ກອງປະຊຸມປຶກສາຫາລຶຫ້າງຫາກະກຽມ 3 ງານໃຫ່ຍ ທີ່ເມືອງມໍລະດົກໂລກ ຫລວງພະບາງ




ວັນທີ 16 ກຸມພານີ້ ທີ່ຫ້ອງປະຊຸມຫ້ອງວ່າການປົກຄອງເມືອງຫລວງພະບາງ ໄດ້ຈັດກອງປະຊຸມປຶກສາຫາລຶຫ້າງຫາກະກຽມ 3 ງານໃຫ່ຍຄື: ບຸນປີໃໝ່ລາວ ພສ 2561 ທີ່ເມືອງຫລວງພະບາງ, ງານສະເຫຼີມສະຫລອງປີທ່ອງທ່ຽວລາວ 2018 ທີ່ແຂວງຫຼວງພະບາງ ແລະ ພິທີປະກາດການສ້າງຕັ້ງ ນະຄອນ-ຫຼວງພະບາງ ໂດຍການເປັນປະທານຂອງ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ປະທານຈັດງານບຸນປະເພນີ ກຸດສົງການປີໃໝ່ລາວ ທີ່ເມືອງຫຼວງພະບາງ, ມີ ທ່ານ ສຸກັນ ບຸນຍົງ ເຈົ້າເມືອງໆຫຼວງພະບາງ ຮອງປະທານຈັດງານບຸນ ພ້ອມດ້ວຍຄະນະກໍາມະການ, ອານຸກໍາມະການຮັບຜິດຊອບວຽກງານ ຂັ້ນເມືອງ, ຂັ້ນແຂວງ ແລະ ອົງການປົກຄອງເມືອງອ້ອມຂ້າງເຂົ້າຮ່ວມ. 



ໃນກອງປະຊຸມຄັ້ງນີ້ ຄະນະອານຸກໍາມະການເນື້ອໃນ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການແຕ່ງຕັ້ງຄະນະກໍາມະການຊີ້ນໍາລວມ ແລະ ອານຸກໍາມະການຮັບຜິດຊອບຈັດງານບຸນປີໃໝ່ລາວ ພສ 2561, ຄສ 2018 ທີ່ເມືອງຫຼວງພະບາງ ແລະ ຜ່ານລາຍການເຄື່ອນເຄື່ອນໄຫວ ບຸນປີໃໝ່ລາວ, ງານສະເຫຼີມສະຫຼອງປີທ່ອງທ່ຽວລາວ 2018 ທີ່ແຂວງຫຼວງພະບາງ, ພິທີປະກາດການສ້າງຕັ້ງ ນະຄອນ-ຫຼວງພະບາງ ໂດຍຈະເລີ້ມກິດຈະກຳແຕ່ ວັນທີ 11 ຫາ 20 ເມສາ. 


ວາລະກອງປະຊຸມ ຄະນະກໍາມະການແຕ່ລະພາກສ່ວນ ໄດ້ພາດປ່ຽນກັນປະກອບຄໍາຄິດ-ຄໍາເຫັນ ຖອດຖອນບົດຮຽນໃນການຈັດປະຕິບັດໃນໄລຍະຜ່ານມາ ເພື່ອໃຫ້ງານຄັ້ງນີ້ ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ. ຕອນທ້າຍກອງປະຊຸມ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ໄດ້ຮຽກຮ້ອງໃຫ້ຄະນະນຳຂອງເມືອງຫຼວງພະບາງ ເປັນເຈົ້າການ ຈັດຕັ້ງປະຕິບັດໃນການຫ້າງຫາກະກຽມ ເພື່ອໃຫ້ມີກິດຈະກຳຕ່າງໆ ທີ່ສອດຄ່ອງກັບມູນເຊື້ອວັດທະນະທຳ, ຮິດຄອງປະເພນີ ທີ່ເປັນເອກະລັກຂອງຊາວເມືອງຫຼວງພະບາງ ທັງເຮັດໃຫ້ງານບຸນ ມີຄວາມເປັນລະບຽບຮຽບຮ້ອຍ, ມີບັນຍາກາດເບີກບານມ່ວນຊຶ່ນ ຮັບປະກັນຄວາມສະຫງົບປອດໄພ.



ຂ່າວ: ສົມແກ້ວ (ເມືອງຫຼວງພະບາງ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments