ທ່າແຕງ ປຶກສາຫາລືການເຄື່ອນໄຫວວຽກງານທະນາຄານສົ່ງເສີມກະສິກໍາປີ 2018




ກອງປະຊຸມປຶກສາຫາລືການເຄື່ອນໄຫວວຽກງານທະນາຄານສົ່ງເສີມກະສິກໍາສາຂາ ແຂວງ ເຊກອງ ຂອງໜ່ວຍບໍລິການເມືອງ ທ່າແຕງ ໄດ້ຈັດຂື້ນຕອນເຊົ້າວັນທີ 22 ກຸມພາ 2018 ນີ້ ຢູ່ທີ່ສະໂມສອນຂອງເມືອງ ໂດຍເປັນກຽດເຂົ້າຮ່ວມຂອງທ່ານ ສົມເພັດ ເອິດລັດດາ ຄະນະປະຈໍາພັກເມືອງ-ຮອງເຈົ້າເມືອງ ທ່າແຕງ ຜູ້ຊີ້ນໍາຂົງເຂດເສດຖະກິດ,ມີທ່ານ ຄໍາສະແຫວງ ສີລິສັກ ຮອງຫົວໜ້າທະນາຄານສົ່ງເສີທກະສິກໍາ ສາຂາແຂວງ ເຊກອງ,ພະແນກກ່ຽວຂ້ອງ,ກຸ່ມພັດທະນາ,ຜູ້ປະກອບການ ພ້ອມດ້ວຍແຂກຖືກເຊີນເຂົ້າຮ່ວມ.





ທ່ານ ສຸເທບ ແສງຫາລາດ ຫົວໜ້າໜ່ວຍບໍລິການທະນາຄານສົ່ງເສີມກະສິກໍາເມືອງ ທ່າແຕງ ຊີ້ແຈງວ່າ: ເພື່ອຈັດຕັ້ງປະຕິບັດຕາມແຈ້ງການເລກທີ 442/ທສກ,ລົງວັນທີ 6 ຕຸລາ 2017 ທີ່ນະຄອນຫຼວງວຽງຈັນ ຕິດພັນກັບແຈ້ງການຂັ້ນແຂວງ-ຂັນເມືອງວາງອອກໃຫ້ປະກົດຜົນເປັນຈິງ ທາງທະນາຄານສົ່ງເສີມກະສິກໍາສາຂາແຂວງ ເຊກອງ ພ້ອມໜ່ວຍບໍລິການພາຍໃນເມືອງ ໄດ້ລົງເຜີຍແຜ່ລະບຽບຂອງສິນເຊື່ອລາຍກຸ່ມ,ສິນເຊື່ອຂະໜາດໜ້ອຍ,ສິນເຊື່ອລາຍບຸກຄົນ,ນິຕິບຸກຄົນ ແລະ ການລະດົມທືນໃນເຂດເມືອງທ່າແຕງເຊິ່ງມີຜູ້ເຂົ້າຮ່ວມທັງໝົດ 576 ຄົນ,ຍິງ 101 ຄົນ,ໄດ້ຮັບຂໍ້ສະເໜີ ແລະ ເງື່ອນໄຂຂອງທະນາຄານໄດ້ທັງໝົດ 10 ບ້ານ,ຈັດຕັ້ງກຸ່ມໄດ້ 57 ກຸ່ມ,ມີຈໍານວນຄອບຄົວເກັບກໍາຂໍ້ມູນຕົວຈິງ 283 ຄອບຄົວ,ມີເນື້ອທີ່ທໍາການຜະລິດ 353 ເຮັກຕາ,ເປົ້າໝາຍແມ່ນຊຸກຍູ້ການປູກກາເຟໃນໄລຍະຍາວ ໂດຍອັດຕາດອກເບ້ຍ 9,5 ສ່ວນຮ້ອຍຕໍ່ປີ,ກໍານົດ 5 ປີ,ວົງເງິນສະເໜີຂໍກູ້ຢືມຈາກລູກຄ້າແມ່ນ 7 ຕື້ 695 ລ້ານກີບ,ໃນນີ້ ຄະນະກໍາມະການອະນຸມັດ-ຮັບຮອງເງິນກູ້ຂັ້ນບ້ານຕົກລົງໃນຈໍານວນ 6 ຕື້ 480 ລ້ານກີບ,ເຊິ່ງເງິນດັ່ງກ່າວຈະນໍາໃຊ້ເຂົ້າປູກກາເຟ,ການຕຽມດິນ,ແນວພັນ,ແຮງງານ,ປຸຍ ແລະ ອຸປະກອນ. ກອງປະຊຸມໄດ້ປະກອບຄໍາຄິດເຫັນ ພ້ອມກໍານົດ ແລະ ຕົກລົງຮັບຮອງເອົາຕາມລະບຽບຫຼັກການຂອງທະນາຄານວາງອອກ ເພື່ອນໍາໄປຈັດຕັ້ງປະຕິບັດໃນສົກປີ 2018 ນີ້ໃຫ້ເກີດດອກອອກຜົນ ແລະ ທັນກັບເວລາທີ່ກໍານົດໄວ້.




ໂອກາດນີ້ ທ່ານ ສົມເພັດ ເອິດລັດດາ ຄະນະປະຈໍາພັກເມືອງ-ຮອງເຈົ້າເມືອງ ທ່າແຕງ ຜູ້ຊີ້ນໍາຂົງເຂດເສດຖະກິດ ໄດ້ສະແດງຍ້ອງຍໍຊົມເຊີຍມາຍັງທະນາຄານສົ່ງເສີມກະສິກໍາ ສາຂາແຂວງ ເຊກອງ ພ້ອມໜ່ວຍບໍລິການພາຍໃນເມືອງ ໄດ້ນໍາສະເໜີເອົາທືນຈໍານວນຫຼວງຫຼາຍ ທີ່ຈະປ່ອຍເງິນດັ່ງກ່າວໃຫ້ຊາວກະສິກອນຄັ້ງນີ້ ຮຽກຮ້ອງມາຍັງຄະນະຮັບຜິດຊອບທັງຂັ້ນເມືອງແລະຮາກຖານບ້ານ ຕ້ອງໃກ້ຊິດຕິດແທດກັບຊາວກະສິກອນຢ່າງຈິງຈັງ ໂດຍຖືເອົາລະບຽບຫຼັການຕ່າງໆຂອງທະນາຄານວາງອອກໄປຈັດຕັ້ງປະຕິບັດ ເຊິ່ງທະນາຄານມີພາລະບົດບາດໂດຍກົງໃນການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ເຫັນໄດ້ໃນການສະໜອງແຫຼ່ງທຶນດອກເບ້ຍຕໍ່າໃຫ້ແກ່ຄອບຄົວທີ່ຂາດເຂີນທຶນຮອນເຂົ້າ
ໃນການຜະລິດເປັນສິນຄ້າ,ສ້າງເສດຖະກິດຄອບຄົວ,ແກ້ໄຂຄວາມທຸກຍາກ ເຮັດໃຫ້ມີລາຍຮັບຈາກການປູກຝັ່ງຕ່າງໆ ແນ່ໃສ່ຫັນປ່ຽນເສດຖະກິດທຳມະຊາດໄປສູ່ການຜະລິດເປັນສິນຄ້າ,ເວົ້າສະເພາະ ທະທະນາຄານສົ່ງເສີມກະສິກໍາສາຂາແຂວງ ເຊກອງ ພ້ອມໜ່ວຍບໍລິການເມືອງທ່າແຕງ ຕ້ອງເອົາໃຈໃສ່ລົງຕິດຕາມກວດກາປະເມີນການປ່ອຍເງິນໃຫ້ກຸ່ມເປົ້າໝາຍການຜະລິດ,ກວດກາເກັບກຳກູ້ຢືມໜີ້ສິນໃນຕໍ່ໜ້າ ແລະ ປ່ອຍເງິນຖືກຕາມລະບຽບການ,ຮັບປະກັນການຮົ່ວໄຫຼ ແລະ ເກັບກູ້ຄືນໄດ້ຕາມກໍານົດໃຫ້ໄດ້ 100 ຮ້ອຍສ່ວນຮ້ອຍ.


ຂ່າວ: ພອນ ບຸນອຸທິດ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments