ບ້ານນາເລົາ ເມືອງວັງວຽງ ກວດກາການປະເມີນ ມາດຕະຖານບ້ານພົ້ນທຸກ



ເມື່ອບໍ່ດົນຜ່ານມານີ້, ຢູ່ທີ່ໂຮງຮຽນປະຖົມບ້ານນາເລົາເມືອງວັງວຽງ ແຂວງວຽງຈັນ. ໄດ້ມີການກວດກາການປະເມີນມາດຕະຖານບ້ານພົ້ນທຸກ ບ້ານນາເລົາ. ໂດຍພາຍໃຕ້ການເປັນປະທານ ຂອງທ່ານ ວີດົງ ໄຊຍະສອນ ເລຂາພັກແຂວງ ເຈົ້າແຂວງໆວຽງຈັນ, ມີບັນດາທ່ານການນໍາຂັ້ນແຂວງ, ເມືອງ, ຫ້ອງການທີ່ກ້ຽວຂ້ອງແລະພໍ່ແມ່ປະຊາຊົນເຂົ້າຮ່ວມ.




ບ້ານນາເລົາ ເປັນບ້ານໜຶ່ງຂຶ້ນກັບກຸ່ມບ້ານນາມອນ ຫ່າງຈາກສໍານັກງານປົກຄອງເມືອງແລະທາງທິດເໜືອ 15 ກິໂລແມັດ, ມີເນື້ອທີ່ທັງໝົດ 6.900 ກວ່າເຮັກຕາ, ບ້ານນາເລົາ ແມ່ນບ້ານພື້ນຖານດັ່ງເດີມປະຊາຊົນສ່ວນໃຫຍ່ເປັນຊາວກະສິກອນປູກຝັງ-ລຽງສັດ ໃນເມື່ອກ່ອນຕັ້ງຢູ່ຝາກນ້ຳງາດເບື້ອງຕາເວັນອອກ ສະພາບຂອງບ້ານມີຄວາມຍຸ້ງຍາກໂດຍສະເພາະແມ່ນລະດູຝົນ ບໍ່ມີເສັ້ນທາງເຂົ້າອອກເປັນສາຍເຫດ ແລະເງື່ອນໄຂໃຫ້ບ້ານນາເລົາເປັນບ້ານທຸກຍາກປະຈຸບັນ ພາຍຫຼັງຍົກຍ້າຍມາຢູ່ບ້ານໃໝ່ນີ້ ໄດ້ຈັດຕັ້ງເປັນ 7 ໜ່ວຍສາມັກຄີ, ມີ 119 ຄົວເຮືອນ, ມີ 135 ຄອບຄົວ, ມີພົນລະ ເມືອງທັງໝົດ 543 ຄົນ, ຍິງ 259 ຄົນ, ມີ 2 ຊົນເຜົ່າ ຄື: ລາວລຸ່ມ ແລະ ກຶມມຸ, ຕັ້ງຢູ່ແຄມທາງ ມີທ່າແຮງໃນການພັດທະນາຫຼາຍດ້ານ ເຊັ່ນ: ດ້ານການຄ້າ-ການບໍລິການ, ການຕິດຕໍ່ພົວພັນ ແລະ ການດຳເນີນທຸລະກິດກິດຈະການຕ່າງໆ. 


ໃນປີ 2011 ຜ່ານມານີ້, ພື້ນຖານເສດຖະກິດການຜະລິດຂອງປະຊາຊົນຍັງສືບຕໍ່ຮັກສາອັດຕາການຂະຫຍາຍຕົວ ຢ່າງຕໍ່ເນື້ອງ ລວມລາຍຮັບຂອງບ້ານຄິດເປັນມູນຄ່າທັງໝົດລ້ານ 8.796 ກີບ. ສະເລ່ຍລາຍຮັບໃສ່ຫົວຄົນ 16 ລ້ານກີບຫຼື 1.975 ໂດລາຕໍ່ຄົນ. ສະເລ່ຍເຂົ້າກິນໄດ້ 494 ກິໂລກຕໍ່ຄົນມາຮອດປະຈຸບັນປະຊາຊົນບັນດາເຜົ່າສາມັກຄີເປັນປຶກແຜ່ນພາຍໃນບ້ານ ມີຄວາມເປັນເຈົ້າການ ໃນການສ້າງສາເຮືອນຊານຂອງຕົນເຖິງວ່າບໍ່ທັນແລ້ວ ບໍ່ທັນສຳເລັດ ແຕ່ກໍ່ເປັນພື້ນຖານ ແລະ ຈະເຮັດເປັນເຮືອນທີ່ດີກວ່າຢູ່ບ້ານເກົ່າ ພ້ອມນັ້ນຊີວິດການເປັນຢູ່ຂອງປະຊາຊົນກໍ່ນັບມື້ ນັບດີຂຶ້ນ.




ໃນພິທີດັ່ງກ່າວ ຍັງໄດ້ຮັບຟັງການໂອ້ລົມຂອງ ທ່ານ ວິດົງ ໄຊຍະສອນ ເຈົ້າແຂວງໆວຽງຈັນເຊີ່ງທ່ານໄດ້ກ່າວວ່າ: ດັ່ງທີ່ຮູ້ກັນແລ້ວວ່າ ໂຄງການຈັດສັນ ແລະ ຍົກຍ້າຍບ້ານນາເລົາ ແມ່ນເປັນໂຄງການລົງທຶນຂອງພັກ ແລະ ລັດຖະບານ ເປັນທຶນຮອນທັງໝົດ 4 ຕື້ກວ່າກີບ ແລະ ອົງການປົກຄອງ ແຂວງວຽງຈັນ ກໍ່ໄດ້ປະກອບທຶນໃນການພັດທະນາພື້ນຖານໂຄງລ່າງຕື່ມອີກ ຈຳນວນ 500 ລ້ານກີບ. ນອກນັ້ນ, ຍັງໄດ້ຮັບການປະກອບສ່ວນທຶນຮອນການຊວ່ຍເຫຼືອຊຸກຍູ້ຈາກພາກສ່ວນຕ່າງໆຈຳນວນໜຶ່ງ. ໂຄງການຈັດສັນແລະຍົກຍ້າຍດັ່ງກ່າວ ເຖິງແມ່ນວ່າໄດ້ເລີ້ມຈັດຕັ້ງປະຕິບັດແຕ່ປີ 2012 ມາເຖິງປະຈຸບັນ, ສາມາດຍາດຜົນງານມາໄດ້ຫຼາຍຢ່າງໂດຍສະເພາະການກໍ່ສ້າງຖະໜົນຫົນທາງພື້ນຖານໂຄງລ່າງ ໄດ້ຮັບການພັດທະນາດີຂຶ້ນ, ສ້າງຕາຄ່າຍໄຟຟ້າ, ການຈັດສັນດິນເພື່ອທຳການຜະລິດໃຫ້ພໍ່ແມ່ປະຊາຊົນໃນບ້ານເພື່ອໃຫ້ເຂົ້າເຈົ້າໄດ້ທຳການຜະລິດສ້າງລາຍຮັບ. ຫລັງຈາກນັ້ນ ທ່ານເຈົ້າແຂວງໆວຽງຈັນ ແລະ ບັນດາທ່ານການນໍາຂັ້ນແຂວງ, ພະແນກ, ເມືອງ, ຫ້ອງການທີ່ກ້ຽວຂ້ອງກໍ່ໄດ້ລົງສຳລວດ ບ້ານນາເລົາຕື່ມອີກ.

ທີມຂ່າວ:  ເມືອງວັງວຽງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments