ສາມສ່ຽວໄວຄະນອງ ງັດເຂົ້າເຮືອນ ລັກເງິນ 50 ລ້ານ ຢູ່ບ້ານໃໝ່ ເມືອງວຽງພູຄາ ແຂວງຫຼວງນໍ້າທາ



ສາມສ່ຽວໄວຄະນອງ ກໍ່ເຫດລັກງັດເຂົ້າເຮືອນເຈົ້າຂອງໂຮງງານຊອຍໄມ້ ຢູ່ເຂດບ້ານວຽງໃໝ່ ເມືອງວຽງ ແລ້ວລັກ ເອົາເງິນ 50 ລ້ານໜີໄປ, ແຕ່ໜີບໍ່ລອດ ຖືກເຈົ້າໜ້າທີ່ກອງບັນຊາການ ປກສ ເມືອງວຽງພູຄາ ແຂວງຫຼວງນໍ້າທາ ໄດ້ຕາມຈັບຕົວໄດ້ໃນວັນດຽວກັນ ພ້ອມເກັບກູ້ເງິນທີ່ຄົນຮ້າຍລັກໄປຈໍານວນໜຶ່ງ.
ພັຕ ທອງຫອມ ທັນອໍລະພິມ ຫົວໜ້າພະເເນກຕຳຫຼວດ ກອງບັນຊາການ ປກສ ເມືອງວຽງພູຄາ ແຂວງຫຼວງນໍ້າທາ ໃຫ້ຮູ້ວ່າ: ພາຍຫຼັງໄດ້ຮັບລາຍງານຈາກ ທ້າວ ມິງທິງຈົງ ນັກທຸລະກິດຈີນ ທີ່ມາຕັ້ງໂຮງງານຊອຍໄມ້ຢູ່ເຂດບ້ານວຽງ ໃໝ່ ເມືອງວຽງ ແຂວງຫຼວງນໍ້າທາ ໃນວັນທີ 24 ມັງກອນ 2018 ວ່າ: ມີຄົນຮ້າຍລັກງັດເຂົ້າເຮືອນ ແລ້ວເຂົ້າໄປ ລັກເອົາເງິນໜີໄປຈຳນວນ 50​ ລ້ານກີບ. ຈາກນັ້ນ, ຈຶ່ງຈັດກໍາລັງວິຊາສະເພະຄິດຕາມເປົ້າໝາຍ ສາມາດຈັບຕົວ ຜູ້ກໍ່ເຫດໄດ້ 3 ຄົນ ໃນວັນດຽວກັນ, ຊື່ທ້າວ ນັດ ອາຍຸ 13 ປີ, ທ້າວ ເກດ ອາຍຸ 14 ປີ ແລະ ທ້າວ ເຕາະ ອາຍຸ 13 ປີ ທັງ 3 ຄົນຢູ່ບ້ານໃໝ່ ເມືອງວຽງພູຄາ ພ້ອມຢາບ້າ 76 ເມັດ.
ຜ່ານການສືບສວນ-ສອບສວນ, ພວກກ່ຽວຮັບສາລະພາບວ່າ: ໃນວັນທີ 24 ມັງກອນ 2018, ໄດ້ຊັກຊວນກັນ ລັກຈອບເບິ່ງເຮືອນຂອງ ທ້າວ ມິງທິງຈົງ ເຈົ້າຂອງໂຮງຊອຍໄມ້ ເພື່ອເຂົ້າໄປລັກຄົ້ນຫາຊັບ, ພໍໄປຮອດບໍ່ມີໃຜຢູ່ ເຮືອນ, ມີແຕ່ກຳມະກອນຈຳນວນໜຶ່ງຢູ່ໂຮງຊອຍໄມ້. ຈາກນັ້ນ, ຈຶ່ງໄດ້ພາກັນປິນເຂົ້າທາງປ໋ອງຢ້ຽມເຂົ້າໄປໃນ ເຮືອນ ເຫັນຕູ້ເສບ ມີກະແຈຄ່າໄວ້ ແລ້ວຈຶ່ງພາກັນໄຂຕູ້ເສບພົບເຫັນເງິນຢູ່ໃນຕູ້ເສບດັ່ງກ່ວາ 2 ມັດ ຈຶ່ງຈັບເອົາ 1 ມັດ ແລ້ວພາກັນໜີອອກປ່ອງຢ້ຽມບ່ອນເກົ່າ ແລ້ວພາກັນນັບເງິນ ທີ່ລັກມາໄດ້ມີ 50 ລ້ານກີບ. ຈາກນັ້ນ, ກໍໄດ້ ແບ່ງປັນກັນ ແລ້ວພາກັນໄປຮ້ານຊື້ເຫຼົ້າ, ເບຍ ແລະ ຊື້ຢາບ້າມາເສບ ໄປຫຼິ້ນການພະນັນ. ຕໍ່ມາຈຶ່ງຖືກເຈົ້າໜ້າ ທີ່ຈັບໄດ້.
ປັດຈຸບັນ, ເຈົ້າໜ້າທີ່ຫ້ອງການ ປກສ ເມືອງວຽງພູຄາ ໄດ້ເກັບກູ້ເງິນທີ່ພວກຜູ້ກ່ຽວທັງ 3 ຄົນລັກໄປນັ້ນ ຄືນມາໄດ້ແລ້ວ 38 ລ້ານກີບ, ສ່ວນຜູ້ຖືກຫາທັງ 3 ແມ່ນຈະໄດ້ສຶກສາອົບຮົມ ກ່າວເຕືອນ ແລະ ເອົາພໍ່ -ແມ່ຜູ້ ປົກຄອງເຂົ້າມາເຮັດບົດບັນທຶກ ແລະ ໃຊ້ແທນຈຳນວນເງິນທີ່ພວກຜູ້ກ່ຽວທັງ 3 ໃຊ້ຈ່າຍໄປແລ້ວນັ້ນຄືນໃຫ້ເຈົ້າ ຂອງໂຮງຊອຍໄມ້.
ພາບ ແລະ ຂ່າວ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

Post a Comment

0 Comments