ທ່ານນາງສຸວັນເພັງ ບຸບຜານຸວົງ ສືບຕໍ່ລົງເກັບກຳຂໍ້ມູນດ່ານທາງນໍ້າ ແລະ ທາງອາກາດ



 ໂດຍປະຕິບັດຕາມທິດຊີ້ນຳ ຂອງ ທ່ານຮອງນາຍົກລັດຖະມົນຕີ ສອນໄຊ ສີ ພັນດອນ ໃນຄັ້ງວັນ ທີ 10 ພະຈິກ 2017 ໃນລະຫວ່າງວັນທີ 11-16 ກຸມພາ 2018 ທ່ານ ນ. ສຸວັນເພັງ ບຸບຜານຸວົງ ລັດຖະມົນຕີປະຈໍາສໍານັກງານນາຍົກລັດຖະມົນຕີ ພ້ອມດ້ວຍຄະນະ ຈາກສຳນັກງານນາຍົກລັດຖະມົນຕີ ແລະ ບັນດາກະຊວງທີ່ກ່ຽວຂ້ອງ ໄດ້ໄປເຄື່ອນໄຫວເກັບກຳຂໍ້ມູນ ບັນດາດ່ານທາງນໍ້າ ແລະ ທາງອາກາດຢູ່ ແຂວງບໍ່ແກ້ວ, ຫຼວງພະບາງ ແລະ ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຢ່າງອົບອຸ່ນ ຈາກການ​ນຳຂອງແຂວງ ແລະ ພະແນກການກ່ຽວຂ້ອງ ຂອງທ້ອງຖິ່ນດັ່ງກ່າວ.



ການເຄື່ອນໄຫວເຮັດວຽກໃນຄັ້ງນີ້, ໄດ້ລົງເລິກເກັບກຳຂໍ້ມູນດ່ານທາງນໍ້າ ແລະ ທາງອາກາດ (ດ່ານສະໜາມບິນສາກົນ ) ໂດຍໄດ້ຈັດກອງປະຊຸມສຳມະນາວິຊາການຂຶ້ນຢູ່ ແຕ່ລະແຂວງ, ພາຍໃຕ້ການເປັນປະທານ ຂອງທ່ານ ນ. ສຸວັນ ເພັງ ບຸບຜານຸວົງ, ໂດຍມີຜູ້ຕາງໜ້າຈາກ ບັນດາຂະແໜງການທີ່ກ່ຽວຂ້ອງຂັ້ນສູນກາງ, ແຂວງ ແລະ ພະນັກງານຫຼັກແຫຼ່ງປະຈຳດ່ານ ຂອງແຂວງເຂົ້າຮ່ວມ. ໃນກອງປະຊຸມ ໄດ້ຮັບຟັງການລາຍງານສະພາບການຈັດຕັ້ງ ແລະ ການເຄື່ອນໄຫວຂອງດ່ານຕ່າງໆ ໃນໄລຍະທີ່ຜ່ານມາ ຈາກຜູ້ຕາງໜ້າຂອງດ່ານ ທີ່ຮັບຜິດຊອບໃນແຕ່ລະຂົງເຂດວຽກງານ ແລະ ຂະແໜງການທີ່ກ່ຽວຂ້ອງຂອງແຂວງ ໂດຍສະເພາະ ສະພາບການຈັດຕັ້ງປະຕິບັດວຽກງານຕົວຈິງຂອງດ່ານ ທີ່ຕິດພັນກັບຄວາມຮັບຜິດຊອບຂອງພາກສ່ວນ ແລະ ຂະແໜງການຕົນ. ພ້ອມດຽວກັນນັ້ນ, ຄະນະຂອງທ່ານລັດຖະມົນຕີປະຈໍາ ສໍານັກງານນາຍົກລັດຖະມົນຕີ ຍັງໄດ້ໄປພົບປະ ແລະ ເຮັດວຽກຢູ່ດ່ານ, ເບິ່ງຈຸດທີ່ຕັ້ງ ກໍ່ຄື ສະພາບພື້ນຖານໂຄງລ່າງ ແລະ ການເຄື່ອນໄຫວວຽກງານຕົວຈິງ ຂອງບາງດ່ານທີ່ສໍາຄັນ ເປັນຕົ້ນ ດ່ານທ່າເຮືອຫ້ວຍຊາຍ, ແຂວງບໍ່ແກ້ວ; ສະໜາມບິນສາກົນຫຼວງພະບາງ ແລະ ສະໜາມບິນສາກົນວັດໄຕ.



​​​​​​​​​​​​​​​​​​​ຈຸດປະສົງ ໃນການເຄື່ອນໄຫວວຽກງານດັ່ງກ່າວ ແມ່ນເພື່ອເກັບກຳຂໍ້ມູນ ສະພາບການຈັດຕັ້ງ ແລະ ການເຄື່ອນໄຫວຂອງບັນດາດ່ານ ເປັນຕົ້ນ ແມ່ນໂຄງປະກອບກົງຈັກການຈັດຕັ້ງ, ສິດ, ພາລະບົດບາດ ແລະ ໜ້າທີ່ຮັບຜິດຊອບ ຂອງພະນັກງານແຕ່ລະຂະແໜງການ ທີ່ປະຈຳຢູ່ດ່ານ; ກົນໄກການຄຸ້ມຄອງ ແລະ ຂອດປະສານງານ ຂອງບັນດາຂະແໜງການ ທີ່ປະຈຳຢູ່ດ່ານ; ບັນຫາງົບປະມານບໍລິຫານດ່ານ; ໂຄງສ້າງພື້ນຖານໂຄງລ່າງ ທີ່ເປັນສິ່ງເອື້ອອຳນວຍ ໃນການຄຸ້ມຄອງບໍລິຫານດ່ານ; ຂໍ້ສະດວກ, ຂໍ້ຫຍຸ້ງຍາກໃນຂອດການຈັດຕັ້ງປະຕິບັດວຽກງານໃນ ໄລຍະຜ່ານມາ, ວິທີແກ້ໄຂໃນຕໍ່ໜ້າ ແລະ ບັນຫາອື່ນໆ.

ທັງນີ້ ກໍ່ເພື່ອເປັນການກະກຽມດ້ານເນື້ອໃນ ໃຫ້ແກ່ການຄົ້ນຄວ້າຮ່າງດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງດ່ານ ແຕ່ລະປະເພດ ແລະ ນິຕິກຳທີ່ກ່ຽວຂ້ອງ, ທັງເປັນການລະດົມແນວຄວາມຄິດ ແລະ ການປະກອບຄຳເຫັນ ຂອງແຕ່ລະຂະແໜງການ ຕໍ່ຮ່າງດຳລັດ​ດັ່ງກ່າວ ໃຫ້ມີເນື້ອໃນ​ອຸດົມສົມບູນ ແລະ ຄົບຖ້ວນ, ເຮັດໃຫ້ການຈັດຕັ້ງ ແລະ ການເຄື່ອນໄຫວວຽກງານຮອບດ້ານຂອງແຕ່ລະດ່ານ ໄດ້ຮັບການປັບປຸງ ໃຫ້ມີຄວາມກະທັດຮັດ, ສະດວກ, ວ່ອງໄວ, ໂປ່ງໃສ, ທັນສະໄໝ, ຍຸຕິທຳ, ຮັບປະກັນຄວາມຖືກຕ້ອງ ຕາມລະບຽບກົດໝາຍ ແລະ ເປັນເອກະພາບກັນ ໃນການຈັດຕັ້ງປະຕິບັດ ໃນຂອບເຂດທົ່ວປະເທດ.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments