ແຂວງວຽງຈັນປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ




ແຂວງວຽງຈັນ : ໃນວັນທີ 20 ກຸມພາ 2018 ຜ່ານມານີ້ ແຂວງວຽງຈັນໄດ້ປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ ຄືວັນທີ 9 ທັນວາ 2003 ຫາ ວັນທີ 9 ທັນວາ 2017 ຢູ່ທີ່ສະໂມສອນໃຫຍ່ຂອງແຂວງ ໂດຍການເປັນປະທານຂອງ ທ່ານ ວິດົງ ໄຊຍະສອນ ກຳມະການສູນກາງພັກ,ເລຂາພັກແຂວງເຈົ້າແຂວງໆວຽງຈັນ,ມີບັນຄະນະປະຈຳ,ກຳມະການພັກແຂວງ,ພະແນກການ,ອົງການ,ກົມກອງອ້ອມຂ້າງແຂວງເຂົ້າຮ່ວມ.



ໃຫ້ກຽດຂຶ້ນປາຖະກະຖາວັນດັ່ງກ່າວ ໂດຍແມ່ນ ທ່ານ ວິນັດ ສີສຸວົງ ຄະນະປະຈຳພັກແຂວງ,ປະທານກວດກາພັກ,ຫົວໜ້າພະແນກກວດກາລັດແຂວງວຽງຈັນ ເຊິ່ງທ່ານໄດ້ຍົກໃຫ້ເຫັນເຖິງສະພາບລວມຂອງການສໍ້ລາດບັງຫຼວງ ແລະ ການກຳນົດວັນຕ້ານການສໍ້ລາດບັງຫຼວງສາກົນ,ການສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ສາທາລະນະລັດ ປະຊາທິປະໄຕ ປະຊາຊົນລາວ. ການສໍ້ລາດບັງຫຼວງແມ່ນສະພາບຍໍ້ທໍ້ໜຶ່ງໃນກົງຈັກການຈັດຕັ້ງ,ເປັນໄພອັນຕະລາຍຮ້າຍແຮງ,ຊຶ່ງສົ່ງຜົນກະທົບ ແລະ ກົດໜ່ວງຖ່ວງດຶງເຖິງການພັດທະນາເສດຖະກິດ-ສັງຄົມຂອງແຕ່ລະປະເທດໃນໂລກ,ການສໍ້ລາດບັງຫຼວງພວມເປັນໄພຂົ່ມຂູ່ເຖິງຄວາມມີສະຖຽນລະພາບທາງດ້ານການເມືອງຂອງການຈັດຕັ້ງທັງພັກລັດ ແລະ ເອກະຊົນ,ສ້າງໃຫ້ເກີດມີຄວາມບໍ່ສະຫງົບ,ຄວາມບໍ່ຍຸຕິທຳໃນສັງຄົມ ເປັນການບັນທອນກຳລັງແຮງກໍ່ຄືຄວາມເຊື່ອໝັ້ນ ແລະ ຄ່ານິຍົມຂອງສັງຄົມຕໍ່ສະຖາບັນການປົກຄອງ.ຍ້ອນເຫັນໄດ້ຜົນຮ້າຍ ແລະ ໄພອັນຕະລາຍຂອງການສໍ້ລາດບັງຫຼວງຄືດັ່ງກ່າວ ກອງປະຊຸມສະມັດຊາໃຫຍ່ສະຫະປະຊາຊາດ ໃນປີ 2003 ໄດ້ອອກຍັດຕິເລກທີ58/4 ໂດຍກຳນົດເອົາວັນທີ 9 ທັນວາ ຂອງທຸກໆປີ ເປັນວັນຕ້ານການສໍ້ລາດບັງຫຼວງສາກົນ.



ທ່ານ ວິນັດ ສີສຸວົງ ຄະນະປະຈຳພັກແຂວງ,ປະທານກວດກາພັກ,ຫົວໜ້າພະແນກກວດກາລັດແຂວງວຽງຈັນ ຍັງໄດ້ລາຍງານໃຫ້ຮູ້ຕື່ມອີກວ່າ: ສຳລັບຢູ່ແຂວງວຽງຈັນ ໃນ 1 ປີຜ່ານມາ ໄດ້ເອົາໃຈໃສ່ໃນການຕິດຕາມກວດກາບັນດາປະກົດການຍໍ້ທໍ້ຕ່າງໆທີ່ເກີດຂຶ້ນ ເຊິ່ງເປັນໜໍ່ແໜງໃນການສໍ້ລາດບັງຫຼວງເຊັ່ນ: ການເບີກຈ່າຍເງິນເດືອນ,ເງິນອຸດໜູນທີ່ບໍ່ຖືກຕ້ອງຕາມຕົວຈິງ ໃຫ້ແກ່ພະນັກງານຢູ່ບັນດາເມືອງ,ການເບີກຈ່າຍເງິນງົບປະມານ ເຂົ້າໃນການກໍ່ສ້າງພື້ນຖານໂຄງລ່າງຂອງແຂວງ ເກີນສາລະບານງົບປະມານທີ່ໄດ້ກຳນົດໄວ້,ການອວຍໜີ້ 3 ແຈ ແລະ ບັນຫາອື່ນໆ ອັນໄດ້ເຮັດໃຫ້ງົບປະມານຂອງລັດເສຍຫາຍເປັນຈຳນວນຫຼາຍພໍສົມຄວນ ມາຮອດປະຈຸບັນທາງພາກສ່ວນທີ່ກ່ຽວຂ້ອງ ກໍ່ໄດ້ເອົາໃຈໃສ່ຕິດຕາມແກ້ໄຂ ແລະ ກຳລັງສືບຕໍ່ແກ້ໄຂຕາມລະບຽບກົດໝາຍທີ່ໄດ້ກຳນົດອອກ.


ພາບ-ຂ່າວ ໂດຍ : ບຸນມາ ແກ້ວບຸດດາ 
(ແຂວງວຽງຈັນອອນລາຍ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments