ເຈົ້າເມືອງ ຈຳພອນ ຂໍຄວາມຮ່ວມມື ແຈ້ງຂໍ້ມູນການໄປຂໍທານຂອງປະຊາຊົນ



ເມື່ອບໍ່ດົນມານີ້ທ່ານ ສຸທິ ຜີວສຸລິມາດ ເຈົ້າເມືອງ ຈຳພອນ ໄດ້ເຮັດໜັງສືສະເໜີ ສະບັບໜຶ່ງມາຍັງເຈົ້າເມືອງ, ຫົວໜ້າພະແນກການອ້ອມຂ້າງແຂວງ ເພື່ອຂໍຄວາມຮ່ວມມື ຊ່ວຍໃນການລາຍງານ ແລະ ແຈ້ງຂໍ້ມູນຂອງການ ໄປຂໍທານຂອງປະຊາຊົນ ທີ່ເຄື່ອນໄຫວຫາເລາະຂໍທານຢູ່ແຕ່ລະເມືອງ ແລະ ຢູ່ພະແນກການອ້ອມຂ້າງແຂວງ ອັນເປັນການສ້າງພາບພົດບໍ່ງາມ ແລະ ຄວາມລະອາຍໃຫ້ອຳນາດ ການປົກຄອງ ທ້ອງຖິ່ນ ແຕ່ລະຂັ້ນຂອງເມືອງບໍ່ໜ້ອຍ. ທັງນີ້ກໍເພື່ອເປັນການສະກັດກັ້ນ ແລະຢຸດເຊົາການໄປຂໍທານຂອງປະຊາຊົນກຸ່ມຄົນ ຫລື ບຸກຄົນ ທີ່ໄປຂໍທານໃຫ້ຢຸດເຊົາການເຄື່ອນໄຫວ ແລ້ວຫັນແນວຄວາມຄິດ ໄປຕາມທິດທາງ ການດຳລົງຊີວິດ ເພິ່ງຕົນເອງກຸ້ມຕົນເອງ ທັງສ້າງຄວາມເຂັ້ມແຂງດ້ວຍຕົນເອງ.

ເມື່ອທ່ານໃດຫາກພົບເຫັນ ຫລື ໄດ້ຮັບຂໍ້ມູນວ່າມີຄົນຂອງ ເມືອງຈຳພອນ ຫາກໄປຂໍທານໃນທ້ອງຖິ່ນດັ່ງກ່າວ ກໍ່ຂໍໃຫ້ຊ່ວຍສອບສວນຄວາມເປັນຈິງ ແລ້ວປະສານມາຍັງຫ້ອງ ການປົກຄອງ ເມືອງຈຳພອນ ດ້ວຍເລກໝາຍໂທລະສັບ 041 311382 ເພື່ອຈະນຳຕົວຜູ້ກ່ຽວ ມາທຳການສຶກສາອົບຮົມ ເຕັກເຕືອນ ແລະ ໃຊ້ມາດຕະການໃຫ້ຢຸດເຊົາ
.
ຖ້າເວົ້າເຖິງຄົນໄປຂໍທານ ຢູ່ທ້ອງຖີ່ນອື່ນ ຫລາຍຄົນກໍມັກຈະເອີ່ຍເຖິງ ວ່າແມ່ນຄົນບ້ານຄຳປາ ແໜ ແລະ ບ້ານປ່າກ້ວຍ ເມືອງຈຳພອນຈາກການເກັບກຳຂໍ້ມູນໃນເບື້ອງຕົ້ນໄລຍະ 2-3 ປີຜ່ານມາ ມີປະຊາຊົນ 22 ຄອບຄົວ ຍັງພົບກັບຄວາມທຸກຍາກຂາດເຂີນ ແລະ ມີການເຄື່ອນໄຫວໄປຂໍທານທ້ອງຖິ່ນອື່ນແທ້. ຈາກການຊຸກຍູ້ຊ່ວຍເຫລືອຢ່າງໃກ້ສິດ ຕິດແທດຈາກ ອຳນາດການ ປົກຄອງ ຂອງແຂວງ, ເມືອງຈຳພອນ ແລະ ນັກທຸລະກິດ ກໍຄື ທ່ານ ເກຍ ອູ໋ສິດທິເດດ ເຮັດໃຫ້ການດຳລົງຊີວິດ ຂອງປະຊາຊົນບ້ານດັ່ງກ່າວດີຂຶ້ນໃນນີ້ອຳນາດການປົກຄອງ ແຕ່ລະຂັ້ນໄດ້ລົງທຶນ ພັດທະນາພື້ນຖານໂຄງລ່າງເປັນຮູບປະທຳ, ເຮືອນຊານ ບ້ານຊ່ອງໄດ້ຖືກຈັດສັນ, ເນື້ອທີ່ການຜະລິດ ແມ່ນໄດ້ຖືກສະໜອງຈັດສັນ ໃຫ້ປະຊາຊົນໄດ້ທໍາການ ຜະລິດແຕ່ລະຄອບຄົວ, ໄດ້ສ້າງໂຮງຮຽນໂຮງໝໍພາຍໃນບ້ານຂຶ້ນໃໝ່ ສາມາດໃຫ້ການບໍລິການ ຂອງປະຊາຊົນໄດ້ຢ່າງທົ່ວເຖິງ.
ທີ່ມາ: ຂປລ /ລາວໂພສ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments