ສ່ວຍສາອາກອນສະຫຼຸບວຽກງານປະຈຳ ປີ 2017 ທົ່ວແຂວງຫຼວງພະບາງ




 ພະແນກສ່ວຍສາອາກອນ ແຂວງຫຼວງພະບາງ ໄດ້ຈັດກອງປະຊຸມສະຫຼຸບວຽກງານປະຈໍາ ປີ 2017 ແລະ ວາງທິດທາງ 2018 ຂອງຂະແໜງສວຍສາອາກອນທົ່ວແຂວງ ຂື້ນໃນ ວັນທີ 16 ກຸມ ພາ 2018 ນີ້ ທີ່ຫ້ອງປະຊຸມຂອງພະແນກການເງິນແຂວງ ໂດຍການເປັນປະທານຮ່ວມຂອງ ທ່ານ ສົມນິດ ຄົມທະວົງ ຫົວໜ້າພະແນກການເງິນແຂວງ, ທ່ານ ນາງ ບົວຈີນ ຈັນທະພອນ ຫົວໜ້າພະແນກສ່ວຍສາອາກອນແຂວງ, ມີຫົວໜ້າ-ຮອງຫົວໜ້າຂະແໜງການທີກ່ຽວຂ້ອງ, ພະນັກງານສ່ວຍສາອາກອນ ແລະ ຫົວໜ້າຫ້ອງການສ່ວຍສາອາກອນ 12 ເມືອງເຂົ້າຮ່ວມ.




 ທ່ານ ຄຳຟອງ ພອນປະສິດ ຮອງຫົວໜ້າພະແນກສ່ວຍສາອາກອນແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງວຽກງານສ່ວຍສາອາກອນປະຈຳ ປີ 2017 ແລະ ວາງທິດທາງ 2018 ຂະແໜງ ສ່ວຍສາອາກອນທົ່ວແຂວງໃຫ້ຮູ້ວ່າ: ໃນໄລຍະໜຶ່ງປີຜ່ານມາຄະນະນໍາຂອງພະແນກ ໄດ້ຕັ້ງໜ້າເອົາໃສ່ສຶກສາອົມຮົມນຳພາດ້ານການເມືອງ-ແນວຄິດ ໃຫ້ພະນັກງານລັດຖະກອນພາຍໃນ ໄດ້ມີແນວຄິດອຸ່ນອ່ຽນ ທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ. ອັນພົ້ນແມ່ນໄດ້ສຸມໃສ່ຈັດຕັ້ງປະຕິບັດໜ້າທີວິຊາສະ ເພາະຂອງຕົນໄດ້ສຳເລັດເປັນຢ່າງດີ. ເຊຶ່ງສະແດງອອກດ້ານການເກັບລາຍຮັບບັນລຸ 288 ຕື້ກວ່າກີບ ທຽບໃສ່ແມ່ນລື່ນຄາດໝາຍ,  ໃນນີ້ ລາຍຮັບທ້ອງຖິ່ນ ສາມາດເກັບລາຍຮັບໄດ້ 257 ຕື້ກວ່າກີບ ທຽບໃສ່ແຜນປີ ເພີ່ມຂຶ້ນ 40 ຕື້ກວ່າກີບ, ລາຍຮັບສວຍສາອາກອນປົກກະຕິປະຕິບັດໄດ້ 195 ຕື້ກວ່າກີບ, ທຽບໃສ່ແຜນປີຜ່ານມາ ເພີ່ມຂຶ້ນເກືອບ 40 ຕື້ກີບ. ພ້ອງນີ້ກອງປະຊຸມໄດ້ຮັບຮອງເອົາແຜນຈຸດສຸມ ປີ 2018 ເພື່ອສືບຕໍ່ຈັດປະຕິບັດເປັນຕົ້ນແມ່ນ ວຽກງານການເມືອງ-ແນວຄິດ, ວຽກງານຄຸ້ມຄອງຫົວໜ່ວຍທຸລະກິດ, ວຽກງານຄຸ້ມຄອງລາຍຮັບ-ລາຍຈ່າຍ, ແລະ ວຽກງານອື່ນໆທີປິ່ນອ້ອມຂອງຂະ  ແໜງສ່ວຍສາອາກອນ.


 ໃນຕອນທ້າຍພິທີ ທ່ານ ສົມນິດ ຄົມທະວົງ ຫົວໜ້າພະແນກການເງິນແຂວງ ໄດ້ມີຄຳເຫັນໂອ້ລົມ ຕໍ່ການນໍາແຕ່ລະໜ່ວຍງານຂອງຂະແໜງສ່ວຍສາອາກອນ ໂດຍໄດ້ເນັ້ນໃຫ້ພະແນກສວຍສາອາກອນແຂວງ, ເມືອງ ສືບຕໍ່ປະຕິບັດໜ້າທີຂອງຕົນດ້ວຍຄວາມຮັບຜິດຊອບສູງ, ສືບຕໍ່ປັບປຸງດ້ານການເມືອງ-ແນວຄິດໃຫ້ພະນັກງານມີຄວາມເຂັ້ມແຂງ, ປະສານສົມທົບກັບພາກສ່ວນທີ່ກ່ຽວ ແລະ ເອົາໃຈໃສ່ຍົກສູງຄວາມຜິດຊອບຂອງຕົນເຂົ້າໃນການເກັບລາຍຮັບໃຫ້ໄດ້ຕາມຄາດໝາຍ, ພ້ອມນີ້ຕ້ອງສືບປະຕິບັດລະບຽບກົດໝາຍຢ່າງເຂັ້ມງວດ, ຮັກສາຄວາມມັກຄີພາຍໃນໃຫ້ໜັກແໜ້ນ, ມີຄວາມເປັນເອກະພາບ ເຮັດວຽກລວມສູນປະຊາທິປະໄຕ ມີການແບ່ງຂັ້ນຄຸ້ມຄອງລະຫວ່າງແຂວງກັບເມືອງຢ່າງລະອຽດ, ສູ້ຊົນເກັບລາຍຮັບຜ່ານປະຕູດຽວ ໄປພ້ອມໆກັບການນຳເອົາເນື້ອໃນຈິດໃຈຂອງກອງປະຊຸມໄປຈັດຕັ້ງຜັນຂະຫຍາຍໃຫ້ມີຜົນສຳເລັດຍິ່ງໃຫຍ່ກວ່າເກົ່າ ພ້ອມນັ້ນກໍ່ໄດ້ມອບໃບຍ້ອງຍໍໃຫ້ພະນັກງານຜູ້ທີ່ມີຜົນງານດີເດັ່ນປະກອບສ່ວນເຂົ້າໃນວຽກງານສ່ວຍສາອາກອນຕື່ມອີກ.

ພາບແລະຂ່າວ: ຂ່າວສານຫຼວງພະບາງ

Post a Comment

0 Comments