ເມືອງໄຊຍະບູລີຈັດພິທີເປີດແຫຼ່ງທ່ອງທ່ຽວຖໍ້າພະຜາຂີ້ໝີ້ນບ້ານນາໄຮ




ເພື່ອເປັນການກະກຽມການເປີດປີທ່ອງທ່ຽວຂອງແຂວງ ແລະ ງານມະຫາກໍາບຸນຊ້າງປີ2018ຂອງແຂວງໄຊຍະບູລີ ທີ່ຈະໄດ້ໄຂຂື້ນໃນມໍ່ໆນີ້. ໃນຕອນເຊົ້າວັນທີ່ 14 ກຸມພາ 2018ນີ້ ເມືອງ ໄຊຍະບູລີ ແຂວງ ໄຊຍະບູລີ ໄດ້ເປີດແຫຼ່ງທ່ອງທ່ຽວ ຖໍ້າພະຜາຂີ້ໝິ້ນ ບ້ານນາໄຮຂື້ນ. ໂດຍການເປັນກຽດເຂົ້າຮ່ວມຂອງທ່ານ ຄຳສຸກ ທໍ່ ຮອງເລຂາພັກແຂວງ ປະທານແນວລາວສ້າງຊາດແຂວງ, ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ທ່ານ ຄຳສິງ ສໍລະສຸກ ເຈົ້າເມືອງໄຊຍະບູລີ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າພະແນກການຂອງແຂວງ, ຫົວໜ້າ,ຮອງຫົວໜ້າຫ້ອງການຂອງເມືອງ, ອໍານາດການປົກຄອງບ້ານ ແລະ ພະນັກງານຫຼັກແຫຼ່ງຂອງເມືອງ ເຂົ້າຮ່ວມ.



ໃນພິທີ ທ່ານ ບຸນເສັງ ວົງສະນິດ ຮອງເຈົ້າເມືອງໄຊຍະບູລີ ໄດ້ກ່າວລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດການເປີດແຫຼ່ງທ່ອງທ່ຽວຖ້ຳພະຜາຂີ້ໝິ້ນວ່າ: ອີງຕາມແຜນຍຸດທະສາດການທ່ອງທ່ຽວຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍ່ຄືຂອງແຂວງເວົ້າລວມ ເວົ້າສະເພາະກໍ່ຄືວິໄສທັດແຕ່ນີ້ຮອດປີ 2030, ຍຸດທະສາດ 2025 ແລະ ແຜນພັດທະນາວຽກງານທ່ອງທ່ຽວ ປີ 2018 ຂອງເມືອງ ໄຊຍະບູລີວາງອອກ ໃຫ້ໄດ້ຮັບການຈັດຕັ້ງປະຕິບັດປະກົດຜົນເປັນຈິງ, ເຊີ່ງເມືອງ ໄຊຍະບູລີ ໄດ້ກໍານົດແລວທາງການທ່ອງທ່ຽວມີ 13 ແລວທາງ ໃນນີ້ຈຸດຖ້ຳພະຜາຂີ້ເໝັ້ນກໍ່ເປັນໜື່ງໃນແລວທາງການພັດທະນາການທ່ອງທ່ຽວຂອງເມືອງ ໄຊຍະບູລີ, ຖໍ້າພະຜາຂີ້ເໝັ້ນເປັນຖ້ຳທີ່ມີຄົນເຂົ້າຊົມ ແລະ ສັກກາລະປູຊາມາແຕ່ດືກດຳບັນ, ເມື່ອຮອດຍາມບຸນປີໃໝ່ລາວ, ເຖົ້າແກ່ແນວໂຮມ, ພະສົງອົງຄະເຈົ້າບ້ານນາໄຮ ແລະ ບ້ານອື່ນໆພາຍໃນເມືອງໄດ້ໄປກາບໄຫ້ວຫົດສົງທຸກໆປີ, ມີໝູ່ນັກຮຽນຢູ່ແຕ່ລະໂຮງຮຽນເທດສະບານຂື້ນໄປຫຼີ້ນທ່ຽວຊົມເປັນຈຳນວນຫຼວງຫຼາຍແຕ່ກໍ່ບໍ່ໄດ້ຮັບການພັດທະນາ ; ຈົນມາຮອດວັນທີ່ 2 ທັນວາ 2017ຄະນະນຳຂອງເມືອງ, ນັກທຸລະກິດ, ຜູ້ປະກອບການ ແລະ ພະນັກງານວິຊາການໄດ້ສົມທົບກັບອຳນາດການປົກຄອງບ້ານ ລົງເກັບກຳຂໍ້ມູນຈາກນັ້ນກໍ່ໄດ້ກຳນົດກິດຈະກຳແຫຼ່ງທ່ອງທ່ຽວຖ້ຳພະຜາຂີ້ເໝັ້ນອອກເປັນ 6 ກິດຈະກຳຕົ້ນຕໍຄື:

ຈຸດທີ່ 1 ຈຸດຊົມວີວເທດສະບານເມືອງໄຊຍະບູລີ ແຂວງໄຊຍະບູລີ, 
ຈຸດທີ່ 2 ສວນຜັກນໍ້າ ແລະ ນໍ້າອອກຮູໜ້າຜາ,
ຈຸດທີ່ 3 ຈຸດທ່ຽວຊົມນາໄຮ່ແທ່ນ
ຈຸດທີ່ 4 ແມ່ນຈຸດຖໍ້າພະຜາຂີ້ເໝັ້ນ
ຈຸດທີ່ 5 ແມ່ນສວນຜັກນໍ້າທີ່ມີນໍ້າອອກຮູພະຍານາກ
ຈຸດທີ່ 6 ແມ່ນຈຸດການບໍລິການອາຫານ ແລະ ເຄື່ອງດື່ມ. 


ຈາກນັ້ນໃນພີທີ ທ່ານ ຄໍາສິງສໍລະສຸກ ເຈົ້າເມືອງ ໄຊຍະບູລີ ກໍ່ໄດ້ກ່າວເປີດພິທີຢ່າງເປັນທາງການພ້ອມນີ້ຄະນະປະທານ ແລະ ຜູ້ເຂົ້າຮ່ວມກໍ່ໄດ້ທ່ຽວຊົມສະຖານທີ່ທ່ອງທ່ຽວຈຸດຕ່າງໆ ຂອງຖ້ຳພະຜາຂີ້ໝິ້ນດ້ວຍບັນຍາກາດທີ່ຄືກຄື້ນ ແລະ ເບີກບານມ່ວນຊື່ນ.

ທີ່ມາ: ຂ່າວແຂວງໄຊຍະບູລີ (ມີເດຍລາວ)


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments