ສື່ເກົ່າພົບຄວາມທ້າທາຍທ່າມກາງສື່ອອນລາຍກຳລັງຂະຫຍາຍຕົວ



ການຂາດແຄນບຸກຄະລາກອນ ເປັນຕົ້ນຜູ້ມີຄວາມຮູ້ຄວາມສາມາດດ້ານວິຊາສະເພາະ, ງົບປະມານ, ແລະ ສິ່ງອຳນວຍຄວາມສະດວກທາງດ້ານເຕັກນິກອຸປະກອນ ຍັງເປັນສິ່ງທ້າທາຍສຳລັບຫນ່ວຍງານສື່ຂອງລັດໃນຂອບເຂດທົ່ວປະເທດ ບໍ່ວ່າຈະເປັນ ໂທລະພາບ, ວິທະຍຸ ແລະ ສື່ສິ່ງພິມ ຂະນະທີ່ລາຍຮັບເຂົ້າສູ່ສື່ນີ້ກຳລັງຫົດຕົວ. 



ໃນກອງປະຊຸມສະຫຼຸບວຽກງານຖະແຫຼງຂ່າວຂອງກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວທີ່ຈັດຂຶ້ນໃນນະຄອນຫຼວງວຽງຈັນ (15-16 ກຸມພາ) ມີການເຂົ້າຮ່ວມຂອງບັນດາຫົວໜ້າຂະແໜງຖະແຫຼງຂ່າວ ບັນນາທິການ ແລະ ນັກຂ່າວອາວຸໂສ ຫຼາຍກວ່າ 100 ທ່ານ ທີ່ຕີລາຄາວຽກງານຖະແຫຼງຂ່າວໃນໜຶ່ງປີຜ່ານມາ ແລະ ແລກປ່ຽນຄຳຄິດຄຳເຫັນເຖິງຫຼາຍບັນຫາໃນນັ້ນມີສິ່ງທ້າທາຍຕ່າງໆທີ່ກ່ຽວຂ້ອງກັບການເຜີຍແຜ່ຂໍ້ມູນຂ່າວສານໃຫ້ປະຊາຊົນລາວບັນດາເຜົ່າໃນຂອບເຂດທົ່ວປະເທດ ໃນນັ້ນກໍມີບັນຫາ ການຫຼຸດລົງຂອງການບໍລິໂພກຂໍ້ມູນຂ່າວສານຜ່ານສື່ເດີມ ຄື ໂທລະພາບ ວິທະຍຸ ແລະ ໜັງສືພິມ ຄ່ານິຍົມສື່ສັງຄົມອອນລາຍທີ່ກຳລັງຂະຫຍາຍຕົວ ຄວາມຫຍຸ້ງຍາກໃນການຂະຫຍາຍການເຂົ້າເຖິງຂໍ້ມູນຂ່າວສານໄປສູ່ເຂດຊົນນະບົດ ຫ່າງໄກສອກຫຼີກ. 



ໃນກອງປະຊຸມພາຍໃຕ້ການເປັນປະທານຂອງຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ສະຫວັນຄອນ ຣາຊະມົນຕຣີ ໄດ້ມີການຍົກເອົາບັນຫາກ່ຽວກັບການມອບພັນທະຂອງໜ່ວຍງານຖະແຫຼງຂ່າວເປັນຕົ້ນແມ່ນສື່ເດີມ ເຊິ່ງຜູ້ເຂົ້າຮ່ວມບາງທ່ານ ໄດ້ຍົກໃຫ້ເຫັນວ່າ ບັນດາອົງການສື່ມວນຊົນໄດ້ປະຕິບັດຕາມນະໂຍບາຍເພິ່ງຕົນ ເອງ ກຸ້ມຕົນເອງຂອງພັກ ແລະ ລັດວາງອອກ ແຕ່ຕ້ອງມອບພັນທະເຂົ້າງົບປະມານຂອງລັດ ໃນເວລາດຽວກັນ ລາຍຮັບຂອງອົງການສື່ມວນຊົນມີຄວາມຫົດໂຕ ເນື່ອງຈາກສັງຄົມຫັນໄປຊົມໃຊ້ ແລະ ນຳໃຊ້ສື່ສັງຄົມອອນລາຍຫຼາຍຂຶ້ນ ດ້ວຍເຫດນັ້ນຈຶ່ງເປັນສິ່ງທີ່ຍາກທີ່ຈະເຮັດໃຫ້ອົງການສື່ບັນລຸແຜນສ້າງລາຍຮັບທີ່ລັດຖະບານໄດ້ກຳນົດ.
ນອກນີ້ ໃນກອງປະຊຸມຍັງມີການຮຽກຮ້ອງໃຫ້ມີການປັບປຸງນິຕິກຳທີ່ກ່ຽວຂ້ອງເພື່ອຮັບປະກັນການຄຸ້ມຄອງວຽກງານສື່ໃນຂອບເຂດທົ່ວປະເທດ ການສະໜອງຂອງພາກລັດທາງດ້ານງົບປະມານ, ບຸກຄະລາກອນ ແລະ ອຸປະກອນເຕັກນິກທີ່ຈຳເປັນ ໃຫ້ໜ່ວຍງານສື່ ລວມທັງການຈັດຝຶກອົບຮົມເພື່ອຍົກສູງຄວາມຮູ້ຄວາມສາມາດຂອງວິຊາການໃນຂະແໜງການສື່ມວນຊົນ.




ພາບ ແລະ ຂ່າວ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments