ເມືອງເງິນ ຈັດການສອບເສັງແຂ່ງຂັນນັກຮຽນເກັ່ງ ແລະ ຖາມ-ຕອບ ຄວາມຮູ້ວິທະຍາສາດ ຂັ້ນເມືອງ ປະຈຳສົກ 2017 -18


ເພື່ອເປັນການສ້າງໂອກາດໃຫ້ນັກຮຽນສະແດງອອກທາງດ້ານຄວາມຮູ້-ຄວາມສາມາດ, ພອນສະຫວັນ,ຫົວຄິດປະດິດສ້າງຂອງຕົນເອງ ທັງເປັນການປັບປຸງຄຸນນະພາບການສຶກສາໃຫ້ນັບມື້ນັບດີຂື້ນ ໃນລະຫວ່າງວັນທີ່ 15 – 16 ກຸມພາ 2018 ນີ້ ຢູ່ທີ່ສະໂມສອນຂອງເມືອງເງິນ ແຂວງໄຊຍະບູລີ .ໄດ້ຈັດງານການສອບເສັງແຂ່ງຂັນນັກຮຽນເກັ່ງ ແລະ ຖາມ-ຕອບ ຄວາມຮູ້ວິທະຍາສາດ ພາຍໃຕ້ການເປັນປະທານຂອງທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ, ມີທ່ານ ໄວພົດ ປັນຍາສອນ ຮອງຫົວໜ້າຫ້ອງການ ສຶກສາທິການ ແລະ ກິລາ ເມືອງ, ຄະນະຫ້ອງການສຶກສາທິການ ແລະ ກິລາ, ມີອຳນວຍການໂຮງຮຽນ ປະຖົມ, ມັດທະຍົມ, ຄູອາຈານ ແລະ ຕົວແທນນັກຮຽນເກັ່ງ ເຂົ້າຮ່ວມ.





ການສອບເສັງແຂ່ງຂັນນັກຮຽນເກັ່ງໃນຄັ້ງນີ້ ມີ 3 ຊັ້ນຮຽນຄື: ປ5, ມ4, ແລະ ມ7. ເຊີ່ງເປັນຕົວແທນນັກຮຽນເກັ່ງຈາກ 25 ໂຮງຮຽນທົ່ວເມືອງ, ມີ ນັກຮຽນເກັ່ງ ເຂົ້າຮ່ວມສອບເສັງທັງໝົດ 105 ນ້ອງ, ຍິງ 48 ນ້ອງ. ແລະ ມີທີມຖາມ-ຕອບ ຄວາມຮູ້ວິທະຍາສາດ ຈຳນວນ 28ທີມ, ໃນນີ້ປະຖົມ 19 ທີມ,ມັດທະຍົມຕອນຕົ້ນ 6 ທີມ , ຕອນປາຍ 3 ທີມ. ສຳລັບຊັ້ນປະຖົມສຶກສາແມ່ນມີ 3 ວິຊາສອບເສັງ ຄື:ວິຊາພາສາລາວ, ຄະນິດສາດ, ໂລກອ້ອມຕົວ. ຊັ້ນມັດທະຍົມສຶກສາຕອນຕົ້ນ-ຕອນປາຍ ມີ 4 ວິຊາຄື: ວິຊາ ພາສາລາວ-ວັນນະຄະດີ, ຄະນິດສາດ, ຟີຊິກສາດ, ແລະ ເຄມີສາດ. ສ່ວນຜົນການແຂ່ງຂັນຖາມ-ຕອບ ຄວາມຮູ້ວິທະຍາສາດ ທີມຊະນະເລີດຊັ້ນປະຖົມໄດ້ແກ່ທີມ ຈາກ ໂຮງຮຽນປະຖົມບ້ານຂອນ, ຊະນະເລີດ ຊັ້ນມັດທະຍົມ ໄດ້ແກ່ທີມຈາກ ຫ້ອງ ມ7 ໂຮງຮຽນ ມສ ນ້ຳເງິນ



ຜ່ານການສອບເສັງແຂ່ງຂັນນັກຮຽນເກັ່ງຂັ້ນເມືອງ ປະຈຳສົກຮຽນ 2017 – 2018 ສາມາດຄັດເລືອກໄດ້ຕົວແທນນັກຮຽນເກັ່ງຈຳນວນ 11 ນ້ອງ ທີ່ໄດ້ອັນດັບ 1 ໃນແຕ່ລະວິຊາ ເພື່ອເປັນຕົວແທນໄປສອບເສັງນັກຮຽນເກັ່ງຂັ້ນແຂວງ ທີ່ຈະໄດ້ຈັດຂື້ນໃນວັນທີ 14-16 ມີນາ 2018 ທີພະແນກສຶກສາທິການ ແລະ ກິລາ ແຂວງໄຊຍະບູລີ



ໂດຍ: ອິນແປງ ແຫວນຄຳ











Post a Comment

0 Comments