ກອງປະຊຸມສະຫລຸບຖອດຖອນບົດຮຽນ ກ່ຽວກັບການ ກັນ ແລະ ຄວບຄຸມພະຍາດໄຂ້ຍຸງລາຍ ປະຈໍາປີ 2017 ໃນຂອບເຂດ ທົ່ວປະເທດ.



ກະຊວງສາທາລະນະສຸກ ໄດ້ຈັດກອງປະຊຸມສະຫລຸບ ຖອດຖອນບົດຮຽນ ກ່ຽວກັບ ການກັນ ແລະ ຄວບຄຸມພະຍາດໄຊຍຸງລາຍ ( ໄຂເລຶອດອອກ) ໄດ້ຈັດຂື້ນ ເປັນເວລາ 2 ວັນ ລະຫວ່າງວັນທີ 22-23 ກຸມພາ 2018 ທີ່ໂຮງແຮມລ້ານຊ້າງ, ນະຄອນຫລວງວຽງຈັນ ໂດຍໃຫ້ກຽດເປັນປະທານເປີດ ມີ ທ່ານ ຮອງສາດສະດາຈານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ແລະ ທ່ານ ດຣ ນາງ, ຈູລຽດ ໄຟລໂຊຄ ຜູ້ຕາງໜ້າ ອົງການອະນາໂລກ ປະຈຳ ສປປ ລາວ, ເຂົ້າຮ່ວມ ມີຫົວຫນ້າຫ້ອງການ, ຫົວຫນ້າກົມ -ຮອງກົມ, ຫົວຫນ້າພະແນກ ສາທາລະນະສຸກ ໃນທົ່ວປະເທດ, ໂຮງຫມໍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ກອງປະຊຸມ ດັ່ງກ່າວ ເພື່ອສະຫລຸບສະພາບໄຂ້ຍຸງລາຍ, ບັນດາມາດຕະການ ແລະ ກິດຈະກໍາ ທີ່ຈັດຕັ້ງປະຕິບັດໃນວຽກງານ ການປ້ອງກັນ ແລະ ຄວບຄຸມພະຍາດ ໄຊ້ຍຸງລາຍ ໃນປີ 2017, ພ້ອມທັງເປັນການຖອດຖອນບົດຮຽນ ແລະ ຕີລາຄາຈຸດດີ-ຈຸດອອນຂໍ້ຄົງຄ້າງໃນການປະຕິບັດກິດຈະກໍາ ການກັນ ແລະ ຄວບຄຸມພະຍາດໄຂ້ຍຸງລາຍ ຈາກການແນະນໍາໃນການປັບປຸງແກ່ໄຂວຽກງານໃຫ້ດີຂື້ນ. ນອກຈາກນີ້ ຍັງເປັນການວາງແຜນ ການກັນ ແລະ ຄວບຄຸມພະຍາດໄຂ້ຍຸງລາຍ ໃຫ້ຫລຸດຜ່ອນອັດຕາການຕາຍ ແລະ ການເຈັບເປັນຍ້ອນພະຍາດ ໄຂ້ຍຸງລາຍ ບໍ່ໃຫ້ມີການລະບາດເກີດຂື້ນ. ພະຍາດໄຂ້ຍຸງລາຍ ແມ່ນຫນຶ່ງໃນບັນດາພະຍາດຕິດຕໍ່. ຕໍ່ກັບພະຍາດດັ່ງກ່າວ ລັດຖະບານ ແລະ ກະຊວງສາທາລະນະສຸກ ແມ່ນໄດ້ເອົາໃຈໃສ່ເປັນພິເສດ. ໄຂຍຸງລາຍ ( ໄຂ້ເລຶອດອອກ) ເກີດຍ້ອນຍຸງລາຍ ທີ່ມີເຊື້ອດູດກິນເລຶອດຄົນ, ໃນເວລາດຽວກັນກໍ່ປ່ອຍເຊື້ອຈຸລະໂລກ ເຂົ້າກະແສເລຶອດຄົນທີ່ຖືກກັດ ພະຍາດໄຂ້ຍຸງລາຍ ມີ 4 ຊະນິດ ຄື: ເດັນ 1-2-3-4 ເຊິ່ງພະຍາດໄຂ້ຍຸງລາຍ ໄດ້ຖືກຄົນພົບ ແລະ ຢັງຍືນວ່າ ມີຢູ່ ສປປ ລາວ ໃນປີ 1977.


 ອິງຕາມຂໍ້ມູນຂອງລະບາດວິທະຍາ ໃນໄລຍະຜ່ານມາ ສະແດງໃຫ້ເຫັນວ່າ ການລະບາດຂອງໄຂຍຸງລາຍ ເກີດຂື້ນໃນທຸກໆ 2-3 ປີ, ແລະ ຍ້ອນຄວາມຮ້ອນຂອງໂລກເພີ່ມຂື້ນ ເຮັດໃຫ້ປະຊາກອນຂອງຍຸງ ເພີ່ມຂື້ນ ແລະ ລະບາດໃນຫລາຍໆຄັ້ງ ເຊັ່ນ: ໃນປີ 1985, ປີ 1987, ປີ 1995, ປີ 2003, 2005, 2010 ແລະ ປີ 2013 ເປັນການລະບາດຂະຫນາດໃຫຍ່ຂອງພະຍາດ ໄຂ້ຍຸງລາຍ ໄດ້ແຜ່ເປັນວົງກ້ວາງ ຕັ້ງແຕ່ຕົວເມືອງຈົນເຖິງຊົນນະບົດ. ໃນປີ 2017 ສະພາບການເກີດພະຍາດໄຂ້ຍຸງລາຍ ໃນ ສປປ ລາວ ມີກໍລະນີທັງໝົດ 5,584 ກໍລະນີ, ຕາຍ 14 ຄົນ. ມີການລາຍງານພະຍາດໄຂ້ຍຸງ ໃນ 16 ແຂວງ ແລະ ອີກ 2 ແຂວງບໍ່ມີການລາຍງານ. ຄື ຊຽງຂວາງ ແລະ ໄຊສົມບູນ.
ສ່ວນມາດຕະການປ້ອງກັນ ແລະ ຄວບຄຸມພະຍາດໄຂ້ຍຸງລາຍ ໂດຍເນັ້ນໃສ່ 6 ຫນ້າວຽກຫລັກ ໄດ້ແກ່: 


1. ວຽກປະສານງານ ແລະ ຊີ້ນໍາການປ້ອງກັນ ແລະ ຄວບຄຸມພະຍາດໄຂ້ຍຸງລາຍ,
2. ວຽກເຝົ້າລະວັງ,
3. ວຽກວິເຄາະ.
4. ວຽກທໍ່ລາຍຄວບຄຸມແຫລ່ງເພາະພັນຫນອນນໍ້າຍຸງລາຍ,
5. ວຽກຄຸ້ມຄອງກໍລະນີ,
6. ວຽກໂຄສະນາສຸຂະສຶກສາ. ນອກຈາກນີ້ ກະຊວງສາທາລະນະສຸກ ກໍ່ຍັງມີມາດຕະການໃນການຄວບຄຸ້ມແຫລ່ງເພາະພັນຫນອນນໍ້າຍຸງລາຍ ໂດຍປະຕິບັດ 5 ປໍ ຄື:
1.  ປິດ ຝາພາຊະນະນໍ້າໃຊ້ ໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງໄຂໃສ່
2. ປ່ຽນ ນໍ້າໃນພາຊະນະ ເຊັ່ນ: ເຕົ້າດອກໄມ້, ນໍ້າຮອງຕິນຕູ້, ຖານຮອງຈອກນໍ້າ ແລະ ອື່ນໆ.
3. ປ່ອຍ ປາຫາງນົກຍຸງ ເພື່ອໃຫ້ກິນຫນອນນໍ້າຍຸງລາຍ
4. ປັບປຸງ ໂດຍການເຮັດອະນາໄມສິ່ງແວດລ້ອມເຮືອນ ທີ່ພັກອາໃສ ບໍ່ໃຫ້ມີ ກະໂປ, ກະປ໋ອງ, ຢາງຕີນລົດ ທີ່ມີນໍ້າຂັງ.
5.ປະຕິບັດ ໃຫ້ເປັນນິໃສ ເປັນປະຈໍາ ອາທິດ ລະ 2 ເທື່ອ ຫລື ຫລາຍກວ່ານັ້ນ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments