນ ແລະຕ່າງປະເທດ ທີ່ເຊີນມາຮ່ວມງານສະແດງ ກໍ່ຄືຄົບງັນໃນແຕ່ລະຄືນ ກໍແມ່ນບໍລິສັດເປັນຜູ້ຮັບຜິດຊອບ ເພື່ອໃຫ້ພໍ່ແມ່ປະຊາຊົນເຂົ້າຊົມຟຣີ ລວມທັງຄ່າອະນາໄມສະຖານທີ່ເດີ່ນບໍລິເວນມໍລະດົກໂລກວັດພູໃນແຕ່ລະວັນ ເພື່ອໃຫ້ມີຄວາມສະອາດສວຍງາມ ແລະມີຄວາມເປັນລະບຽບຮຽບຮ້ອຍ. ນອກນີ້ ທາງກຸ່ມບໍລິສັດຍິ່ງໂຊກໄຊພວກເຮົາ ຍັງໄດ້ມອບພັນທິໃຫ້ລັດອີກ 200 ລ້ານກີບ.






------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments